دیوبند:دس یوم قبل تلہڑی بزرگ میں نہنگ سکھ سماج کے دو حقیقی بھائیوں کے ساتھ ہونے والی مارپیٹ کے معاملہ میں تین ملزمان کو گرفتار کر لیا ہے ۔حراست میں لئے گئے تینوں ملزمان کو قتل کرنے کی کوشش کی جرم میں جیل بھیج دیا گیا ہے ۔واضح ہوکہ گزشتہ 7جون کو نکوڑ کے باشندہ دو حقیقی بھائی ہرکریت سنگھ اور پرم جوت سنگھ تلہیڑی بزرگ دوالینے کے لئے آئے تھے اس دوران بائک ٹکرا جانے کے تنازعہ میں ان کی کئی نوجوانوں سے تلخ کلامی ہوگئی تھی جس کے بعد تقریباً 20؍نوجوانوں نے دونوں بھائیوں کو کرکٹ کے بیٹ اور اسٹمپ سے ان پر حملہ کردیا تھا ۔جس کے نتیجہ میں دونوں بھائی بری طرح زخمی ہوگئے تھے ۔
دونوں زخمیوں نے الزام عائد کرتے ہوئے کہا تھا کہ مارپیٹ کے دوران ان کی پگڑیاں اتاری گئیں اور ان کی تلواروکرپان چھیننے کی کوشش کی گئی ۔پولیس نے پرم جوت سنگھ کی تحریر پر حملہ آوروں کے خلاف مقدمہ درج کرلیا تھا ،ملزمان کی گرفتاری نہ ہونے سے ناراض سکھ سماج کے لوگوں نے احتجاج بھی کئے ۔سکھ سماج کی زبردست ناراضگی اور احتجاج کے بعد ایس ایس پی سہارنپور نے اس معاملہ کی سنگینی کو دیکھتے ہوئے ملزمان کی گرفتاری کے لئے احکامات جاری کئے تھے ۔جس کے بعد ایس پی دیہات مینک پاٹھک ،دیو بند کے سی او ابھیتیش سنگھ اور کوتوالی انچارج کپل دیو کی مشترکہ کو ششوں سے مخبر کی اطلاع پر دیوبند پولیس کی ٹیم نے تین ملزمان مہیندر عرف منیش عرف کاکا ولد شیو کمار ،روہت ولد پون کمار اور نتن ولد روندر باشندگان تلہیڑی بزرگ ساکھن نہر کے قریب سے گرفتار کرلیا ۔پولیس کا کہنا ہیکہ ملزمان کی نشاندہی پر مارپیٹ میں استعمال ہونے والے دو کرکٹ بیٹ اور دو اسٹمپ برآمد کرلئے گئے ہیں ۔گرفتار ملزمان کے خلاف ضروری قانونی کارروائی کرنے کے بعد انہیں عدالت میں پیش کیا گیا بعد ازاں عدالتی حکم پر انہیں جیل بھیج دیا گیا ۔پولیس کا کہنا ہے کہ دیگر ملزمان کو بھی جلد گرفتار کرلیا جائے گا ۔گرفتار کرنے والے پولیس ٹیم ایس آئی لوکیش سنگھ رانا ،ایس آئی روندر کما ر ،ہیڈ کانسٹبل روندر ،وویک ،یوگیندر اور نریندر پرمشتمل تھی ۔

رام پور:رضا لائبریری اور میوزیم جو 1774 میں قائم کی گئ تھی وہ اب جلد ہی عالمی معیار کا تعلیمی مرکز بن جائے گا۔ یہاں دنیا بھر کی زبانیں پڑھائی جائیں گی۔ اس مقصد کو حاصل کرنے کے لئے رضا لائبریری جو اس وقت رام پور قلعہ کے پانچ ایکڑ پر محیط ہےکو وسیع کیا جائے گا تاکہ قلعہ کے پورے 43 ایکڑ پر محیط ہو جائے۔مخطوطات کے علاوہ لائبریری میں پینٹنگز، خطاطی اور بہت سے دوسرے نادر خزانے بھی محفوظ ہیں۔لائبریری فن، تعلیم اور ثقافتی ورثہ کے تحفظ کے لیے ایک بین الاقوامی مرکز کے طور پر ترقی کرنے کے لیے تیار ہے۔
