(پی این این)
پرتاپ گڑھ:سماج وادی پارٹی (ایس پی) کے کارکنوں نے مہنگائی، بے روزگاری اور نیٹ پیپر لیک ہونے کے خلاف ہفتہ کو یہاں سڑک پر اتر کر زبردست مظاہرہ کیا۔
پارٹی کے ضلعی دفتر سے کلکٹریٹ تک ایس پی کارکنوں نے پیدل مارچ نکالا۔ اس دوران امبیڈکر چوراہے پر ایس پی کارکنوں نے دھرنا دیا اور مہنگائی، بے روزگاری اور پیپر لیک معاملے کو لے کر نعرے بازی کی۔ بعد میں کلکٹریٹ پہنچ کر انہوں نے گورنر کے نام ایک میمورنڈم ڈسٹرکٹ مجسٹریٹ کو سونپا۔ایس پی کے رکن پارلیمنٹ ایس پی پٹیل، رانی گنج کے ایم ایل اے آر کے ورما اور پٹی کے ایم ایل اے رام سنگھ پٹیل سمیت سینکڑوں کی تعداد میں ایس پی لیڈر اور کارکن اس مظاہرے میں شامل ہوئے۔

(پی این این)
دیوبند:دیوبند کے محلہ پٹھان پورہ،نئی کالونی میں جامعۃ القدسیت ایجوکیشن سمیتی کے زیراہتمام آج ایک مفت میڈیکل کیمپ کا انعقاد کیا گیا۔ جس میں آئے تمام مریضوں کا معائنہ کیا گیا اور انہیں مفت ادویات فراہم کی گئیں۔
اس دوران آنکھوں کا معائنہ بھی کیا گیا اور چشمے اور آئی ڈراپس تقسیم کی گئی۔ کیمپ سے تقریباً 240 مریضوں نے استفادہ کیا۔ اس موقع پرجامعۃ القدسیات ایجوکیشن سمیتی کے سیکرٹری قاری عامر عثمانی نے کہاکہ غریب اور ضرورتمند مریضوں کو طبی خدمات فراہم کرنا عظیم کار خیر ہے ،ہماری تنظیم وقتاً فوقتاً اس طرح کے کار خیر میں حصہ لیتی ہے اور آئندہ بھی یہ سلسلہ جاری رہے گا۔
اس دوران مینجمنٹ ڈائریکٹر مقیم عباسی، ڈاکٹر نوید گوڑ، ڈاکٹر حسنہ قریشی، ڈاکٹر اسماء ملک، ڈاکٹر شمعون گوڑ، ڈاکٹر ثاقب، ماہ نور اور انشاء انصاری سمیت دیگر موجود رہے۔

(پی این این)
علی گڑھ: علی گڑھ مسلم یونیورسٹی کے مختلف شعبہ جات، مراکز، اسکولوں اور اداروں نے عالمی یومِ ماحولیات کے موقع پر شجرکاری مہمات، بیداری پروگراموں اور ماحولیاتی سرگرمیوں کا اہتمام کیا اور ماحولیاتی پائیداری اور مثبت موسمیاتی اقدامات کے تئیں اپنے عزم کا اعادہ کیا۔سروجنی نائیڈو ہال کی جانب سے جواہر لعل نہرو میڈیکل کالج میں شعبہ ریڈئیشن آنکولوجی، ایکو کلب، شعبہ آراضی و باغات اور سماجی تنظیم وِنگز آف ڈیزائر کے اشتراک سے شجرکاری مہم منعقد کی گئی۔ اس دوران کینسر او پی ڈی کے اطراف 50 پودے لگائے گئے۔
