(پی این این)
پٹنہ:بہار میں طلبہ تحریک کے دوران طلبہ پر اے کے-47 سے فائرنگ کے معاملے میں اب تک کارروائی نہ ہونے پر راشٹریہ جنتا دل (آر جے ڈی) نے احتجاجی تحریک کا اعلان کر دیا ہے۔ آر جے ڈی 19 اگست کو ویرچند پٹیل پتھ واقع پارٹی دفتر سے لوک بھون تک مارچ کرے گی۔ قائدِ حزبِ اختلاف تیجسوی یادو نے کل نئی دہلی میں منعقدہ پریس کانفرنس میں اس کا اعلان کیا۔ تیجسوی یادو نے کہا کہ مارچ میں پارٹی کے تمام ارکانِ پارلیمنٹ، ارکانِ اسمبلی، ارکانِ قانون ساز کونسل اور پارٹی کارکنان شرکت کریں گے۔ انہوں نے کہا کہ بہار کو پولیس کی حکمرانی والی ریاست نہیں بننے دیا جائے گا۔
بہار کے قائدِ حزبِ اختلاف نے کہا کہ اس مارچ کے سلسلے میں اپوزیشن کی دیگر جماعتوں سے بھی بات چیت کی جا رہی ہے۔ انہیں بھی بہار میں طلبہ کو انصاف دلانے کے لیے اس مارچ میں شامل ہونے کی دعوت دی گئی ہے۔ انہوں نے کہا کہ پورا ملک یہ جاننا چاہتا ہے کہ طلبہ پر فائرنگ کس کے حکم پر کی گئی۔انہوں نے کہا کہ اپوزیشن کی جانب سے آواز اٹھائے جانے کے بعد ایک سپاہی کو معطل کر دیا گیا، لیکن اب تک ایس پی کو معطل کیوں نہیں کیا گیا؟ انہوں نے پارلیمنٹ میں یہ معاملہ اٹھانے پر راہل گاندھی اور اکھلیش یادو کا شکریہ بھی ادا کیا۔
تیجسوی یادو نے اس کے ساتھ ہی الزام عائد کیا کہ وزیر اعظم، وزیر اعلیٰ اور مرکزی وزیر داخلہ نے اس معاملے پر آج تک ایک لفظ تک نہیں کہا۔ وزیر اعلیٰ یا کسی نائب وزیر اعلیٰ نے زخمی طلبہ سے ملاقات کرنے تک کی زحمت نہیں کی۔ اگر ان معصوم طلبہ کی جان چلی جاتی تو اس کا ذمہ دار کون ہوتا؟ پریس کانفرنس میں رکنِ پارلیمنٹ میسا بھارتی، ابھے کشواہا اور سریندر یادو بھی موجود تھے۔
واضح رہے کہ راشٹریہ جنتا دل (آر جے ڈی) کے کارگزار صدر تیجسوی یادو نے اس سے قبل اگست ہی میں بہار کے پولیس ڈائریکٹر جنرل (ڈی جی پی) ونے کمار سے ملاقات کی تھی اور 25 جولائی کو طلبہ کے احتجاج کے دوران اے کے-47 رائفل کے مبینہ استعمال کے معاملے میں سیوان کے پولیس سپرنٹنڈنٹ اور دیگر سینئر افسران کے خلاف کارروائی کا مطالبہ کیا تھا۔
اسمبلی میں قائدِ حزبِ اختلاف تیجسوی یادو کی قیادت میں وفد نے کہا تھا کہ بھارتیہ جنتا پارٹی (بی جے پی) کی قیادت والی قومی جمہوری اتحاد (این ڈی اے) حکومت کو یہ واضح کرنا چاہیے کہ طلبہ کے خلاف اس طرح کی رائفل استعمال کرنے کا حکم کس نے دیا تھا۔ آر جے ڈی لیڈر نے صحافیوں سے کہا تھا کہ مظاہرین کے خلاف اے کے-47 کا استعمال صرف وزیر اعلیٰ سمراٹ چودھری یا مرکزی وزیر داخلہ امیت شاہ کے حکم پر ہی کیا جا سکتا تھا۔ اس معاملے پر دونوں نے خاموشی اختیار کر رکھی ہے اور کچھ بھی نہیں کہہ رہے ہیں۔ متعلقہ پولیس سپرنٹنڈنٹ (ایس پی) اور دیگر سینئر افسران کے خلاف کارروائی کی جانی چاہیے۔

(پی این این)
