قرآن وہ کتاب ہے جس کے الفاظ میں شفا: مولانا عبدالرؤوف نوری

(پی این این)
رام پور:مسجد عثمان غنی محلہ مزار شاہ درگاہی پکا باغ میں ایس ایس ایف یو پی ویسٹ کے زیر اہتمام صوبائی سطح پر منعقدہ ترتیل کا پروگرام نہایت کامیابی کے ساتھ اختتام پذیر ہوا۔ پروگرام میں یو پی ویسٹ سے مختلف اضلاع کے طلباء نے حصہ لیا اور خوبصورت انداز میں اپنے اپنے پروگرام پیش کیے۔اول,دوم اور سوم پوزیشن حاصل کرنے والے طلباء کو انعامات سے نوازا گیا۔ ترتیل کے اس پروگرام میں حکم کے فرائض قاری مفتی بلال بلاس پوری اور قاری محمد رضوان خاں نے انجام دیے۔
مولانا بدر الدین سعدی نے بچوں کےنتیجہ کا اعلان کیا۔ مولانا عبدالرؤوف نوری ثقافی صوبائی صدر ایس ایس ایف اتر پردیش ویسٹ نے کہاکہ یہ پروگرام صرف ایک مسابقہ نہیں بلکہ کلام الہی سے تعلق مضبوط کرنے کی ایک عظیم کوشش بھی ہے۔کیوں قرآن وہ کتاب ہے جس کے الفاظ میں شفا ہے جس کی تلاوت سے دلوں کو سکون اور روح کو تازگی ملتی ہے۔ دیگر علماء و مہمانان گرامی نے بھی اپنے خیالات کا اظہار کیا۔
مفتی ندیم فاروقی نیشنل سیکرٹریٹ ممبر ایس ایس ایف انڈیا نے اپنے خیالات کا اظہار کرتے ہوئے کہا کہ یہ پروگرام نہ صرف طلبہ کے اندر قرآن کریم کے شعور کو بیدار کرتا ہے بلکہ ان کی دینی صلاحیتوں کو اجاگر کرنے کا موقع بھی فراہم کرتا ہے۔ آخر میں حافظ محمد اعمش قادری نے تمام شرکاء اور مہمانوں کا دل سے شکریہ ادا کیا۔ بعداز صلوۃ وسلام اور دعا پر محفل اختتام پذیر ہوئی۔اس موقع پر مولانا محمد عمر، عرفان قریشی ، عثمان ایڈوکیٹ، عبدالحفیظ ایڈوکیٹ، شمیم خاں، مولاناثاقب ، مولانا شاہ نواز ، مولانا شاداب نوری، مولانا عارف جمالی کے علاوہ بڑی تعداد میں عوام و خواص شامل رہے۔