(پی این این)
حاجی پور؍ویشالی:ویشالی ضلع میں سڑک حادثات کے خوفناک اعداد و شمار کو لے کر کانگریس کے ضلعی صدر رنجیت پنڈت اور کانگریس لیڈر محمد صدام حسین نے سینئر سپرنٹنڈنٹ آف پولیس شبھانک مشرا سے ملاقات کی۔ اس کے علاوہ ضلع مجسٹریٹ اور ضلعی ٹرانسپورٹ افسر کو خط دے کر سڑک تحفظ کے لیے ضروری اقدامات کرنے کا مطالبہ کیا۔
کانگریس کے ضلعی صدر رنجیت پنڈت نے بتایا کہ ٹریفک تھانہ، حاجی پور سے موصولہ سرکاری معلومات کے مطابق 12 اپریل 2025 سے جولائی 2026 تک سڑک حادثات کے 444 مقدمات درج کیے گئے۔جن میں 464 افراد کی موت ہوئی اور 44 افراد زخمی ہوئے۔ اس طرح اوسطاً ہر ماہ تقریباً 29 حادثات اور 30 اموات درج ہوئیں۔
رنجیت پنڈت نے کہا کہ اتنے کم عرصے میں 464 افراد کی موت کا اعداد و شمار ضلع میں سڑک تحفظ کے نظام کے لیے انتہائی سنگین انتباہ ہے۔ کانگریس رہنما محمد صدام حسین نے کہا کہ ٹریفک تھانے میں حادثات کا اندراج 12 اپریل 2025 سے شروع ہوا ہے۔ اس لیے یہ اعداد و شمار ضلع میں ہونے والے تمام حادثات کی طویل مدتی تصویر پیش نہیں کرتے۔
انہوں نے گزشتہ 10 سے 20 برسوں کے تھانہ اور متعلقہ محکموں کے اعداد و شمار جمع کرکے سال وار اور سڑک وار حادثات اور اموات کی حقیقی صورت حال تیار کرنے کا بھی مطالبہ کیا۔ رنجیت پنڈت نے خصوصی طور پر حاجی پور-جنداہا، حاجی پور-مہنار، حاجی پور-مہوا اور حاجی پور-لال گنج سڑکوں کے تنگ حصوں کا سڑک تحفظ اور ٹریفک کی گنجائش کے حوالے سے آڈٹ کرانے اور ضرورت کے مطابق ان سڑکوں کو چوڑا کرنے کی منصوبہ بندی کرنے کا مطالبہ کیا۔انہوں نے جنداہا سے ارنیا تک مرکزی سڑک کی خستہ حالی دور کرنے اور وہاں سے آبی جماؤ ختم کرنے کا مطالبہ کیا۔ اس کے ساتھ ہی دیسری کے غازی پور چوک، مہنار کے مدن چوک اور جنداہا و مہوا کے گاندھی چوک پر ٹریفک جام کے مسئلے کا مستقل حل نکالنے کی بھی اپیل کی۔
انہوں نے کہا کہ حادثے کے بعد کارروائی کرنے سے زیادہ ضروری حادثات کو روکنا ہے۔ اس کے لیے حادثات کے لحاظ سے حساس مقامات (بلیک اسپاٹس) کی نشاندہی، تجاوزات کا خاتمہ، غیر قانونی پارکنگ پر روک، مناسب روشنی اور سڑکوں پر نشانات کی فراہمی کے ساتھ اہم تنگ سڑکوں کو چوڑا کرنے کے لیے وقت مقرر کرکے کارروائی کرنا ضروری ہے۔
رنجیت پنڈت اور صدام حسین نے کہا کہ اگر سڑک تحفظ اور حادثات کی روک تھام کے لیے جلد ٹھوس اقدامات نہیں کیے گئے تو کانگریس عوامی مفاد میں تحریک چلانے پر مجبور ہوگی۔
ویشالی میں 16 ماہ کے دوران 444 سڑک حادثات، 464 افراد کی موت
متعلقہ خبریں
