(پی این این)
پھلواری شریف:بہار کے قدر آور ممتاز ملی وسیاسی شخصیت جناب انور احمد صاحب سابق ایم ایل سی کے سانحہ ارتحال پر امیر شریعت مفکر ملت حضرت مولانا سید احمد ولی فیصل رحمانی صاحب سجادہ نشیں خانقاہ رحمانی مونگیر نےگہرے دکھ اور صدمے کا اظہار کرتے ہوئے کہا کہ مرحوم ایک نیک دل ،خوش اخلاق اور خد مت خلق کا جذبہ رکھنے والے ہمدرد انسان تھے ، اللہ تعالی مرحوم کی بال بال مغفرت فرمائے اور ان کے صاحبزادگان اسفر احمد و ارشد احمد وغیرھم کو صبر جمیل کی توفیق مرحمت فرمائے۔
ان کے انتقال پر ناظم امارت شرعیہ بہار ،اڈیشہ ،جھارکھنڈ ومغربی بنگال مفتی محمد سعید الرحمن قاسمی نے دلی رنج وغم کا اظہار کرتے ہوئے کہا کہ مرحوم سماجی کاموں میں بڑھ چڑھ کر حصہ لیتے تھے ،ہر ایک کے خوشی وغم میں شریک ہوتے تھے ،وہ اپنی شرافت کے باعث ہر مکتب فکر میں عزت واحترام کی نگاہوں سے دیکھے جاتے تھے ،ان کی ہر دل عزیز ی کا منظر ان کی نمازجنازہ میں شرکت کے موقع پر دیکھاکہ بڑی تعداد میں لوگوں نے شرکت کی اور مرحوم کےلئے ایصال ثواب اور دعاء مغفرت کی۔
ناظم صاحب نے کہاکہ مرحوم 1978ء سے 1990 تک وارڈ کونسل کی حیثیت سے بڑی عوامی خدمت انجام دی اس کے بعد 1993ء سے 1995ء تک 15 نکاتی پروگرام کے نائب چیرمین اور1995 سے 2004 ء تک قانون ساز کونسل کے رکن کی حیثیت سے بڑے بڑے فلاحی ورفاہی کاموں کو انجام دیا۔
انہوں نے کہا کہ مرحوم کا امارت شرعیہ اور یہاں کے بزرگان دین سے بڑا گہرا اور عقیدت مندانہ تعلق تھاان کے صاحبزادے جناب ارشد احمدڈائریکٹر مدرس انٹر نیشنل اسکول اور اسفر احمد وارڈ کونسلروالد محترم کے مشن کو آگے بڑھارہے ہیں اور امارت شرعیہ کی ملی تحریکات کو قوت بخش رہے ہیں دعاء ہے کہ اللہ تعالی ان کے تما م پسمندگان کو صبر وثبات کی توفیق بخشے اور مرحوم کوجنت الفردوس میں اعلیٰ مقام عطا کرے ۔
حضرت امیرشریعت صاحب مدظلہ العالی کی ہدایت پر ناظم امارت شرعیہ مفتی محمد سعیدالرحمن قاسمی صاحب کی قیادت میں مولانامنہاج عالم ندوی اور مولانا محمد صابر حسین قاسمی نے نماز جنازہ میں شرکت کی،ارکان وفد نے مرحوم کے اہل خانہ سے اظہار تعزیت کیا اور تعزیتی کلمات کے ساتھ مرحوم کےلئے دعاء مغفرت کی ،قارئین سے بھی دعاء مغفرت کی درخواست ہے ۔

(پی این این)
چھپرہ :سی پی آئی بہار کے ریاستی سکریٹری رام نریش پانڈے نے بی جے پی حکومت پر کسانوں اور مزدوروں کے خلاف کام کرنے کا الزام لگایا ہے۔مسٹر پانڈے پیر کو سی پی آئی کے سارن ضلع کونسل کے اجلاس سے خطاب کر رہے تھے۔انہوں نے کہا کہ سیٹلائٹ ٹاؤن شپ کے نام پر غریب کسانوں کی زمین چھین کر کارپوریٹ گھرانوں کو دینے کی سازش رچی جارہی ہے۔