پٹنہ:امارت شرعیہ بہار، اڈیشہ، جھارکھنڈو مغربی بنگال کے ناظم جناب مولانا مفتی محمد سعیدالرحمٰن قاسمی صاحب نے اپنے ایک پریس ریلیز میں کہا کہ محکمۂ تعلیم بہار نے سرکاری اسکولوں کے لئے سنیچر کے نصف دن کی چھٹی کی منظوری کانوٹیفیکیشن جاری کیا ہے جس سے اسکولوں کے اساتذہ کو راحت ملی ہے اور قدیم روایت کی پاسداری بھی ہوئی ہے۔
تاہم اردو اسکولس اور مدارس جہاں ہمیشہ سے جمعہ کو مکمل دن کی سرکاری چھٹی کا معمول جاری ہے ایسے اسکولوں اور مدارس کے لئے نوٹیفیکیشن میں جمعرات کے آدھے دن کی چھٹی کی کوئی صراحت نہیں ہے ،جس کی وجہ سے اردو اسکولوں اور مدارس کے اساتذہ میں بے حد بے چینی پائی جارہی ہے ،یہ بات اصولی ہے کہ اگر اتوار کی رعایت کرتے ہوئے سنیچر کو نصف دن کی چھٹی کا منظوری نامہ جاری ہوا ہے تو جمعہ کی چھٹی کی رعایت کرتے ہوئے جمعرات کو بھی نصف دن کی چھٹی منظور کی جائے اور اس کے لئے واضح منظوری نامہ جاری ہو،ایسا نہیں کرنے کی صورت میں اردو اسکولوں اور مدارس کے اساتذہ کواس رعایت کا کوئی فائدہ حاصل نہیں ہوگا اور خواہ مخواہ سنیچر کو آدھے دن چھٹی کرنے کی وجہ سے تعلیمی نظام میں خلل بھی واقع ہوگا۔
اس لئے جناب ناظم صاحب نے اپنے اس پریس ریلیز کے ذریعہ محترم وزیر تعلیم حکومت بہار اور محکمہ تعلیم کے اعلیٰ ذمہ داران سے پُرزور مطالبہ کیا ہے کہ وہ اس طرف توجہ دیں اورجلد از جلد متعلقہ محکمہ کی طرف سے اردو اسکولوں اور مدارس کے لئے جمعرات کے نصف دن کی چھٹی کا واضح منظوری نامہ جاری کیا جائے ؛تاکہ سابقہ روایت کی پاسداری بھی ہواور ان اداروں کے اساتذہ کو مساوی فائدہ بھی حاصل ہو سکے ۔

ارریہ : گزشتہ کل جوکی بلاک کی پنچایت بھگوان پور میں واقع”جامعہ ام سلمیٰ للبنات ترکیلی کے کیمپس میں”وکلانگ و اپیکچھت سیواسدن” سمستی پور کے زیرِ انتظام ایک پروقار انعامی کوئز مقابلہ اور ثقافتی پروگرام کا انعقاد ادارہ کے بانی اور سکریٹری مولانا اختر مظاہری کی نگرانی میں بڑے تزک و احتشام کے ساتھ منعقد ہوا، جس کی صدارت مولانا اشتیاق مظاہری نے کی جبکہ نظامت کے فرائض کو ماسٹر محمد مظفر عالم نے بحسن و خوبی انجام دیا۔
اس پر وقار پروگرام میں مہمان خصوصی کی حیثیت سے “وکلانگ واپیکچھت سیواسدن” سمستی پور کے محمد اشفاق اور مہمان اعزازی کے طور پر مولانا مسعود اختر مظاہری شریک پروگرام ہوئے۔ اس انعامی کوئز مقابلہ اور ثقافتی پروگرام کا بابرکت آغاز تلاوت قرآن سے کیا گیا جبکہ یہاں کی چند طالبات نے حمد اور نعتوں کا گلدستہ پیش کرکے خوب خوب داد تحسین حاصل کیں پھر افتتاحی کلمات کے تحت”جامعہ ام سلمیٰ للبنات” ترکیلی، ضلع ارریہ کے بانی اور سکریٹری مولانا اختر مظاہری نے کہا کہ اس پروگرام کا مقصد تعلیم کو فروغ دینا اور طالبات کو معیاری مطالعہ کے لئے مواد فراہم کرنا ہے۔
