(پی این این)
پٹنہ: وزیر اعلیٰ سمراٹ چودھری کل مظفر پور ضلع کے موتی پور بلاک اپ گریڈ شدہ ہائر سیکنڈری اسکول، گوسائی پور میں منعقدہ سہیوگ کیمپ میں میں شامل ہوئے۔ وزیر اعلیٰ سہیوگ کیمپ میں اپنے مسائل اور شکایات کے حل کے لیے آئے عام لوگوں سے ملاقات کی۔ وزیر اعلیٰ نے درخواستوں کا جائزہ لیا اور پڑھا، لوگوں کے مسائل سنے اور حل کے لیے ہدایات دیں۔ سہیوگ کیمپ کے معائنہ کے دوران لوگوں سے بات کی، ان کی خیریت دریافت کی، اور مقامی مسائل پر تبادلہ خیال کیا۔وزیراعلیٰ نے پروگرام کے مقام سے مظفر پور ضلع کے لیے 288.16 کروڑ کے 109 منصوبوں کا ریمورٹ کے توسط سے افتتاح اور سنگ بنیاد رکھا۔
وزیر اعلیٰ نے 6733سیلف ہیلپ گروپ کی جیویکا دیدیوں کو گزر بسر کے لیے 101 کروڑ روپے کا علامتی چیک دیا۔ساتھ ہی وزیر اعلیٰ نے وزیر اعلیٰ ادیمی منصوبہ، واسگیت گریہہ استھل پرچہ، آیوشمان کارڈ، سماجی تحفظ پنشن، پی ایم سوریہ گھر منصوبہ، منریگا بکری شیڈ، لیبر کارڈ، راشن کارڈ، اور پیدائش کا سرٹیفکیٹ کے مستفیدوں کو سرٹیفکیٹ دیا۔ پروگرام کے دوران وزیر اعلیٰ کو ڈی ایم سبز پودااور عوامی نمائندوں نے مومنٹو، شال اور پھولوں کا ایک بڑا ہار پہنا کر پرتپاک خیر مقدم کیا۔وزیر اعلیٰ نے شمع روشن کرکے پروگرام کا افتتاح کرنے کے بعد اپنے خطاب میں کہا کہ آپ کے ضلع کے موتی پور بلاک کے پرسونی پنچایت میں منعقدہ سہیوگ شیویر میں آپ کے درمیان ہونے کا موقع ملا۔ اس کیمپ میں مسائل کے حل کے لیے آئے لوگوں کی درخواستوں کو میں نے دیکھااور انہیں حل کرنے کی ہدایت کی۔سہیوگ کیمپ میں مظفر پور ضلع میں اب تک 10ہزار درخواستیں موصول ہوئی ہیں، جن میں سے تقریباً 90 فیصد کا ضلع انتظامیہ نے تصفیہ کر دیا ہے۔ یہ بڑی خوشی کی بات ہے۔
انہوں نے کہا کہ یہ سہیوگ شیویر ایک عوامی پروگرام ہے۔ ہمارا مقصد مسائل کو حل کرنا ہے۔ ہمیں تمام حلقوں سے معلومات موصول ہو رہی ہیں کہ اب تک موصول ہونے والی تمام درخواستوں پر کارروائی ہو چکی ہے، اور کچھ پر کارروائی کے لیے کام تیزی سے جاری ہے۔ ہم نے مسائل کے حل کے لیے ٹائم فریم مقرر کیا ہے۔ اگر 10 دن میں مسائل حل کرنے کے لیے کچھ نہ کیا گیا تو 11 ویں دن وزیراعلیٰ آفس سے پہلا نوٹس بھیجا جائے گا۔ 20 دن تک کوئی کارروائی نہیں کی گئی تو 21 ویں دن دوسرا نوٹس بھیجا جائے گا۔ اگر 25 دنوں کے اندر کوئی کارروائی نہیں کی گئی تو 26 ویں دن تیسرا نوٹس بھیجا جائے گا۔ اگر 30 ویں دن تک کوئی کارروائی نہیں کی گئی تو 31 ویں دن وزیراعلیٰ کے دفتر سے متعلقہ آفیسر کو معطلی کا نوٹس بھیجا جائے گا۔ پوری انتظامی مشینری کو اس کی اطلاع دے دی گئی ہے۔
وزیر اعلیٰ نے کہا کہ وزیر اعظم نریندر مودی نے ترقی یافتہ ہندوستان کا خواب دیکھا اور سابق وزیر اعلیٰ نتیش کمار نے خوشحال بہار کا خواب دیکھا۔ اس خواب کو پورا کرنے کے لیے ہم سب مل کر کام کریں گے۔وزیر اعلیٰ نے کہا کہ مظفر پور میں ایئر پورٹ کی تعمیر کے تمام عمل مکمل ہو چکاہے اور جلد ہی اس کا سنگ بنیاد رکھا جائے گا۔ انہوں نے کہا کہ ہم نے تین چینی ملوں کوکھولنے کا فیصلہ کیا ہے۔ چوتھی چینی مل کھلے گی تو موتی پور میں کھولی جائے گی۔ 2030 تک بہار میں 25 شوگر ملیں شروع ہوں گی۔ ریاستی حکومت نے 3لاکھ 47ہزار کروڑ روپے کا بجٹ تیار کیا ہے۔ بہار خوشحالی کی راہ پر گامزن ہے۔ مرکزی حکومت بھی مکمل تعاون فراہم کر رہی ہے۔ خوشحال اور شاندار بہار کی تعمیر کے لیے ہم سب کو مل کر کام کرنا ہے۔ کابینہ نے 11 سیٹلائٹ ٹاؤن شپ بنانے کا فیصلہ کیا ہے۔ 22ہزار ایکڑ اراضی پر’تر ہت‘ کے نام سے ایک نئی سیٹلائٹ ٹاؤن شپ تعمیر کی جائے گی۔
انہوں نے کہا کہ مظفر پور شہر کو مزید منظم کرنے کی ضرورت ہے۔ ریپڈ ریل شروع کرنے کاہم لوگوں کا منصوبہ ہے۔ ریپڈ ریل جب شروع ہو جائے گا تو مظفر پور لوگ 30 سے 40 منٹ میں پہنچ سکیں گے۔ انہوں نے کہا کہ ہم تمام عوامی نمائندوں سے اپیل کرتے ہیں کہ وہ سہیوگ شیویر کا دورہ جاری رکھیں۔ عوام سے ملیں اور ان کے مسائل کو سمجھیں۔ ان کے مسائل کے حل کے حوالے سے ان سے فیڈ بیک حاصل کریں اور مجھے آگاہ کریں۔ ہر ایک کو اس بات کو یقینی بنانا چاہیے کہ لوگ سہیوگ شیویر سے مستفید ہوں۔ ہمارا مقصد یہ ہے کہ بہار کے لوگ خوشحال ہوں، اس کے لیے ہم سب کو مل کر کام کرنا ہوگا۔

(پی این این)
حاجی پور: ضلع عدالت ویشالی میں شدید گہما گہمی کے درمیان 34 سال پرانے ایک نہایت مشہور اور جان لیوا حملے کے مقدمے میں آخری فیصلہ سنا دیا گیا۔ عدالت نے اس مقدمے کے مرکزی اور سوشل میڈیا پر وائرل ہو چکے 85 سالہ بزرگ ملزم دیپا رائے کو ان کی زیادہ عمر اور صحت کی حالت کو مدنظر رکھتے ہوئے 3 سال قید کی سزا سنائی۔ جبکہ اس سنگین جرم میں ملوث دیگر چار ملزمان کے خلاف سخت رویہ اختیار کرتے ہوئے انہیں 10، 10 سال قیدِ با مشقت کی سزا سنائی گئی۔
عدالتی فیصلہ آنے کے بعد 85 سالہ بزرگ دیپا رائے کو ایک اہم قانونی راحت بھی حاصل ہوئی۔ سزا سنائے جانے کے فوراً بعد عدالت نے ضابطۂ فوجداری (CrPC) کی متعلقہ دفعات کے تحت انہیں عبوری (پروویژنل) ضمانت دے دی۔ اس کے نتیجے میں انہیں فی الحال جیل نہیں جانا پڑے گا اور وہ اس فیصلے کے خلاف ہائی کورٹ میں اپیل دائر کرنے کے لیے آزاد ہیں۔ اس راحت کے بعد ان کے اہل خانہ نے کسی حد تک اطمینان کا اظہار کیا۔ جہاں ایک طرف بزرگ ملزم کو راحت ملی، وہیں دیگر چار مجرموں پر قانون کا شکنجہ مکمل طور پر کس گیا۔ ایڈیشنل ڈسٹرکٹ اینڈ سیشن جج (اے ڈی جے-1) منوج کمار تیواری کی عدالت نے چاروں مجرموں کو 10، 10 سال قیدِ با مشقت کے ساتھ 25، 25 ہزار روپے جرمانہ بھی عائد کیا۔ جرمانہ ادا نہ کرنے کی صورت میں انہیں اضافی سزا بھگتنی ہوگی۔
سزا سنائے جانے کے فوراً بعد پولیس نے چاروں مجرموں کو حراست میں لے کر قانونی کارروائی مکمل کی اور جیل بھیج دیا۔ 1992 میں راگھوپور میں فائرنگ اور جان لیوا حملہ اس تاریخی مقدمے کے پس منظر کے بارے میں معلومات دیتے ہوئے ایڈیشنل پبلک پراسیکیوٹر نے بتایا کہ یہ تنازعہ سال 1992 کا ہے۔ راگھوپور کے جڑاون پور تھانہ علاقے میں ملزمان نے متاثرہ شخص عدالت رائے اور ان کی اہلیہ پر اندھا دھند فائرنگ کرتے ہوئے جان لیوا حملہ کیا تھا۔ اس سلسلے میں عدالت رائے نے مجموعی طور پر 9 افراد کے خلاف نامزد ایف آئی آر درج کرائی تھی۔ تاہم، انصاف کی اس طویل جدوجہد اور مقدمے کی سماعت کے دوران 4 ملزمان کا انتقال ہو چکا تھا، جس کے بعد باقی 5 ملزمان کے خلاف مقدمہ جاری رہا۔