بہار میں امن و امان تباہ ہو رہا ہے اور تعلیم اور صحت کا نظام تباہ ہو رہا ہے۔گھپلے اور کرپشن عروج پر ہے۔بیوروکریٹس،ٹھیکیداروں اور سفید پوش حکمران سیاست دانوں کا ایک ٹولہ بہار کے خزانے کو لوٹ رہا ہے۔انہوں نے بہار کی مختلف عوامی تنظیموں کی کال پر 15 جولائی کو قانون ساز اسمبلی کے کامیاب محاصرے کی اپیل کی۔میٹنگ سے خطاب کرتے ہوئے سی پی آئی کے ریاستی سکریٹریٹ رکن اور سارن ضلع انچارج سریندر سوربھ نے کہا کہ بہار میں سمراٹ چودھری کی حکومت غریب بے زمین لوگوں اور سڑک پر دکانداروں کو زبردستی بے دخل کررہی ہے۔متبادل انتظام کے بغیر غریبوں کے خلاف بلڈوزر استعمال کیا جا رہا ہے۔ایک ملزم کو بہار کا وزیر تعلیم بنا کر تعلیمی ماحول کو خراب کیا جا رہا ہے۔اجلاس میں سیٹلائٹ ٹاؤن شپ پلان کو واپس لینے،کٹاؤ متاثرین کے مسائل کے حل اور ضلع کے مختلف راستوں کے سفری کرایوں کے تعین کا مطالبہ کرتے ہوئے ایک قرارداد منظور کی گئی۔
شیو جی داس نے میٹنگ کی صدارت کی جبکہ ضلع سکریٹری رام بابو سنگھ،چولہن سنگھ اور ٹیچر لیڈر ودیا ساگر ودیارتھی نے اجتماع سے خطاب کیا۔ہری بلم سنگھ،سریندر ناتھ ترپاٹھی،رزاق حسین،مہندر پربھاکر،سوگریو گپتا،نریندر رائے، سریش ورما،بھوپیش بھیم،محمد شہاب الدین،سنجے کمار سنگھ،گوتم شاہ،سنگھاسن رائے، ندیم احمد،جے نارائن سنگھ،ڈاکٹر وریندر سنگھ اور بھرت رائے موجود تھے۔موقع پر ایک نئی 11 رکنی ڈسٹرکٹ ایگزیکٹو کمیٹی بھی تشکیل دی گئی۔

(پی این این)
سمستی پور:مفکر ملت حضرت مولانا سید احمد ولی فیصل رحمانی دامت برکاتہم، امیر شریعت بہار، اڈیشہ، جھارکھنڈ و مغربی بنگال کی ہدایت اورناظم امارت شرعیہ بہار، اڈیشہ، جھارکھنڈ و مغربی بنگال حضرت مولانا مفتی محمد سعید الرحمن قاسمی کی ایماء پر مولانا قمر انیس قاسمی ،معاون ناظم امارت شرعیہ پھلواری شریف پٹنہ کی قیادت میں امارت شرعیہ بہار، اڈیشہ، جھارکھنڈ و مغربی بنگال کا ایک دعوتی و اصلاحی وفد ضلع سمستی پور کے تاج پور، سرائے رنجن، اوجیار پور، دلسنگھ سرائے اور وارث نگر بلاک کے مختلف مواضعات کے دورے پر ہے، وفد میں مفتی راشد انور قاسمی معاون قاضی شریعت مرکزی دارالقضاء امارت شرعیہ پھلواری شریف پٹنہ، مولانا امان اللہ قاسمی قاضی شریعت دارالقضاء امارت شرعیہ دھرم پور سمستی پور، مفتی نیراسلام قاسمی استاذ حدیث دارالعلوم الاسلامیہ امارت شرعیہ پھلواری شریف پٹنہ، مولانا محمد جمیل اختر رحمانی مبلغ امارت شرعیہ پھلواری شریف پٹنہ اور مولانا رضوان احمد مظاہری مبلغ امارت شرعیہ پھلواری شریف پٹنہ شریک ہیں۔
موضع دریاپور لگنیا، علی نگر مہیش پٹی ، صلحا بربٹہ ، ساتن پور ،چاند چور رحیم ٹولہ میں عوام الناس سے خطاب کرتے ہوئے قائد وفد مولانا قمر انیس قاسمی صاحب معاون ناظم امارت شرعیہ پھلواری شریف پٹنہ نے فرمایا کہ ملک کی موجودہ صورتحال انتہائی تشویش ناک ہے بڑی تیزی کے ساتھ نسل نو بے دینی کی طرف بڑھ رہی ہے منظم سازش کے تحت نوجوانوں کے ایمان و عقیدہ کا سودا کیا جارہا ہے ایسے حالات میں ان کے دلوں کو ایمان سے منور کرنا اور انہیں اسلامی سانچے میں ڈھالنا وقت کی اہم ترین ضرورت ہے ۔
