جامعہ عائشہ للبنات چھٹمل پور میں’’ایک شام اولیاء اللہ کے ساتھ‘کے عنوان سے پروقار اور روحانی مجلس کا انعقاد

(پی این این)
چھٹمل پور، سہارنپور:گذشتہ روز جامعہ عائشہ للبنات چھٹمل پور، ضلع سہارنپور میں بعد نمازِ عصر تا عشاء ایک روحانی اور پروقار تقریب’’ایک شام اولیاء اللہ کے ساتھ‘‘ (برائے شرکاء مجلس ذکر و فکر آخرت) کا شاندار اہتمام کیا گیا۔ تقریب کی صدارت حضرت مولانا محمد ہاشم، شیخ الحدیث جامعہ کاشف العلوم چھٹمل پور حضرت مولانا حبیب اللہ قاسمی نے فرمائی۔
پروگرام کا آغاز نمازِ عصر کے بعد ہوا ۔ حضرت مولانا محمد خالد ندوی نے تقریب کے اغراض و مقاصد پر روشنی ڈالی۔حضرت مولانا احمد اشتیاق قاسمی نے ذکرِ الٰہی کی اہمیت اور اس کے فضائل بیان کیے۔ صوفی وقت حضرت مولانا محمد سلیم اوماہی کوٹہ نے تصوف اور سلوک کی حقیقت اور اصلاحِ باطن پر تفصیلی روشنی ڈالی۔
حضرت مولانا مفتی محمد اسرار مظاہری نے اصلاحی و فکری بیانات سے نوازا۔بعد نمازِ مغرب عمومی پروگرام اور مجلسِ ذکر کے دوران شیخ الحدیث حضرت مولانا حبیب اللہ قاسمی نے تشنگانِ معرفت کو دستارِ بندی، اجازت و خلافت کی سند اور سلسلہ کا شجرہ مبارک عطا کیا۔ اس مبارک سلسلے میں مولانا ناظم کریم قاسمی چشتی کو بھی باقاعدہ داخل کیا گیا اور خصوصی ذمہ داری سے نوازا گیا۔ دستار بندی اور اس روحانی عمل میں ایڈوکیٹ حقیقت ملک سمیت دیگر اہم شخصیات اور تشریف فرما علمائے کرام نے بھی بھرپور شرکت کی۔
تقریب کے اختتام پر سرچشمہ علم و معرفت حضرت مولانا حبیب اللہ قاسمی نے سلسلے سے متعلق ضروری ہدایات دیں،بالخصوص تلاوتِ قرآن کا اہتمام کرنے اور فرائض و سنن کی پابندی پر خصوصی توجہ دلائی۔ آخر میں حضرت مولانا مفتی محمد اسرارمظاہری کی پرُتاثیر دعا پر اس پروقار مجلس کا اختتام ہوا۔
اس روح پرور موقع پر علمی و سماجی حلقوں میں انتہائی خوشی کی لہر دوڑ گئی اور مولانا ناظم کریم قاسمی چشتی کو اس منصبِ جلیلہ پر مبارکباد پیش کرنے اور نیک تمناؤں کا اظہار کرنے والوں میں بالخصوص حضرت مولانا محمد ارشاد قاسمی ،شیخ طریقت حضرت مولانا مفتی محمد اکمل بھیسانوی ،محب العلماء حضرت حافظ حشمت علی کریمی، قاری محمد نعیم صاحب کریمی،قاری محمد صدام کریمی،قاری محمد گلبہار رشیدی،قاری محمد عبداللہ قاسمی عمر پوری،ڈاکٹر محمد عارف، ایڈوکیٹ حقیقت ملک ،سمیت دیگر مقتدر علمائے کرام اور معزز شخصیات شامل ہیں۔ تمام حضرات نے اس روحانی نسبت پر مسرت کا اظہار کرتے ہوئے دعا فرمائی کہ اللہ تعالیٰ اس سلسلے کو مزید فروغ عطا فرمائے اور مولانا موصوف کو دین و امت کی خدمت کے لیے قبول فرمائے۔