عدالت نے 26 مئی کو ان پانچوں کو قصوروار قرار دیا تھا۔ معاشرے کے لیے سخت پیغام اس فیصلے کے بعد ویشالی ضلع عدالت کے سرکاری وکیل (لوک ابھیوجک) نے کہا کہ اگرچہ اس مقدمے میں انصاف ملنے میں 34 سال کا طویل عرصہ لگ گیا، لیکن آج کا یہ فیصلہ پورے معاشرے کے لیے ایک مضبوط پیغام ہے۔ انہوں نے کہا کہ یہ فیصلہ ثابت کرتا ہے کہ قانون کے ہاتھ بہت لمبے ہوتے ہیں اور اگر کوئی شخص غلط کام کرے گا تو آج نہیں تو کل، اسے سزا ضرور بھگتنا پڑے گی۔ اس فیصلے کو عدالتی عمل اور انصاف کی ایک اہم کامیابی کے طور پر دیکھا جا رہا ہے۔

چھپرا:بہار حکومت کی اختراعی پہل سہیوگ شیویر کے تحت ضلع کے کل 40 پنچایتیوں میں کیمپ کا کامیابی سے انعقاد کیا گیا۔اس موقع پر نائب وزیر اعلیٰ اور سارن کے انچارج وزیر بیجندر پرساد یادو مہمان خصوصی کے طور پر ضلع کی تین مختلف پنچایتوں میں منعقدہ سہیوگ شیوروں میں شریک ہوئے۔انہوں نے بالترتیب سونپور بلاک کے نیاگاؤں پنچایت،دگھوارا کے آمی پنچایت اور رکھا کے فیروسا پنچایت میں منعقد کیمپوں میں حصہ لیا اور عوام سے بات چیت کی۔
اپنے خطاب میں نائب وزیر اعلیٰ نے کہا کہ بہار حکومت پنچایت سطح پر سہیوگ شیور کا انعقاد کر رہی ہے تاکہ عام شہریوں کو ان کے مسائل کو حل کرنے کے لیے دفاتر کے چکر لگانے کی پریشانی سے نجات مل سکے۔انہوں نے کہا کہ کیمپوں میں موصول ہونے والی شکایات اور درخواستوں پر مقررہ مدت میں کارروائی کو یقینی بنایا جائے گا۔انہوں نے واضح کیا کہ کارروائی کے لیے 30 دن کی ڈیڈ لائن مقرر کی گئی ہے۔مقررہ مدت میں ریزولوشن مکمل کیا جائے گا۔جو اہلکار یا افسر ڈیڈ لائن پر عمل نہیں کریں گے ان کے خلاف قواعد کے مطابق کارروائی کی جائے گی۔
انہوں نے کہا کہ سب کا سمان،زندگی آسان کے تحت ریاستی حکومت کے سات نشچئے-3 کا ایک اہم جزو کے تحت حکومت عام لوگوں کے مسائل کو حل کرنے کے لیے براہ راست پنچایت سطح تک پہنچ رہی ہے۔انہوں نے ضلع کے باشندوں سے اپیل کی کہ وہ سہیوگ شیویر کے ذریعے اپنے مسائل اور شکایات درج کر کے اس اہم اقدام کا فائدہ اٹھائیں۔
ڈپٹی سی ایم نے کہا کہ سہیوگ کیمپ میں درخواستیں جمع کرانے کے علاوہ شہری اپنی شکایات اور درخواستیں سہیوگ پورٹل کے ذریعے آن لائن بھی جمع کر سکتے ہیں۔ریاستی حکومت نے اس مقصد کے لیے sahyog.bihar.gov.in پورٹل تیار کیا ہے۔جہاں درخواست کی صورتحال پر بھی نظر رکھی جا سکتی ہے۔
کیمپ کے دوران پہلے موصول ہونے والی اور پراسیس شدہ درخواستوں کے مستفیدین کو رقم،برتھ سرٹیفکیٹ،راشن کارڈ،معذوری سرٹیفکیٹس اور بیت الخلا تعمیر کے مراعات تقسیم کئے۔کیمپ میں مختلف محکموں کے افسران اور عملے نے عوام سے شکایات اور درخواستیں موصول کیں اور بہت سے مسائل کو موقع پر ہی حل کیا گیا۔اس موقع پر ڈی ایم ویبھو سریواستو،ایس ایس پی ونیت کمار،متعلقہ بلاکس کے عہدیدار ، عوامی نمائندے اور بڑی تعداد میں مقامی لوگ موجود تھے۔