(پی این این)
پریاگ راج: پریاگ راج میں کانگریس لیڈر راہل گاندھی کے’چھاتروں کی گونج‘ پروگرام میں شرکت کرنے والے طلباء نے ردعمل کا اظہار کیا۔ کچھ نے نوجوانوں کے مسائل پر ان کی توجہ کی تعریف کی جبکہ دوسروں نے سوال کیا کہ کیا ان کے وعدے حقیقت میں پورے ہوں گے۔
کے پی گراؤنڈ میں ہونے والے اس پروگرام میں ہزاروں طلباء نے شرکت کی، جہاں گاندھی نے ہندوستان کے نوجوانوں سے متعلق مسائل پر بات کی، بشمول روزگار، مسابقتی امتحانات، اور معاشی طور پر کمزور پس منظر کے طلباء کو درپیش چیلنجز وغیرہ۔ہمانشو ترپاٹھی الہ آباد یونیورسٹی سے پوسٹ گریجویٹ ہیں اور قومی اہلیت کے امتحان کی تیاری کر رہے ہیں، انہوں نے کہا کہ گاندھی نے طلباء کے مسائل کو زور سے اٹھایا، لیکن اس بات کی کوئی گارنٹی نہیں تھی کہ اگر وہ اقتدار میں آئے تو وہ انہیں حل کریں گے۔
رشمی یادو مسابقتی امتحانات کی تیاری کر رہی ہیں،انہوں نے کہا کہ وہ طلباء کے مستقبل کے لیے گاندھی جی کے وژن کو سمجھنے کے لیے اس تقریب میں شریک ہوئیں۔ انہوں نے کہا کہ تمام سیاستدان اسٹیج سے بڑے بڑے وعدے کرتے ہیں لیکن اقتدار میں آتے ہی ان کی ترجیحات بدل جاتی ہیں۔ایک اور طالب علم راکیش موریہ نے کہا کہ راہل گاندھی نے اپنے الفاظ سے طلبہ کے دل جیت لیے۔ انہوں نے کہا کہ غریب گھرانوں کے بچوں کو اپنی تعلیم مکمل کرنے میں بڑی مشکلات کا سامنا کرنا پڑتا ہے لیکن وہ نوکری کی آسامیاں آنے کا انتظار کرتے رہتے ہیں۔ بنارس ہندو یونیورسٹی کے ایک طالب علم ششی پرکاش نے کہا کہ کانگریس لیڈر آج کے نوجوانوں کی تشویش کو سمجھ چکے ہیں۔ انہوں نے کہا کہ وہ طلبا کے درپیش مسائل کو اچھی طرح سمجھتے ہیں۔ جنتر منتر واقعہ کے بعد راہل گاندھی سے لوگوں کی توقعات بڑھ گئی ہیں۔
تقریب کے دوران گاندھی نے اسٹیج پر کئی طلباء سے بات چیت کی۔ انہوں نے مرکزی اسٹیج سے دور بیٹھے طلباء سے بھی بات کی اور ان کے تحفظات کو سمجھنے کی کوشش کی۔یہ واقعہ ایک ایسے وقت میں سامنے آیا ہے جب نوجوانوں کے مسائل اور مقابلہ جاتی امتحانات کو اتر پردیش میں سیاسی توجہ حاصل ہو رہی ہے۔
گاندھی نے روزگار کے مواقع، بھرتی کے عمل اور نوجوانوں کے لیے مناسب مواقع کی کمی جیسے مسائل پر سوال اٹھانے کے لیے طلبہ اور نوجوانوں پر مرکوز واقعات کو تیزی سے استعمال کیا ہے۔بارش کے بعد کے پی گراؤنڈ میں کئی مقامات پر پانی جمع ہونے اور کیچڑ کے باوجود طلبہ کی بڑی تعداد نے پروگرام میں شرکت کی۔

(پی این این)
دیوبند:دھتولی مغل مرسیفل اکیڈمی دھتولی مغل میں جمعیۃ علماء کی انتخابی میٹنگ کا انعقاد عمل میں آیا جس کی صدارت جامعۃ الشیخ عبدالستار نانکہ گندیوڑہ کے مہتمم الحاج فضل الرحمن رحیمی نانکوی نے کی۔ میٹنگ میں بطور مشاہد جمعیۃ علماء ضلع سہارنپور کے ناظم مولانا مفتی عطاء الرحمن جمیل قاسمی نانکوی نے شرکت کی۔ پروگرام کا باقاعدہ آغاز قاری کی تلاوتِ کلامِ پاک سے ہوا۔
اس موقع پر خطاب کرتے ہوئے مولانا مفتی عطاء الرحمن جمیل قاسمی نانکوی نے کہا کہ جمعیۃ علماء نے ہمیشہ ملک و ملت کی رہنمائی دینی شعور کی بیداری، اصلاحِ معاشرہ، عوامی مسائل کے حل اور مظلوموں کی آواز بلند کرنے میں اپنا اہم کردار ادا کیا ہے۔ علماء کی یہ جماعت معاشرے میں دینی اقدار کے تحفظ، نئی نسل کی دینی تربیت اور عوام کو اسلامی تعلیمات سے جوڑنے کے لیے مسلسل سرگرمِ عمل ہے۔
