دربھنگہ: سنگھواڑہ تھانہ حلقہ کی بھرہلی پنچایت واقع سرکاری مڈل اسکول، کورا میں چوتھی جماعت کی نابالغ طالبہ سے مبینہ چھیڑخانی کے معاملے پر بدھ کو زبردست ہنگامہ ہوگیا۔ واقعے سے مشتعل مقامی لوگوں نے اسکول کا گھیراؤ کرتے ہوئے ملزم سرکاری ٹیچر راجیش پاسوان کو سامنے لانے کا مطالبہ کیا۔اہل خانہ کے مطابق طالبہ نے گھر پہنچ کر واقعے کی اطلاع دی۔ بعد میں 2 دیگر نابالغ طالبات کی جانب سے بھی ملزم سرکاری ٹیچر کے خلاف شکایت کی بات سامنے آئی۔ ملزم کے اسکول سے فرار ہونے پر لوگوں نے ہیڈ ماسٹر بٹکُریا موچی اور سرکاری ٹیچر وجے پاسوان پر اسے فرار کرانے میں مدد کرنے کا الزام عائد کیا۔
ہنگامے کی اطلاع پر سنگھواڑہ تھانہ صدر بسنت کمار پولیس فورس کے ساتھ موقع پر پہنچے۔ صورتحال کشیدہ ہونے پر صدر ایس ڈی پی او-2 ایس کے سمن، سی او انکور رائے، سمری تھانہ صدر اروند کمار سمیت اضافی پولیس فورس کو بھی طلب کیا گیا۔ پولیس نے بھیڑ کو قابو میں کرکے صورتحال معمول پر لائی۔پولیس کے مطابق ملزم راجیش پاسوان کے خلاف پوکسو ایکٹ اور بی این ایس کی مختلف دفعات کے تحت مقدمہ درج کرکے سمری تھانہ پولیس کی مدد سے بھراٹھی سے گرفتار کرلیا گیا ہے۔ بی ای او ونود کمار نے بتایا کہ ملزم سرکاری ٹیچر کی معطلی کی سفارش اعلیٰ افسران سے کی جارہی ہے۔
، جبکہ ہیڈ ماسٹر اور ایک دیگر سرکاری ٹیچر پر عائد الزامات کے سلسلے میں وضاحت طلب کی جارہی ہے۔

گیا۔ کونچ بلاک کے مڈل اسکول بالی کے ہیڈ ماسٹر مرحوم دیودت تیواری کے اچانک انتقال کے بعد ڈسٹرکٹ ٹیچر ویلفیئر ٹرسٹ نے ان کے اہل خانہ کو 75 ہزار روپے کی مالی امداد فراہم کی۔
مرحوم دیودت تیواری کا گزشتہ منگل کو حرکتِ قلب بند ہونے سے انتقال ہوگیا تھا۔ وہ اپنے پیچھے اہلیہ آرادھنا تیواری، بارہویں جماعت میں زیرِ تعلیم بیٹا اور دسویں جماعت میں زیرِ تعلیم بیٹی چھوڑ گئے ہیں۔ مرحوم خاندان کے واحد کمانے والے فرد تھے۔
انتقال کی اطلاع ملنے پر ٹرسٹ کی ہنگامی میٹنگ میں دو منٹ کی خاموشی اختیار کرکے مرحوم کی روح کے اطمینان کے لیے دعا کی گئی اور ضابطے کے تحت 75 ہزار روپے کی امداد کا فیصلہ کیا گیا۔
ٹرسٹ کے صدر منوج کمار سنہا، سکریٹری اروند کمار، بانی رکن و ضلع نائب کوآرڈینیٹر اشوک کمار، خزانچی سرپرست اروند پرساد اور ضلع کوآرڈینیٹر محمد حیدر علی خان کی قیادت میں وفد پٹنہ کی شیوپوری کالونی میں مرحوم کے آبائی مکان پہنچا، جہاں اہلیہ آرادھنا تیواری کی موجودگی میں ان کی بیٹی اپراجیتا کماری کو 75 ہزار روپے کا چیک سونپا گیا۔
اس موقع پر ٹرسٹی ویرندر کمار، جتیندر کمار، ڈاکٹر نریندر دیو، منوج کمار نرالا، نیہا کماری، سریندر کمار چودھری اور میڈیا انچارج ابو فیصل سمیت متعدد اساتذہ موجود تھے۔ ٹرسٹ کے عہدیداران نے کہا کہ مشکل وقت میں کسی ساتھی استاد کے خاندان کے ساتھ کھڑا ہونا ہی حقیقی ہمدردی ہے۔ انہوں نے ضلع کے تمام اساتذہ سے ٹرسٹ سے جڑنے کی اپیل بھی کی۔