علم اور ثقافت کی ان متحرک روایات کو عالمی سطح پر پھیلانے اور فروغ دینے کے لئےاس سلسلے میں سینٹرل پبلک ورکس ڈپارٹمنٹ (سی پی ڈبلیو ڈی) اور آئی آئی ٹی روڑکی نے لائبریری کی عمارتوں کا سیکورٹی آڈٹ کرایا ہے اور لائبریری ڈائریکٹر ڈاکٹر پشکر مشرا اور ضلع انتظامیہ کو رپورٹ پیش کی ہے۔ دو سرکاری اسکولوں کو کیمپس سے منتقل کر دیا گیا ہے۔محکمہ تعمیرات عامہ، محکمہ بجلی، محکمہ باغ بانی، اور ایل آئی یو کے دفاتر کی منتقلی کے نوٹس بھی حال ہی میں جاری کیے گئے ہیں۔محکمہ ریونیو سے نو آبجیکشن سرٹیفکیٹ حاصل کرنے کا عمل شروع ہو گیا ہے۔رضا لائبریری کو مرکزی وزارت ثقافت سے مالی امداد ملتی ہے۔کابینہ کی منظوری کے بعد لائبریری میں توسیع کی جائے گی۔ لائبریری کی نئی شکل اور افعال کا تفصیلی مسودہ ایک یادو دن میں جاری ہونے کی امید ہے۔
واضح رہےکہ رضا لائبریری میں 17000 مخطوطات موجود ہیں۔ 7ویں سے 19ویں صدی تک کے قرآن کے 500 سے زائد نسخے سونے سے کندہ اور مزین ہیں۔ 7ویں صدی میں اونٹ کی کھال پر ابتدائی کوفی رسم الخط میں لکھا گیا ایک منفرد قرآن، یہاں کے اہم ترین خزانوں میں سے ایک ہے۔آپ کو یاد ہوگا قرآنِ کریم کے دو ہی نسخے دنیامیں موجود ہیں۔ ایک رضا لائبریری اور دوسرا عراق میں ہے۔ رامائن کا ایک بہت ہی نایاب فارسی ترجمہ مثال کے طور پرموجود ہے۔

(پی این این)
گورکھپور:وزیر اعلیٰ یوگی آدتیہ ناتھ نے ’جنتا درشن‘ میں آئے لوگوں کو یقین دلایا کہ مالی امداد ہو یا مکان (آواس)، حکومت ہر ضرورت مند کے ساتھ کھڑی ہے۔انہوں نے علاج کے لیے مالی امداد کی فریاد کرنے والوں سے کہا کہ آپ ایسٹیمیٹ بنوائیے اور مریض کا خیال رکھیے، علاج کی فکر حکومت پر چھوڑ دیجیے۔ وہیں مکان کے مطالبے کو لے کر پہنچنے والے فریادیوں کو بھی وزیر اعلیٰ نے یقین دلایا کہ حکومت ہر ضرورت مند کو مسلسل پردھان منتری/مکھیہ منتری رہائشی اسکیم کے تحت مکان فراہم کر رہی ہے۔
وزیر اعلیٰ نے گورکھپور قیام کے دوران لگاتار دوسرے دن پیر کی صبح گورکھ ناتھ مندر میں منعقدہ ’جنتا درشن‘ میں لوگوں سے ملاقات کر کے ان کے مسائل سنے۔ علاج کے لیے مالی امداد کی گوہار لے کر پہنچنے والے لوگوں سے انہوں نے کہا کہ حکومت علاج میں پوری مدد کرے گی۔ اس کے لیے ضرورت مند لوگوں کا آیوشمان کارڈ بنوایا جائے گا، پھر بھی ضرورت پڑی تو اختیاری فنڈ سے امداد فراہم کی جائے گی۔ وزیر اعلیٰ نے افسران کو ہدایت دی کہ ہر ضرورت مند اور اہل شخص کا آیوشمان کارڈ بنوانا یقینی بنایا جائے، تاکہ انہیں علاج کے لیے پریشان نہ ہونا پڑے۔
گورکھ ناتھ مندر کے احاطے میں مہنت دگوجے ناتھ اسمرتی بھون کے باہر منعقدہ جنتا درشن کے دوران سی ایم یوگی تقریباً 200 لوگوں سے ملے۔ انہوں نے لوگوں کے پاس جا کر مسائل سنے، ان کی درخواستی چٹھیوں کا جائزہ لیا اور شکایات کا نوٹس لیا۔ وزیر اعلیٰ نے لوگوں کو بھروسہ دلایا کہ کسی کو پریشان ہونے کی ضرورت نہیں ہے، حکومت ہر ضرورت مند کے ساتھ کھڑی ہے۔
کچھ لوگوں نے پولیس اور ریونیو (محصولات) سے جڑے معاملات میں تاخیر کی شکایت کی، تو سی ایم نے ڈی ایم کو فوری طور پر معاملے کا نوٹس لے کر کارروائی کرنے کی ہدایت دی۔ سی ایم یوگی نے مکان، تعلیم، علاج، بجلی، ریونیو، پولیس وغیرہ سے جڑے الگ الگ معاملات کے تصفیے کے لیے متعلقہ انتظامی اور پولیس افسران کو درخواستیں بھیجتے ہوئے ہدایت دی کہ تمام مسائل کا حل وقت کے اندر، غیر جانبدارانہ اور اطمینان بخش ہونا چاہیے۔