مفتی عطاء الرحمن جمیل قاسمی نانکوی نے کہا کہ جمعیۃ علماء کا مقصد صرف تنظیمی سرگرمیوں تک محدود نہیں بلکہ اس کا بنیادی مقصد معاشرے میں خیر، اصلاح، اخوت، اتحاد اور دینی شعور کو فروغ دینا ہے۔ انہوں نے ذمہ داران پر زور دیا کہ وہ اپنے اپنے علاقوں میں عوام سے مسلسل رابطہ رکھیں دینی و اصلاحی پروگرام منعقد کریں اور معاشرے کی حقیقی ضرورتوں کو سمجھتے ہوئے خدمت کا دائرہ وسیع کریں۔انہوں نے مزید کہا کہ تنظیمیں اسی وقت مضبوط ہوتی ہیں جب ان کے ذمہ داران اخلاص، باہمی مشاورت، نظم و ضبط اور خدمتِ خلق کے جذبے کے ساتھ کام کریں۔ دھتولی یونٹ کی تشکیل عمل میں لائی گئی۔
انتخاب کے بعد مولانا صداقت کو سرپرست، مولانا محمد رفاقت مظاہری کو صدر، جبکہ قاری محمد شرافت مظاہری اور قاری محمد راغب مظاہری کو بالترتیب نائب صدر منتخب کیا گیا۔اسی طرح قاری محمود کو جنرل سیکرٹری، مولانا محمد شوقین مظاہری کو سیکرٹری، حافظ محمد انصار کو خزانچی اور مولانا محمد طلحہ ندوی کو ناظم منتخب کیا گیا۔اراکینِ عاملہ میں قاری محمد شرافت مظاہری، مولانا محمد رفاقت مظاہری، مولانا محمد شوقین مظاہری، قاری محمد راغب مظاہری، قاری محمد شاہد، مولانا محمد طلحہ ندوی، حافظ محمد صیاد، حافظ محمد فرقان، قاری محمد منور حسین، حافظ عبدالقادر، حافظ محمد انصار، مولانا عطاء الرحمن قاری محمد افشان اور حافظ محمد موسیٰ حافظ عیسی حافظ عطاء الرحمن قاری یوسف قاری تیمور قاری شاہد کو شامل کیا گیا۔اس موقع پر قاری محمد حسین کاشفی، ناظم جمعیت علماء بہڑہ سندل سنگھ، مولانا محمد احمد ندوی، محمد سلمان محمد سفیان قاری زبیر عالم ستاری پردھان راؤ محبوب قاری رضوان سمیت متعدد علماء، ائمہ، ذمہ داران اور معززین نے شرکت کی۔

(پی این این)
دیوبند:یوم انقلاب کے موقع پر کانگریس کے دفترپر صلاح ومشورہ سے متعلق ایک مجلس منعقد کی گئی ،اس مجلس کی دوران جنگ آزادی کے شہیدوں اور مجاہدین جنگ آزادی کے قربانیوں ،ہمت وحوصلہ اور ان کی وطن پرستی کوسلام پیش کرتے ہوئے ان کے رہنما اصولوں کو اپنی زندگی میں شامل کرنے پر زور دیا گیا ۔
تفصیل کے مطابق گورودوارہ روڑ پر واقع کانگریس کے دفترپر بھارت چھوڑو آندولن کی برسی کے موقع پر منعقد کئے جانے والے سیمینار سے خطاب کرنے والے شہر صدر منیش تیاگی نے کہا کہ اس ملک کی تاریخی اہمیت ،مجاہدین جنگ آزادی کی بے مثال قربانیوں اور موجودہ وقت میں ہندوستان میں جمہوری حقوق، آئین اور قومی اتحاد کے تئیں ہم سب کی ذمہ داری ہے کہ آزادی کی ہم سب حفاظت کریں ۔
اس موقع پر صوبائی سکریٹری اشوک سینی ،سینئر کانگریسی لیڈر حاجی شوکت ،دھرم پال جوشی ،صوبائی جنرل سکریٹری سونوپٹھان ،ضلع نائب صدر نتن شرما ، شاذیہ ناز ،ضلع نائب صدر اکرام خان ،نیرج کپل ،یونس صدیقی ،یوسف انصاری ،راکیش موہن شرما ،جمال احمد ،نصیب خان شاہ سمیت دیگر پارٹی کارکنان موجود رہے ۔سیمینار کی صدارت منیش تیاگی نے کی اور نظامت کے فرائض سیوا دل کے ضلع صدر عمران قریشی نے انجام دیئے ۔