محرم کے پیشِ نظرجھارکھنڈ پولیس الرٹ،انتظامیہ کی مشتبہ سرگرمیوں اور افراد کی فوری اطلاع دینے کی اپیل

(پی این این)
رانچی: جھارکھنڈ پولیس ہیڈکوارٹر نے محرم کے تہوار کو پُرامن اور خوشگوار ماحول میں منعقد کرانے کے لیے ریاست بھر میں وسیع پیمانے پر سکیورٹی انتظامات کیے ہیں۔
تہوار کے دوران امن و امان برقرار رکھنے کے لیے 10 ہزار سے زائد پولیس اہلکاروں، 6 ہزار سے زیادہ ہوم گارڈ جوانوں اور مرکزی نیم فوجی دستوں (آر اے پی/آر اے ایف سمیت) کی سات کمپنیوں کو تعینات کیا جائے گا۔
پولیس ہیڈکوارٹر کی ہدایات پر تمام اضلاع میں خصوصی چوکسی برتی جا رہی ہے۔ حساس اور انتہائی حساس علاقوں میں اضافی سکیورٹی فورسز تعینات کی جائیں گی۔ محرم کے جلوسوں اور اکھاڑوں کی سرگرمیوں کی نگرانی ڈرون اور ویڈیو کیمروں کے ذریعے کی جائے گی۔اس کے علاوہ سوشل میڈیا پر بھی خصوصی نظر رکھی جائے گی تاکہ کسی بھی قسم کی افواہ یا گمراہ کن معلومات کو بروقت روکا جا سکے۔ ضلعی انتظامیہ اور پولیس حکام کو ہدایت دی گئی ہے کہ وہ امن کمیٹیوں کے اجلاس منعقد کر کے باہمی بھائی چارے اور ہم آہنگی کو فروغ دیں۔پولیس ہیڈکوارٹر نے عوام سے بھی اپیل کی ہے کہ وہ امن و امان اور فرقہ وارانہ ہم آہنگی برقرار رکھیں اور کسی بھی مشتبہ سرگرمی کی فوری اطلاع انتظامیہ کو دیں۔
انتظامیہ کا کہنا ہے کہ محرم کے دوران سکیورٹی کے تمام ضروری انتظامات مکمل کر لیے گئے ہیں تاکہ یہ تہوار پُرامن طریقے سے انجام پا سکے۔