(پی این این)
پھلواری شریف:سہارنپور کے کلکٹریٹ احاطے میںواقع ایک قدیم تاریخی مسجد کو رات کے اندھیرے میں شہید کیے جانے پر امارتِ شرعیہ بہار، اڈیشہ ، جھارکھنڈ و مغربی بنگال کے امیرِ شریعت حضرت مولانا احمد ولی فیصل رحمانی مدظلہ العالی نے سخت ردعمل کا اظہار کرتے ہوئے فرمایا کہ پولیس کی یہ آمرانہ کارروائی آئین و دستور کے قطعاً خلاف ہے،عبادت گاہ تحفظ ایکٹ 1991ء میں اس کی صراحت موجود ہے کہ 1947ء کے بعد کسی بھی عبادت گاہ کو منہدم کرنا قانونی طور پر جرم ہے،اس مسجد کو شہید کرکے انتظامیہ نے آئین اور قانون کی بالادستی کا مذاق اڑایا۔
حضرت امیرِ شریعت نے مزید فرمایا کہ اگر غیر قانونی تعمیرات کو منہدم کرنا ہی مسئلہ کا حل ہے تو پھر ہندوستان بھر میں سیکڑوں غیر قانونی عمارتیں، مذہبی تعمیرات بنی ہوئی ہیں، انہیں کیوں نہیں منہدم کیا جارہاہے ؟ صرف اقلیتی طبقوں کی عبادت گاہوں کو کیوں نشانہ بنایا جاتا ہے؟ کیا یہ اصولِ انصاف و مساوات کے خلاف نہیں ہے؟حکومت کسی کی بھی ہو، قانون سب کے لیے یکساں ہونا چاہیے اور کسی بھی مذہبی یا عوامی عمارت کے خلاف کارروائی شفاف، غیر جانب دار اور مقررہ قانون کے طریقۂ کار کے مطابق ہی ہونی چاہیے،جبکہ سہارنپور کی یہ مسجد وقف بورڈ کے اندراج رجسٹر میں وقف کے طور پر درج ہے، اس کے پختہ کاغذات اور دستاویزات بھی شہادت دیتے ہیں کہ یہ زمین جناب یعقوب خان اور جناب وحید خان کے نام سے ہے، اس کے باوجودسیٹی مجسٹریٹ نے 16 جولائی کو مسجد کو غیر قانونی قرار دے کر تیس دن کے اندر ہٹانے کا حکم دے دیا، مسجد کمیٹی نے عدالت کے سامنے کاغذات، بلدیاتی ریکارڈ اور پرانے ریونیو اندراجات پیش کیے، مگر انہیں نظرانداز کر دیا گیا، انتظامیہ کمیٹی اس کے خلاف ہائی کورٹ سے رجوع کرنے کی تیاری کر رہی تھی کہ اسی دوران سرکاری عملے نے بھاری فوج کے ذریعے بڑی عجلت میں علی الصبح مسجد کو منہدم کر دیا، جو کہ نہایت ہی افسوس ناک ہے،یہ کارروائی قانونی اور آئینی طور پر غلط تو ہے ہی حقوقِ انسانی کے بھی خلاف ہے۔
حضرت امیرِ شریعت نے مزید کہا کہ بی جے پی کے اختیار والی ریاستوں میں مساجد و مدارس کے خلاف کارروائیوں میں مستقل اضافہ ہو رہا ہے،گزشتہ چند ماہ کے دوران اتر پردیش، دہلی، راجستھان، مدھیہ پردیش، آسام، گجرات اور مہاراشٹر وغیرہ میں ایسی کارروائیوں میں تیزی دیکھی جا رہی ہے، یہ صورتِ حال ملک کے مذہبی و تہذیبی اقدار کے خلاف ہے،جبکہ اس سلسلے میں سپریم کورٹ نے واضح رہنما خطوط جاری کرتے ہوئے اس بات پر زور دیا کہ کسی بھی شخص یا عمارت کے خلاف کارروائی قانون کے مقررہ اختیار کے مطابق ہی ہونی چاہیے، کیونکہ قانون کی حکمرانی اور شہریوں کے بنیادی حقوق کا تحفظ ریاست کی بنیادی اور اہم ذمہ داری ہے،اگر مذہبی تعصب کی بنیاد پر کسی ایک طبقے کو نشانہ بنایا گیا تو اس سے ملک میں غیر یقینی صورتِ حال پیدا ہوگی،اور ملک کی سالمیت کے لئے خطرہ ہے ۔