شمام پیس فاؤنڈیشن نے مشاعرے اور مذاکرے کی سجائی میز

لکھنؤ:مرتبہ شہیدوں کاعنوان قائم کرکے شمام پیس فاؤنڈیشن نے مذا کرے و مشاعرے کی میز سجائی عالم کلاسز واقع بہار خاں کالونی، برمہا نگر، کھدرا،لکھنؤ میں صدارت استاد الشعراء مرزا شارق لاہر پوری نے کی اور اپنے خطاب میں کہا عنوانات کے تحت ہونے والے مشاعرے اس اعتبار سے اہم ہیں کہ اس میں یکسانیت نہیں ہوتی مصرعے لڑنے کا امکان کم رہتا ہے ۔
مرتبہ شہیدوں کا ایسا عنوان ہے کہ جس کا حق ادا کرنے کے لئے شعراء کو چند شعر میں بات کہنے کے بجائے نظم کا رخ کرنا ہوگا، مطالعے کی ضرورت پیش آئے گی مشاہدہ اور مشاقی کافی نہ ہوگی ناظم پروگرام رضوان احمد فاروقی نے طویل نظم پیش کی اور کہا شہادت مومن کی معراج ہے یہ تمنا نبی کریم صلی اللہ علیہ وسلم کو تھی اور بعد والوں کو بھی! مہمان خاص ڈاکٹر سنجے مصرا شوق کے مطابق اس طرح کی نورانی محفلوں میں شرکت سے انھیں سکون ملتا ہے
شہر میں بیک وقت کئی پروگرام ہونے کے سبب شعراء کی تعداد کم مگر اشعار خوب خوب سننے میں آئے جواں سال شاعر عتیق ارحم نے منقبتی کلام سے بامقصد آغاز کیا
منتخب اشعار درج ذیل ہیں:
صاحب دائمی زندگی السلام
اے حسین اہل بیت نبی السلام
مرزا شارق لاہر پوری
دریا ورق ورق ہے تری بے بسی کا ذکر
اور پیاس کی لغت میں ہے جلوہ حسین کا
ڈاکٹر سنجے مصرا شوق
قربان جائیے کہ خود آقا نے یہ کہا
میں ہوں حسینی اور مری جان ہیں حسین
ڈاکٹر زبیر انصاری
شہید ہوتو گئے جنگ میں جناب حسین
مگر ہیں اپنے مقاصد میں کامیاب حسین
عرفان لکھنوی
مدحت شہیداں پر اتفاق ہے سب کا
مرتبہ سمجھ لیتے کاش ہم شہیدوں کا
رضوان فاروقی
ہم کو تعداد کا ہے علم ڈراؤ نہ ہمیں
ذکر میں اب بھی بہتر ہیں ہزاروں نہیں ہیں
عباد شیخ
ہم کیا بیاں کریں گے حقیقت یہ ہے خلیق
اللہ جانتا ہے شہیدوں کا مرتبہ
ڈاکٹر خلیق الرحمان
کنوینر پروگرام ڈاکٹر زبیر انصاری نے شرکا کا شکریہ ادا کیا، شہاب الدین ایڈوکیٹ نے ضیافت کا اہتمام کیا اور جولائی کے آخری اتوار کو بعنوان مہک اردو کی مشاعرے کا اعلان کیا۔
رضوان احمد فاروقی 894859ڑ072