ہال کی پرووسٹ پروفیسر عروس الیاس کی نگرانی اور ڈاکٹر رقیہ افروز کی نظامت میں یہ پروگرام منعقد ہوا۔ پرنسپل و چیف میڈیکل سپرنٹنڈنٹ جے این میڈیکل کالج پروفیسر انجم پرویز مہمانِ خصوصی تھے، جبکہ شعبہ آراضی و باغات کے ممبر انچارج پروفیسر انور شہزاد نے مہمانِ اعزازی کی حیثیت سے شرکت کی۔ ڈین فیکلٹی آف میڈیسن پروفیسر محمد خالد، شعبہ وائلڈ لائف سائنسز کے پروفیسر عفیف اللہ خان اور شعبہ ریڈئیشن آنکولوجی کے چیئرمین محمد اکرم بھی بطور خاص موجود تھے۔ کینسر سے صحت یاب ہونے والے افراد نے بھی شجرکاری مہم میں حصہ لیا، جس سے اس مہم کو تقویت ملی۔نیشنل سروس اسکیم (این ایس ایس) نے ویمنس کالج کے اشتراک سے ایک لیکچر اور شجرکاری مہم کا انعقاد کیا۔
مہمانِ خصوصی ڈاکٹر فائزہ عباسی نے کچرے کے بندوبست اور ماحولیاتی اخلاقیات کے مسائل پر روشنی ڈالی، جبکہ ویمنس کالج کے پرنسپل پروفیسر مسعود انور علوی نے فطرت کے تئیں انفرادی ذمہ داری کی اہمیت پر زور دیا۔ پروفیسر رومانہ صدیقی، ڈاکٹر منصور عالم صدیقی، ڈاکٹر فوزیہ فریدی اور ڈاکٹر ندا فاطمہ نے بھی خطاب کیا۔ذاکر حسین کالج آف انجینئرنگ اینڈٹکنالوجی کے شعبہ سول انجینئرنگ نے دی انسٹی ٹیوشن آف انجینئرز (انڈیا) اور این ایس ایس کے تعاون سے شجرکاری مہم اور موسمیاتی اقدامات سے متعلق بیداری پروگرام منعقد کیا۔ پروگرام کی صدارت پروفیسر امجد مسعود نے کی۔ اس موقع پر پروفیسر اتل کمار متل، پروین گپتا، ڈاکٹر وشوناتھ شرما، پروفیسر عتیق احمد اور ڈاکٹر انور علی خان موجود تھے۔ پروفیسر سہیل ایوب، ڈاکٹر عبدالجبار، انجینئر اے کے جھنجھن والا اور پروفیسر ندیم خلیل نے پروگرام کو مربوط کیا، جبکہ ڈاکٹر محسنہ احمد نے نظامت کے فرائض انجام دیے۔اسی کڑی میں شعبہ معاشیات میں صدر شعبہ پروفیسر شہروز عالم رضوی کی قیادت میں فضائی آلودگی کو کم کرنے میں مددگار پودے لگائے گئے۔ اس موقع پر پروفیسر ایس ایم جاوید اختر، پروفیسر محمد طارق، پروفیسر امتیاز حسنین اور جامعہ ملیہ اسلامیہ کی پروفیسر لبنیٰ صدیقی موجود رہے۔ شعبہ کی جانب سے ماحولیاتی بیداری کے لیے پوسٹر سازی اور نعرہ نویسی کے مقابلے بھی منعقد کئے گئے۔
دوسری طرف شعبہ ارضیات نے پروفیسر راشد عمر کی قیادت میں، جب کہ کمیونٹی کالج نے پروفیسر مجیب احمد انصاری کی نگرانی میں، اور اے بی کے ہائی اسکول (گرلز) نے ڈاکٹر صبا حسن کی رہنمائی میں شجرکاری مہمات کا انعقاد کیا۔ طلبہ اور عملے کے اراکین نے حیاتیاتی تنوع کے تحفظ، موسمیاتی ذمہ داری اور پائیدار طرزِ زندگی سے متعلق سرگرمیوں میں حصہ لیا۔کالج آف پیرا میڈیکل سائنسز نے بھی پرنسپل پروفیسر قاضی احسان علی کی قیادت میں شجرکاری اور ماحولیاتی بیداری پروگرام منعقد کیا، جبکہ شعبہ زولوجی نے پروفیسر قدسیہ تحسین کی صدارت میں اسی نوعیت کی سرگرمیوں کا اہتمام کیا، جن میں حیاتیاتی تنوع کے تحفظ اور ماحولیاتی پائیداری کی اہمیت کو اجاگر کیا گیا۔