(پی این این)
لکھنؤ:سماج وادی پارٹی (ایس پی) کے قومی صدر اور اتر پردیش کے سابق وزیر اعلیٰ اکھلیش یادو نے پارٹی کے سینئر رہنما اعظم خان کے خلاف درج مقدمات کے معاملے میں ریاستی حکومت کو نشانہ بنایا ہے۔ انہوں نے الزام عائد کیا کہ اعظم خان کو مسلسل مقدمات میں پھنسا کر جیل بھیجنے کی سازش کی جا رہی ہے۔
اکھلیش یادو نے کہا کہ اقتدار میں بیٹھے لوگوں کو یہ بات یاد رکھنی چاہیے کہ جب وقت بدلتا ہے تو تخت بھی بدل جاتے ہیں۔ انہوں نے سوشل میڈیا پر اپنے ردعمل کا اظہار کرتے ہوئے کہا کہ محترم اعظم خان کے خلاف مقدمات کے ذریعے جو سازش رچی جا رہی ہے، اسے صرف ملک ہی نہیں بلکہ پوری دنیا دیکھ رہی ہے۔ کسی عمر رسیدہ شخص کو اس طرح بے بنیاد مقدمات میں پھنسا کر بار بار جیل بھیجنا انتہائی بزدلانہ حرکت ہے۔
حکمرانوں کو نشانہ بناتے ہوئے انہوں نے کہا کہ آج اقتدار میں بیٹھے لوگ جس غلط روایت کو فروغ دے رہے ہیں، وقت اور حالات بدلنے پر انہیں خود بھی اس کا سامنا کرنا پڑ سکتا ہے۔ اس وقت اس سے بچ نکلنا آسان نہیں ہوگا۔ ایس پی صدر نے کہا کہ جب ناانصافی حد سے تجاوز کر جاتی ہے تو وہ ظلم کرنے والوں کے لیے ہی عذاب بن جاتی ہے۔ انہوں نے اعظم خان کے خلاف کی جا رہی کارروائی کو قابلِ مذمت قرار دیا۔
قابلِ ذکر ہے کہ ایس پی رہنما اعظم خان اپنے بیٹے عبداللہ کے ساتھ 11 ماہ بعد رام پور جیل سے باہر آئے، لیکن جیل کے دروازے سے ہی انفورسمنٹ ڈائریکٹوریٹ (ای ڈی) نے انہیں گرفتار کرلیا۔ ای ڈی کا الزام ہے کہ اعظم خان نے جوہر یونیورسٹی کی تعمیر میں سرکاری فنڈ اور ٹھیکوں سے حاصل ہونے والی رقم کا غلط استعمال کیا ہے۔ ایجنسی 416.14 کروڑ روپے کے اخراجات میں مبینہ بے ضابطگیوں اور منی لانڈرنگ کے معاملے کی تحقیقات کر رہی ہے۔
