نوجوان کے قتل معاملہ میں ماں اور ماما سمیت 3 ملزمان گرفتار

دیوبند:رام پور منیہاران پولیس نے حالیہ قتل کے سنسنی خیز معاملے کا پردہ فاش کرتے ہوئے ایک خاتون (متوفی کی ساس) سمیت تین ملزمان کو گرفتار کر لیا ہے۔ پولیس نے ایک ملزم کی نشاندہی پر قتل میں استعمال ہونے والا ۵۱۳ بور کا دیسی طمنچہ، ایک زندہ کارتوس اور ایک خول بھی برآمد کر لیا ہے۔
پولیس کے مطابق ۹ جون کو شاملی ضلع کے گاؤں کھیڑی بیراگی کے رہائشی سلیکھ چند نے رپورٹ درج کرائی تھی کہ نامزد افراد نے اس کے بیٹے شیو کمار کو گولی مار کر قتل کر دیا ہے۔ مقدمہ درج ہونے کے بعد ایس ایس پی کی ہدایت پر خصوصی ٹیم تشکیل دی گئی اور ملزمان کی تلاش شروع کی گئی۔
پولیس نے کارروائی کرتے ہوئے دو مطلوب ملزمان کرم ویر ولد سردارا اور وملا زوجہ روہتاش کو چنیٹی فلائی اوور کے نیچے سے گرفتار کیا، جبکہ تیسرے ملزم روی کمار کو شیوداس پْلیا کے قریب سے گرفتار کیا گیا۔ روی کمار کی نشاندہی پر قتل میں استعمال شدہ اسلحہ بھی برآمد کر لیا گیا۔ پولیس تفتیش میں سامنے آیا کہ مقتول شیو کمار اور آکانکشا کے درمیان گزشتہ چار سے پانچ برس سے محبت کا تعلق تھا۔
دونوں نے رواں سال فروری میں خاندان کی مخالفت کے باوجود پسند کی شادی کر لی تھی اور اس کے بعد مظفر نگر میں رہ رہے تھے۔ ۹ جون کو آکانکشا پولیس بھرتی امتحان دینے رام پور منیہاران آئی تھی، جہاں اس کے اہل خانہ بھی پہنچ گئے اور اسے گھر واپس چلنے کے لیے کہا، لیکن اس نے انکار کر دیا۔ پولیس کے مطابق اسی بات پر مشتعل ہو کر ملزمان نے مبینہ طور پر شیو کمار اور آکانکشا کو قتل کرنے کا منصوبہ بنایا۔ بعد ازاں مقتول کی گاڑی کا تعاقب کیا گیا اور موقع ملتے ہی روی کمار نے گاڑی کی کھڑکی سے شیو کمار پر فائرنگ کر دی، جس سے اس کی موت ہو گئی۔ واردات کے بعد تمام ملزمان فرار ہو گئے تھے۔ پولیس نے بتایا کہ گرفتار ملزمان کے خلاف قتل کے مقدمے کے ساتھ آرمس ایکٹ کی دفعات بھی شامل کر دی گئی ہیں۔ تمام ملزمان کو قانونی کارروائی مکمل کرنے کے بعد عدالت میں پیش کیا جا رہا ہے، جبکہ ایک دیگر ملزم کی تلاش جاری ہے۔