(پی این این)
حاجی پور:بہار راجیہ پرارمبھک شکشک سنگھ ویشالی کی ایک اہم میٹنگ صوبائی کمیٹی کی ہدایات کے مطابق شیرو منی مارکیٹ، دگھی کلا پشچم (سمراٹ اشوک سینا کے مرکزی دفتر) حاجی پور میں منعقد ہوئی۔ اجلاس میں اساتذہ کو درپیش مختلف مسائل پر تفصیلی گفتگو کی گئی۔ اجلاس سے خطاب کرتے ہوئے ضلعی سکریٹری پنکج کشواہا نے کہا کہ اساتذہ کو تین تین ماہ تک تنخواہ نہ ملنا انتہائی افسوسناک اور بدقسمتی کی بات ہے۔
انہوں نے کہا کہ حکومت اپنی ہی بنائی گئی قواعد و ضوابط کے مطابق نہ تو اساتذہ کو ترقی (پروموشن) دے رہی ہے اور نہ ہی وقت پر تنخواہ ادا کر رہی ہے، جس کی وجہ سے اساتذہ میں شدید ناراضگی پائی جا رہی ہے۔ ضلعی صدر اُتکل کانت نے کہا کہ صوبائی کمیٹی کی ہدایات کے مطابق تنظیم کو مزید مضبوط بنانے کے لیے فعال اراکین کی رکنیت سازی مہم چلائی جائے گی اور بلاک سطح پر کانفرنسوں کا انعقاد بھی کیا جائے گا۔ اس کے علاوہ مانسون اجلاس کے دوران بہار اسمبلی کے سامنے ایک بڑا احتجاجی مظاہرہ بھی کیا جائے گا۔اجلاس میں موجود تمام مقررین نے واضح طور پر کہا کہ گریجویٹ اور اساتذہ حلقۂ انتخاب سے منتخب ہونے والے نمائندے اسمبلی یا میڈیا میں اساتذہ کے مسائل اٹھا دینے کو ہی مسئلے کا حل سمجھتے ہیں، جبکہ عملی طور پر مسائل کے حل کے لیے مؤثر اقدامات کی ضرورت ہے۔
اجلاس کے اختتام پر ضلعی تعلیم افسر (ڈی ای او) ویشالی کے ذریعے وزیراعلیٰ بہار کو 21 نکاتی مطالبات پر مشتمل ایک یادداشت بھیجی گئی۔ یادداشت میں مقررہ ابتدائی اساتذہ کو 12 سالہ خدمات کی بنیاد پر ترقی دینے، بیسک گریڈ میں کام کر رہے گریجویٹ اہل اساتذہ کو 8 سال مکمل ہونے پر گریجویٹ گریڈ میں ترقی دینے، تمام زمروں کے اساتذہ کو ضلع کے اندر اور بین اضلاع رضاکارانہ تبادلے کی سہولت فراہم کرنے، خصوصی اساتذہ کی ترقی کے عمل کو فوری طور پر مکمل کرنے سمیت دیگر مطالبات شامل ہیں۔ اجلاس کی صدارت ضلعی صدر اُتکل کانت نے کی جبکہ نظامت کے فرائض ضلعی سکریٹری پنکج کشواہا نے انجام دیے۔
اجلاس میں نائب صدر للت داس، مشترکہ سکریٹری آنند موہن، خزانچی رویندر کمار، بلاک صدر وکیل رائے، اکبر علی، محمد شاہنواز عطا، سنجے کمار، سمن سنجے داس، منیش کمار، رام دیال یادو، راج نارائن مہتو، نریش کمار سمیت بڑی تعداد میں تنظیم کے کارکنان اور اساتذہ موجود تھے۔

(پی این این)
نالندہ:جے ڈی یو قانون ساز پارٹی کے رہنما، بہار حکومت کے دیہی ترقی اور اطلاعات و عام رابطہ محکمہ کے وزیر شراون کمارنے آج بہار شریف کے بَسوان بگہا میں باون بوٹی کی آرائشی اشیاء بنانے میں مصروف بنکروں سے ملاقات کی۔
انہوں نے کہا کہ یہ جی آئی ٹیگ نالندہ کی پہچان اور بنکروں کی محنت کا اعزاز ہے۔ اب نالندہ کی باون بوٹی ساڑی ملک و دنیا میں اپنی خاص شناخت کے ساتھ فروخت ہوگی۔ جِیوِکا کے ذریعے تمام سرکاری پروگراموں میں انگوتر کے طور پر استعمال کر کے اس کا پرچار و نشر کر کے ترقی دی جائے گی۔ گرام شری میلوں میں دیہی ترقی کے ذریعے اسٹال لگا کر باون بوٹی کے فن کو وسعت دی جائے گی۔
باون بوٹی کی کاریگری صدیوں پرانی ہے۔ ہر ایک ساڑی میں بنکروں کی کلا اور روایت نظر آتی ہے۔ جی آئی ٹیگ ملنے سے نقل پر روک لگے گی اور بنکروں کو ان کے مصنوعات کی مناسب قیمت ملے گی۔ انہوں نے بنکروں کو یقین دلایا کہ ریاستی حکومت ان کی ترقی کے لیے پُرعزم ہے۔ مارکیٹنگ، ڈیزائن کی ترقی اور تربیت میں ہر مدد دی جائے گی۔ ای-کامرس پلیٹ فارم سے جوڑ کر ان ساڑیوں کی فروخت بڑھائی جائے گی تاکہ بنکروں کی آمدنی دوگنی ہو سکے۔
