رام پور:تحصیل ملک کے محلہ اسد اللہ پور میں کربلا کے نام پر الاٹ تقریباً دو بیگھہ زمین پر بلڈوزر چلوا کر قبضہ ہٹو دیا گیا۔ تحصیل کے مطابق دو بیگھہ زمین پرانی پرتی کے طور پر کاغذات میں درج تھی۔ سال 2016 میں ملک کے ایس ڈی ایم کے احکامات پر زمین کو کربلہ کے نام پر درج کر دیا گیا تھا۔ بعد میں ڈی جی سی سول نے اس الاٹمنٹ کے خلاف اعتراض کیا۔ اس معاملہ کی سنوائی ایس ڈی ایم ملک کی عدالت میں کی گئی ۔ ایس ڈی ایم ملک نے 9 فروری سے پہلے کئے گئے زمین کے الاٹمنٹ کو خارج کر دیا اور احکامات کے زمین کو پرانی پرتی کے طور پر درج کر دیا جائے ۔ ایس ڈی ایم کے احکامات پر آج تحصیل کی ٹیم موقع پر پہنچی اور زمین پر جے سی بی چلا کر اس پر سے ناجائز قبضہ ہٹوا دیا ۔ اب تک اس زمین کو کر بلا کی زمین کہا جاتا تھا۔ کارروائی کےدوران ایس ڈی ایم انوراگ سنگھ، نائب تحصیلدار انکت او تھی ، لیکھ پال جتیندر اور تحصیل کا عملہ موجود رہا۔ عملہ کا کہنا تھا کہ عدالت کے احکامات پر یہ کام کرایا گیا ہے۔

دیوبند:دیوبند اور تلہیڑی بزرگ کے درمیان واقع گائوں ساکھن خورد کے قریب ہائی وے پر کھڑی گاڑی تھار پر کچھ ہتھیار سے لیس لوگوں نے فائرنگ کردی ،جس کی وجہ سے اس پورے علاقہ میں سنسنی پھیل گئی۔ کارڈرائیور نے قریب کے کھیتوں میں بھاگ کر اپنی جان بچائی، اطلاع ملنے پر پولیس موقع پر پہنچ گئی اور اس نے تفصیلات معلوم کرنے کے بعد جانچ شروع کردی ، فورنسک ٹیم نے بھی جائے واردات پر پہنچ کر ثبوت اکٹھا کئے۔
تفصیل کے مطابق گزشتہ دیر شام تقریباً8بجے ساکھن خورد گائوں کے قریب ہائی وے پر ماسٹر ڈھابے کے پاس ایک سفید کار میں آنے والے حملہ آوروں نے وہاں پہلے سے کھڑی تھار گاڑی پر گولیاں برسادیں۔ گاڑی کے ڈرائیور اچن نے بتایا کہ وہ اپنی کار میں ہوا چیک کرانے کے لئے وہاں کھڑا ہوا تھا ، اسی درمیان اس پر فائرنگ کردی گئی۔ اچن نے بتایا کہ ایک گولی شیشہ توڑتے ہوئے اندر آئی اور ایک گولی کارکی باڈی پر لگی ۔ اس نے بتایا کہ جب وہ گاڑی سے اترکر کھیتوں کی طرف بھاگا تو حملہ آوروں نے اس کا پیچھا کرتے ہوئے کئی رائونڈ فائر کئے، لیکن بمشکل وہ اپنی جان بچانے میں کامیاب ہوگیا۔ اچن تیاگی کا کہنا ہے کہ ان کی اپنے رشتہ داروں سے کافی پرانی دشمنی اورتنازعہ چلا آرہا ہے ،اسی رنجش کے سبب اس پر حملہ کیا گیا۔
وہیں دوسری جانب کوتوالی انچارج کپل دیو اورتلہیڑی پولیس چوکی کے انچارج لوکیش رانا پولیس ٹیم کے ساتھ جائے واردات پر پہنچ گئے اور انہوں نے تفصیلات معلوم کرنے کے بعد پورے معاملہ کی جانچ شروع کردی۔ اسی دوران فورنسک ٹیم کو بھی موقع پر بلالیاگیا۔ کوتوالی انچارج نے بتایا کہ پرانی رنجش کے سبب حملہ کئے جانے کی بات سامنے آئی ہے۔ انہوں نے بتایا کہ پورے معاملہ کی جانچ کی جارہی ہے ، حقیقت واضح ہونے پر کارروائی کی جائے گی۔

آگرہ: مسجد نہر والی سکندرا کے خطیب محمد اقبال نے جمعہ کے خطبہ میں حاضرین کو نصیحت کرتے ہوئے کہا کہ ہر انسان کو اپنی زندگی کے اعمال پر غور کرنا چاہیے، کیونکہ اللہ تعالیٰ کے نظام کے تحت اس کی پوری زندگی کی نگرانی اور ریکارڈنگ ہو رہی ہے۔
انہوں نے کہا کہ کوئی لمحہ ایسا نہیں جب انسان اللہ کی نگاہ اور فرشتوں کی نگرانی سے باہر ہو، اور قیامت کے دن اس کی پوری زندگی کا ریکارڈ اس کے سامنے پیش کر دیا جائے گا، جس کے بعد وہ اپنے کسی عمل سے انکار نہیں کر سکے گا۔انہوں نے کہا کہ ہم بچپن سے سنتے آئے ہیں کہ کراماً کاتبین ہمارے اعمال لکھتے ہیں، لیکن ہمیں یہ سمجھنا چاہیے کہ فرشتوں کے کام اور اللہ تعالیٰ کی قدرت کو دنیاوی پیمانوں سے نہیں ناپا جا سکتا۔ قرآن کریم کی سورۂ ق کی آیت 18 کا حوالہ دیتے ہوئے انہوں نے کہا کہ اللہ تعالیٰ فرماتا ہے:
وہ کوئی لفظ منہ سے نہیں نکالتا مگر اس کے پاس ایک نگہبان تیار ہوتا ہے۔
محمد اقبال نے افسوس کا اظہار کرتے ہوئے کہا کہ آج انسان دنیاوی مصروفیات میں اس قدر کھو گیا ہے کہ اسے اللہ تعالیٰ کی طرف سے آنے والی کامیابی اور ہدایت کی آواز سنائی نہیں دیتی۔ انہوں نے حاضرین کو قیامت کی ہولناکیوں یاد دلاتے ہوئے سورۂ الحج کی آیات 1 اور 2 کا حوالہ دیا، جن میں قیامت کے زلزلے اور اس دن کی شدت کا ذکر کیا گیا ہے۔انہوں نے کہا کہ قیامت کے دن ہر انسان کو اپنے اعمال کا حساب دینا ہوگا، اس لیے ضروری ہے کہ آج ہی سے اپنی زندگی کو نیک اعمال، عبادات اور اللہ تعالیٰ کی اطاعت کے مطابق ڈھالا جائے تاکہ روزِ محشر کسی پریشانی کا سامنا نہ کرنا پڑے۔
خطیب محمد اقبال نے دعا کرتے ہوئے کہا کہ اللہ تبارک و تعالیٰ ہم سب کو اپنی اصلاح کرنے، نیک اعمال اختیار کرنے اور آخرت کی تیاری کرنے کی توفیق عطا فرمائے۔ آمین یا رب العالمین۔