ایک بار پھر احسان الحق رضا کے ہاتھ میں طلبہ جے ڈی یو کی کمان،

(پی این این)
بھاگلپور: تلکا مانجھی بھاگلپور یونیورسٹی میں طلبہ جے ڈی یو کی تنظیمی قیادت پر ایک بار پھر محمد احسان الحق رضا عرف ڈیوڈ پر اعتماد ظاہر کیا گیا ہے۔ انہیں مسلسل دوسری مرتبہ یونیورسٹی صدر نامزد کیا گیا ہے۔ طلبہ جے ڈی یو کے ریاستی صدر دھیرج کمار نے ان کی نامزدگی کا اعلان کیا۔ اس موقع پر طلبہ جے ڈی یو کے انچارج و رکن اسمبلی راہل رنجن اور جے ڈی یو کے ریاستی صدر امیش سنگھ کشواہا کی رہنمائی اور تعاون کا بھی ذکر کیا گیا۔
دوسری بار ذمہ داری ملنے کے بعد احسان الحق رضا نے واضح کیا کہ ان کی بنیادی ترجیح یونیورسٹی میں طلبہ کے زیر التوا مسائل کو مضبوطی سے اٹھانا اور تنظیم کو زمینی سطح پر فعال بنانا ہوگی۔ انہوں نے کہا کہ اقلیتی طلبہ کے ہاسٹل میں طلبہ کو درپیش مسائل، نشستوں کی عدم دستیابی اور نشستوں کی الاٹمنٹ کے عمل میں شفافیت کا فقدان سنگین معاملات ہیں۔ اس کے علاوہ امتحانی نتائج میں تاخیر اور امتحان میں حاضر رہنے کے باوجود طلبہ کو غیر حاضر قرار دیے جانے جیسی بے ضابطگیوں پر بھی تنظیم خاموش نہیں رہے گی۔
انہوں نے کہا کہ طلبہ کے مستقبل سے جڑے ان معاملات کو یونیورسٹی انتظامیہ کے سامنے پوری قوت کے ساتھ اٹھایا جائے گا اور مسائل کے حل تک جمہوری طریقے سے جدوجہد جاری رہے گی۔
یونیورسٹی کے کسی بھی طالب علم کے ساتھ ناانصافی ہونے پر طلبہ جے ڈی یو اس کی آواز بنے گی۔احسان الحق رضا نے دوبارہ ذمہ داری سونپنے پر پارٹی کی اعلیٰ قیادت کا شکریہ ادا کرتے ہوئے کہا کہ تنظیم کو مضبوط بنانے کے ساتھ طلبہ و طالبات کے حقوق، عزت و وقار اور تعلیمی مفادات کا تحفظ ان کی اولین ترجیح ہوگی۔