بہار کی دستکاری ہماری دھروہر(میراث، ثقافتی سرمایہ، قومی ورثہ) ہے۔ اسے بچانا اور بڑھانا ہم سب کی ذمہ داری ہے۔ بَسوان بگہا اور نیپورہ گاؤں کے بنکر بہار کا فخر ہیں۔ حکومت ان کے ہنر کو نئی بلندیوں تک لے جائے گی۔ سابق وزیرِ اعلیٰ نتیش کمار نے اس کلا کو بڑھانے اور سنوارنے کا کام کیا ہے۔ بہار کی حکومت ہر ممکن مدد کرتی رہی ہے اور آگے بھی کرتی رہے گی۔ دھروہر کو بچانے اور سنوارنے کے لیے ہماری حکومت پُرعزم ہے۔قومی سطح پر باون بوٹی کی آرائشی اشیاء کی وجہ سے ہی بَسوان بگہا کو پہچان اور عزت ملی، جس میں پدم شری مرحوم کپل دیو کامت کی سخت محنت اور لگن کا نتیجہ ہے۔
رکنِ پارلیمنٹ کوشلندر کمار نے کہا کہ یہاں کے بنکر خود کفیل بن رہے ہیں۔ حکومت کے ذریعے ہر ممکن مدد پہنچا کر بنکروں کی معاشی حالت کو مضبوط اور مستحکم کیا جائے گا۔ پارلیمنٹ میں باون بوٹی کی ترقی کی بات مضبوطی سے اٹھاؤں گا۔لاکھوں دیوی نے کہا کہ باون بوٹی کی کلا کا آغاز مرحوم کپل بابو نے کیا تھا، جس کی وجہ سے انہیں محترم صدرِ جمہوریہ کے ہاتھوں پدم شری اعزاز سے نوازا گیا۔ اب باون بوٹی کے فن کو جی آئی ٹیگ دیا گیا ہے، جس سے بنکروں کے دن پھریں گے اور ان کا خواب ساکار ہوتا نظر آ رہا ہے۔اس موقع پر بڑی تعداد میں بنکر، خواتین خود امدادی گروہ کی رکنیں، گلریز انصاری، ضلع ترجمان، ڈاکٹر دھننجے کمار، دیو کمار منگلم، رِکی کمار، پشپ راج پانڈے، سچیدانند پرساد وغیرہ موجود تھے۔

(پی این این)
پھلواری شریف:بہار کے قدر آور ممتاز ملی وسیاسی شخصیت جناب انور احمد صاحب سابق ایم ایل سی کے سانحہ ارتحال پر امیر شریعت مفکر ملت حضرت مولانا سید احمد ولی فیصل رحمانی صاحب سجادہ نشیں خانقاہ رحمانی مونگیر نےگہرے دکھ اور صدمے کا اظہار کرتے ہوئے کہا کہ مرحوم ایک نیک دل ،خوش اخلاق اور خد مت خلق کا جذبہ رکھنے والے ہمدرد انسان تھے ، اللہ تعالی مرحوم کی بال بال مغفرت فرمائے اور ان کے صاحبزادگان اسفر احمد و ارشد احمد وغیرھم کو صبر جمیل کی توفیق مرحمت فرمائے۔
ان کے انتقال پر ناظم امارت شرعیہ بہار ،اڈیشہ ،جھارکھنڈ ومغربی بنگال مفتی محمد سعید الرحمن قاسمی نے دلی رنج وغم کا اظہار کرتے ہوئے کہا کہ مرحوم سماجی کاموں میں بڑھ چڑھ کر حصہ لیتے تھے ،ہر ایک کے خوشی وغم میں شریک ہوتے تھے ،وہ اپنی شرافت کے باعث ہر مکتب فکر میں عزت واحترام کی نگاہوں سے دیکھے جاتے تھے ،ان کی ہر دل عزیز ی کا منظر ان کی نمازجنازہ میں شرکت کے موقع پر دیکھاکہ بڑی تعداد میں لوگوں نے شرکت کی اور مرحوم کےلئے ایصال ثواب اور دعاء مغفرت کی۔
ناظم صاحب نے کہاکہ مرحوم 1978ء سے 1990 تک وارڈ کونسل کی حیثیت سے بڑی عوامی خدمت انجام دی اس کے بعد 1993ء سے 1995ء تک 15 نکاتی پروگرام کے نائب چیرمین اور1995 سے 2004 ء تک قانون ساز کونسل کے رکن کی حیثیت سے بڑے بڑے فلاحی ورفاہی کاموں کو انجام دیا۔
انہوں نے کہا کہ مرحوم کا امارت شرعیہ اور یہاں کے بزرگان دین سے بڑا گہرا اور عقیدت مندانہ تعلق تھاان کے صاحبزادے جناب ارشد احمدڈائریکٹر مدرس انٹر نیشنل اسکول اور اسفر احمد وارڈ کونسلروالد محترم کے مشن کو آگے بڑھارہے ہیں اور امارت شرعیہ کی ملی تحریکات کو قوت بخش رہے ہیں دعاء ہے کہ اللہ تعالی ان کے تما م پسمندگان کو صبر وثبات کی توفیق بخشے اور مرحوم کوجنت الفردوس میں اعلیٰ مقام عطا کرے ۔
حضرت امیرشریعت صاحب مدظلہ العالی کی ہدایت پر ناظم امارت شرعیہ مفتی محمد سعیدالرحمن قاسمی صاحب کی قیادت میں مولانامنہاج عالم ندوی اور مولانا محمد صابر حسین قاسمی نے نماز جنازہ میں شرکت کی،ارکان وفد نے مرحوم کے اہل خانہ سے اظہار تعزیت کیا اور تعزیتی کلمات کے ساتھ مرحوم کےلئے دعاء مغفرت کی ،قارئین سے بھی دعاء مغفرت کی درخواست ہے ۔