انہوں نے مزیدکہا کہ امارت شرعیہ پورے ملک کے مسلمانوں کے لیے اور خصوصا بہار، اڈیشہ، جھارکھنڈ و مغربی بنگال کے مسلمانوں کے لیے اللہ کی ایک عظیم نعمت ہے، امارت شرعیہ مسلمانوں کی مذہبی ضرورت ہے، اس کی عظمت و تقدس کا لحاظ رکھنا اور اس کی ضرورتوں کا خیال کرنا، مسلمانوں کے لیے لازم ہے انہوں نے اس بات پر زور دیا کہ ایک امیر شریعت کی ماتحتی میں رہ کر ان کی اطاعت و فرمانبرداری کرنا مسلمانوں پر واجب ہے۔ اس لیے امارت شرعیہ سے جڑ کر رہنا اور امیر شریعت کے پیغام پر لبیک کہنا وقت کی اہم ضرورت ہے، قائد وفد نے امارت شرعیہ کے سو سالہ خدمات سے روشناس کرایا تمام شعبوں کا بہت ہی جامع تعارف کرایا، نیز انہوں نے مسلمانوں سے اپیل کی کہ وہ اپنے گھر کو اسلامی ماحول سے مزین کریں، مرد و عورت خود بھی اسلامی احکامات پر عمل کریں اور اپنے بچے اور بچیوں کو بھی ان پر عمل کرنے تلقین کریں۔
مفتی راشد انور قاسمی معاون قاضی شریعت مرکزی دارالقضاء امارت شرعیہ پھلواری شریف پٹنہ نے اپنے خطاب میں اتحاد امت پر زور دیتے ہوئے فرمایا کہ مسلمانوں کو چاہئے کہ وہ کلمہ واحدہ کی بنیاد پر وحدت و اجتماعیت کے ساتھ زندگی گزاریں، اسی میں ان کی بقا ہے، انہوں نے مسلمانوں سے اپیل کی کہ اپنا معاشرہ ایک صالح اور اسلامی معاشرہ بنائیں۔
مفتی امان اللہ قاسمی قاضی شریعت دارالقضاء امارت شرعیہ سمستی پور نے دارالقضاء کی اہمیت ضرورت پر روشنی ڈالتے ہوئے لوگوں سے اپیل کی کہ اپنے معاملات امارت شرعیہ کے دارالقضاء سے حل کرائیں۔ مفتی نیر الاسلام قاسمی صاحب استاذ حدیث دارالعلوم الاسلامیہ امارت شرعیہ پھلواری شریف پٹنہ نے ذمہ داران اور گارجین حضرات سے اپیل کی کہ وہ اپنے بچوں اور بچیوں کی دینی تعلیم و تربیت پر توجہ دیں، انہیں اس طرح اسلامی سانچے میں ڈھالیں کہ ان کے دل و دماغ میں ایمان اور اسلام پیوست ہو جائے۔ مولانا جمیل اختر رحمانی صاحب مبلغ امارت شرعیہ نے نظامت کے فرائض انجام دیے، مولانا رضوان صاحب مظاہری مبلغ امارت شرعیہ اور مولانا جمیل اختر رحمانی مبلغ امارت شرعیہ نے وفد کے اس دورے کو کامیاب بنانے میں مسلسل جد و جہد کر رہے ہیں ، جناب عبد الرحمن صاحب دریاپور لگنیا جناب شمیم صاحب علی نگر مہیش پٹی ، مولانا ضیاء اللہ اور شمیم صاحب صلحا، جناب ارشد احمد و احمد صاحب ساتن پور، مولانا امیر معاویہ، حافظ محمد شکیل صاحب مکھیا عبد الرحمن صاحب چاند چور رحیم ٹولہ وغیرھم نے امارت شرعیہ کے اس وفد کا پرجوش استقبال کیا، اکرام کیا، ضیافت کی۔ واضح رہے کہ وفد کا یہ دورہ مؤرخہ 10/ جون 2026 سے 17/ جون 2026 تک جاری رہے گا۔