(پی این این)
ھلواری شریف: گذشتہ 28 مئی کو حافظ محمد منصور عالم استاد پرائمری اسکول شہر دربھنگہ کو چند شر پسند عناصر نے جس بے رحمی سے شہید کیا اس نے ریاست بہار کے لاؤ اینڈ آڈر کو سوالات کے گھیرے میں کھڑا کر دیا ،اس المناک و دردناک سانحہ پرامارت شرعیہ بہار، اڈیشہ وجھارکھنڈ کے قائم مقام ناظم مولانا مفتی محمد سعید الرحمن قاسمی نے سخت رد عمل کا اظہار کرتے ہوئے کہا کہ حافظ صاحب ایک محنتی اور جفا کش استاذ تھے وہ عرصے سے اسکول میں تدریسی خدمات انجام دیتے تھے اور اپنی صلاحیت و صالحت کے باعث اساتذہ و طلباء بلکہ علاقہ میں بھی قدر و منزلت کی نگاہوں سے دیکھے جاتے تھے، وہ اسکول جا رہے تھے کہ راستے میں گھات لگائے موٹر سائیکل پر سوارغنڈوں نے ان پر گولیوں کی بوچھاڑ کر دی جس سے حافظ صاحب کی جائے وقوع پر ہی موت ہو گئی اور مجرم راہ فرار اختیار کر گئے ،اس واقعہ نے سب کو حیرت میں ڈال دیا کہ دن کے اجالے میں اتنا بڑا واقعہ پیش آیا اور پولیس تماشائی بنی رہی جو کہ نہایت ہی افسوس ناک ہے ۔
تنظیم امارت شرعیہ ضلع مدھوبنی کے ذمہ داروں نے مرحوم کے اہل خانہ سے مل کر تعزیت مسنونہ پیش کی اور ہرممکن تعاون کی یقین دہانی کرائی ،امارت شرعیہ بہار اڈیشہ وجھارکھنڈ کے قائم مقام ناظم صاحب نے وزیر اعلیٰ بہار سے مجرموں کو گرفتار کرکے انہیں کیفر کردار تک پہنچانے اور اہل خانہ کو معقول معاوضہ اور ایک شخص کو سرکاری نوکری دینے کا مطالبہ کیا ہے اور انہوں نے کہا کہ امارت شرعیہ جس طرح کی بھی قانونی مدد ہو سکتی ہے ہر طرح کے تعاون کے لیے تیار ہے مزید انہوںنے کہا کہ حکومت کی ذمہ داری ہےکہ وہ ریاست میں امن و امان کو بحال کر کے قانون کی بالادستی قائم رکھےاور خوف و دہشت کے ماحول کو ختم کرے۔
