(پی این این)
سارن:سارن ضلع کے گڑکھا تھانہ علاقے کے بھینس مارا گاؤں کے قریب منگل کی دیر رات ایک بے قابو ٹرک کی زد میں آنے سے ٹیمپو پر سوار چار افراد کی موت ہوگئی، جبکہ دو دیگر شدید زخمی ہوگئے۔ حادثے کے بعد جائے وقوع پر افراتفری مچ گئی۔ زخمیوں کو فوری طور پر بھینس مارا واقع شری نواس اسپتال میں داخل کرایا گیا، جہاں ان کی حالت نازک بتائی جارہی ہے۔
موصولہ اطلاعات کے مطابق، دیر رات ایک بے قابو ٹرک نے ٹیمپو کو اپنی زد میں لے لیا۔ ٹکر اتنی شدید تھی کہ ٹیمپو بری طرح تباہ ہوگیا۔ حادثے میں دو افراد کی موقع پر ہی موت ہوگئی، جبکہ چار افراد شدید زخمی ہوگئے۔ ان میں سے دو زخمیوں نے اسپتال میں علاج کے دوران دم توڑ دیا۔ اس طرح حادثے میں ہلاک ہونے والوں کی تعداد چار ہوگئی۔حادثے کے بعد جائے وقوع پر چیخ و پکار مچ گئی۔ اسی دوران وہاں سے گزر رہی ڈائل 112 کی پولیس گاڑی میں موجود انکت کمار سنگھ نے فوری مستعدی کا مظاہرہ کیا۔ انہوں نے زخمیوں اور بچوں کو اسپتال پہنچانے میں مدد کی۔
حادثے کے بعد زخمیوں کو اسپتال لے جانے کی ان کی ویڈیو سوشل میڈیا پر تیزی سے وائرل ہورہی ہے۔ ان کی مستعدی اور فوری کارروائی کی بھی ستائش کی جارہی ہے۔ادھر، حادثے میں جان گنوانے والے افراد کی شناخت کی جارہی ہے۔ پولیس معاملے کی تحقیقات میں مصروف ہے۔ حادثے کے بعد علاقے میں سوگ کی فضا ہے۔
سارن میں اندوہناک سڑک حادثہ، بے قابو ٹرک کی ٹیمپو سے ٹکر،4 افراد ہلاک، 2 زخمی، گاڑی کاٹ کر نکالی گئی لاشیں
