(پی این این)
دیوبند:دیوبند کے کوتوالی انچارج سندیپ بالیان نے کوتوالی احاطہ میں عوامی دربار منعقد کرکے لوگوں کی شکایات کو سنا ۔عوامی دربار میں پہنچنے والے فریادیوں کی شکایات اورمسائل کو کوتوالی انچارج نے نہایت سنجیدگی کے ساتھ سنا اور متعلقہ پولیس ملازمین کو ان شکایات کا غیرجانبدارانہ طریقہ سے ترجیحی بنیاد پر تصفیہ کرنے کا حکم دیا ۔
کوتوالی انچارج سندیپ بالیان نے کہا کہ ہرایک پریشان شخص کو انصاف دلانا ان کی پہلی ترجیح ہے ۔انہوں نے کہا کہ کسی بھی فریادی کو غیر ضروری طریقہ سے پریشان نہیں ہونے دیا جائے گا ۔کوتوالی انچارج نے کہا کہ دیوبند اورآس پاس کے سبھی علاقوں میں قانونی نظم ونسق بنائے رکھنا پولیس کی اصل ذمہ داری ہے ۔یہی وجہ ہے کہ اپنی ذمہ داریوں کا احسا س کرتے ہوئے پولیس رات کے وقت بغیر کسی معقول وجہ کہ سڑکو ں پر گھو منے والے مشتبہ اور شرپسند عناصر کی خصوصی نگرانی کی جاتی ہے ۔
انہوں نے انتباہ دیا کہ بغیر کسی وجہ کہ سڑکوں پر شور وغل مچانے ،تیز رفتار کے ساتھ گاڑی ،بائک یا اسکوٹر چلانے اور اسٹنٹ کرنے والوں کے خلاف سخت قانونی کاررو ائی کی جائے گی ۔کوتوالی انچارج سندیپ بالیان نے واضح طور پر کہا کہ شہر کا امن وسکون برباد کرنے یا اس سے کھلواڑ کرنے والوں کو کسی صورت بخشا نہیں جائے گا ۔انہوں نے کہا کہ پولیس کا مقصد عام شہریوں کو محفوظ ماحول مہیا کرانا ہے اور پورے علاقہ میں قانونی نظم ونسق کو مضبوطی کے ساتھ نافذ کئے رکھنا ہے ۔
