ارریہ: سدبھاونا منچ کے اراکین نے مختلف درگا پوجا پنڈالوں کاکیا دورہ، باہمی محبت اور بھائی چارے کا دیا پیغام،وسرجن میں شامل ہونے والے افراد کا استقبال اور کیا جائے گا اعزاز

(پی این این)
ارریہ:درگا پوجا ہمارے ہندو بھائیوں کیلئے عقیدت اور بھکتی کے ساتھ ساتھ باہمی محبت، بھائی چارے اور سماجی اتحاد کا بھی تہوار ہے۔ اسی پیغام کو عام لوگوں تک پہنچانے کے مقصد سے اتوار کو مہااشٹمی کے موقع پر سدبھاونا منچ، ارریہ کے اراکین نے شہر کے مختلف درگا پوجا پنڈالوں کا دورہ کیا۔ اس دوران پوجا کمیٹیوں کے اراکین سے ملاقات کرکے انہیں درگا پوجا کی مبارک باد پیش کی اور باہمی ہم آہنگی کے ساتھ تہوار منانے کی اپیل کی۔ سدبھاونا منچ کے اراکین نے اپنے دورے کا آغاز آر ایس ریلوے اسٹیشن واقع اسُر وِناشنی درگا مندر سے کیا۔
اس کے بعد ارریہ کورٹ اسٹیشن، جے پرکاش نگر، شاستری نگر، کالی بازار درگا مندر، ماں کھڈگیشوری کالی مندر، سرِعام ٹھاکرباڑی مندر اور بھگت ٹولہ سمیت شہر کے مختلف پوجا مقامات پر پہنچے۔ وہاں پوجا کمیٹیوں کے اراکین سے ملاقات کرکے انہیں تہوار کی مبارک باد دی اور سماجی ہم آہنگی برقرار رکھنے کا پیغام دیا۔
منچ کے اراکین نے کہا کہ درگا پوجا جیسے تہوار معاشرے میں محبت، اعتماد اور اتحاد کو مضبوط بنانے کا موقع فراہم کرتے ہیں۔ تمام لوگوں کو ایک دوسرے کے جذبات کا احترام کرتے ہوئے باہمی بھائی چارے کے ساتھ تہوار منانا چاہیے۔ اس کے ساتھ ہی امن و امان برقرار رکھنے، افواہوں سے دور رہنے اور کسی بھی طرح کے تنازع سے بچنے کی اپیل کی گئی، تاکہ تہوار کی خوشی اور جوش و خروش سبھی کے لیے خوش گوار رہے۔ اس سدبھاونا جلوس میں منچ کے صدر شیام لال یادو، سکریٹری محمد محسن، نائب سکریٹری امیت کمار امن، ستیندر ناتھ شرن، عفان کامل، شرف الحق، اشوک ٹھاکر، رضی احمد، عابد حسین انصاری، شبیرالحق، توصیف انور، کاشف اور راغب سمیت دیگر اراکین شامل تھے۔
منچ کے اراکین نے بتایا کہ سدبھاونا منچ ہر سال درگا پوجا کے دوران مختلف پوجا کمیٹیوں سے ملاقات کرکے سماجی ہم آہنگی کا پیغام دیتا ہے۔ اس سال بھی مورتی وسرجن کے دن سدبھاونا دوار کے قریب منچ کے اراکین وسرجن میں شامل ہونے والے افراد کا استقبال اور اعزاز کریں گے۔ بتایا گیا کہ اس اقدام کا مقصد ارریہ کی گنگا جمنی تہذیب، باہمی بھائی چارے اور فرقہ وارانہ ہم آہنگی کی روایت کو مزید مضبوط بنانا ہے۔