دہلی میں صنعت کاروں کیلئے بنایا جائے گا ٹریڈر س ویلفیئر بورڈ :وزیر اعلی ریکھا گپتا

(پی این این)
نئی دہلی: دہلی میں وزیر اعلیٰ ریکھا گپتا نےکہا کہ دہلی کے تاجروں کے مفادات کی حفاظت کے لیے دہلی ٹریڈرس ویلفیئر بورڈ تشکیل دیا جائے گا۔ ریکھا گپتا نے آج یہاں پریس کانفرنس میں کہا کہ اس بورڈ کی تشکیل دہلی کے تاجروں کا دیرینہ مطالبہ تھا۔ کابینہ نے اس تجویز کو منظوری دے دی۔ انہوں نے کہا کہ بجٹ تقریر میں اس بورڈ کے قیام کا اعلان کیا گیا تھا۔
وزیراعلیٰ نے کہا کہ یہ قانونی ادارہ ہوگا۔ اس بورڈ کا مقصد ان مسائل کو حل کرنا ہے جو کاروباری دنیا سے وابستہ افراد کو برسوں سے درپیش تھے ۔ یہ بورڈ تاجروں کو سماجی تحفظ کے ساتھ مالی امداد بھی فراہم کرے گا۔ اب تک تاجروں کے مسائل سننے اور ان کو حل کرنے کے لیے کوئی خاص پلیٹ فارم موجود نہیں تھا۔ اب یہ بورڈ حکومت اور تاجروں کے درمیان مضبوط چینل کے طور پر کام کرے گا۔انہوں نے کہا کہ حکومت نے تاجروں کی فلاح و بہبود کے لیے 10 کروڑ روپے کا فنڈ بھی مختص کیا ہے ۔ وزیر صنعت اس بورڈ کے چیئرمین ہوں گے ۔ اس کے علاوہ اس کے کل 15 ممبران ہوں گے جن میں سے 9 افراد کاروباری دنیا سے وابستہ اشخاص ہوں گے اور 6 افسران کے طور پر شامل ہوں گے ۔انہوں نے کہا کہ دہلی کے تقریباً آٹھ لاکھ تاجر اس بورڈ سے براہ راست فائدہ اٹھائیں گے ۔ حکومت تاجروں کے مفادات کے تحفظ کے لیے پابند عہد ہے اور یہ بورڈ تاجروں کے مسائل کو حل کرنے میں اہم کردار ادا کرے گا۔
ریکھا گپتا نے کہا کہ دہلی کے تاجر اب تنہا نہیں ہیں۔ حکومت ان کے ساتھ کھڑی ہے ۔ کاروبار بوجھ نہیں بلکہ کاروبار کے ذریعے ملک کی تعمیر میں مدد کرتے ہیں۔ انہوں نے کہا، “میں دہلی کے تمام تاجروں کو مبارکباد دیتی ہوں کہ اب وہ حکومت کا حصہ بن کر پالیسی کے فیصلے کرنے کے قابل ہو جائیں گے ۔”دہلی کی ڈبل انجن حکومت نے راجدھانی کے تاجروں کے لیے ایک تاریخی فیصلہ لیا ہے- “دہلی ویاپری کلیان بورڈ” کے قیام کو منظوری دے دی گئی ہے۔یہ بورڈ نہ صرف تاجروں کی فلاح و بہبود، سماجی تحفظ اور معاشی طور پر بااختیار بنانے کے لیے کام کرے گا، بلکہ کاروبار اور سرمایہ کاری میں آسانی کے لیے دہلی کو ملک کا سب سے سازگار دارالحکومت بنانے میں بھی سنگ میل ثابت ہوگا۔
اس بورڈ کے ذریعے چھوٹے سے بڑے تاجروں تک سبھی کے مسائل کا مستقل حل یقینی بنایا جائے گا۔حکومت اور تاجر برادری کے درمیان فعال بات چیت کی جائے گی۔صحت، انشورنس، مالی امداد اور دیگر سماجی تحفظ کی اسکیموں کے فوائد منظم طریقے سے تاجروں تک پہنچیں گے اور کاروباری عمل کو آسان، شفاف اور بروقت بنایا جائے گا۔یہ 15 رکنی بورڈ وزیر صنعت کی سربراہی میں کام کرے گا۔ اس میں ایم سی ڈی، لیبر، ٹیکس اور صنعت کے محکموں کے اہلکار شامل ہوں گے۔ اس کے علاوہ مختلف شعبوں سے 9 غیر سرکاری تاجر نمائندے بورڈ میں شرکت کریں گے۔دہلی کو کاروبار دوست، شفاف اور روزگار پیدا کرنے والا دارالحکومت بنانے کا ہماری حکومت کا عزم واضح ہے۔