آپ نے تعلیم کو معاشرے کی مجموعی ترقی کی بنیاد قرار دیتے ہوئے کہا کہ اس طرح کی کوششیں طلبہ اور طالبات کے روشن مستقبل کی تعمیر میں اہم کردار ادا کرتی ہیں۔ آپ نے طالبات کو خطاب کرتے ہوئے کہا کہ درسگاہ کی پڑھائی کے علاوہ مطالعہ کو اپنا اوڑھنا بچھونا بنا لیں!، کیوں کہ مطالعہ انسان کی عقل و شعور کو جلا بخشنے، معلومات میں وسعت پیدا کرنے اور فکری صلاحیتوں کو پروان چڑھانے کا سب سے موثر ذریعہ ہے۔ یہ انسان کا بہترین دوست ہے جو ماضی، حال اور مستقبل کے تجربات سے روشناس کرا کے زندگی کے ہر موڑ پر رہنمائی فراہم کرتا ہے۔ علم انسان کی بنیادی ضرورت ہے اور مطالعہ اس کے حصول کا سب سے بڑا دروازہ ہے۔ کتابیں پڑھنے سے سوچنے سمجھنے کی صلاحیت اور نکتہ فہمی بڑھتی ہے۔ اچھی کتابیں انسان کو اخلاقیات، صبر اور سچائی کا درس دے کر بہتر انسان بناتی ہیں۔مطالعہ دنیا بھر کے حالات، تاریخ اور سائنسی حقائق سے باخبر رکھتا ہے۔ مطالعہ اور اسٹیڈی سے ذخیرہ الفاظ میں اضافہ ہوتا ہے اور بولنے اور لکھنے کا ڈھنگ بہتر ہوتا ہے۔اچھے موضوعات کا مطالعہ ذہنی سکون فراہم کرتا ہےاور پریشانیاں دور کرتا ہے۔
افتتاحی کلمات کے بعد کوئز مقابلہ کا انعقاد ہوا اور سب سے زیادہ نمبر حاصل کرنے والی طالبات کے ناموں کا اعلان کیا، جن طالبات نے فرسٹ پوزیشن حاصل کیں، ان میں ماہ نور بنت عبداللہ، خوشبو بنت شاہد، اسما بنت افروز، منتشی بنت مرشد، ادیبہ بنت پرویز، سابق النہار بنت اسرائیل کے نام شامل ہیں، جن طالبات نے سکنڈ پوزیشن حاصل کرنے میں کامیاب رہیں ۔
ان میں فوزیہ بنت مفتی جمال الدین نگار بنت مجاہد، فخرالنساء بنت عمران، سعدیہ بنت حافظ رئیس، رونق بنت ابونصر، عالیہ بنت حافظ قیصر اور جن طالبات نے تھرڈپوزیشن حاصل کیں ان میں آفرین بنت اشتیاق، منتشی بنت اقبال، فائزہ بنت مجاہد،
یاسمین بنت مجاہد، عالیہ بنت محفوظ اوررقیہ بنت عبد الرقیب کے نام قابلِ ذکر ہیں پھر ان تمام طالبات سمیت ادارہ کے تقریباً 250 طالبات کے مابین اسٹیڈی ٹیبل، میڈل اور معلومات عامہ کتب “وکلانگ و اپیکچھت سیواسدن” سمستی پور کے نمائندے اور پروگرام کے مہمانِ خصوصی محمد اشفاق عالم، مہمان اعزازی مولانا مسعود اختر مظاہری، یہاں کے اساتذہ اور مدرسہ کی انتظامیہ کمیٹی کے افراد کے ہاتھوں کوئز مقابلہ میں کامیاب ہونے والی طالبات سمیت ادارہ کے تقریباً 250 طالبات کے مابین اسٹیڈی ٹیبل، میڈل اور معلومات عامہ کتب تقسیم کئے گئے، انعامات کی حصولیابی کے بعد تمام پچیوں کے چہرے خوشی ومسرت سے جھوم اٹھے۔ اس موقع پر مدرسہ کی انتظامیہ کمیٹی اور اساتذہ نے”وکلانگ و اپیکچھت سیوا سدن” سمستی پور کے تعاؤن کا دل کی گہرائیوں سے شکریہ ادا کیا اور امید ظاہر کی کہ تعلیمی اور سماجی ترقی کے لئے ایسے پروگرام مستقبل میں بھی منعقد کراتے تے رہیں گے۔ اس موقع پر مہمان خصوصی کے طور پر محمد اشفاق، مولانا اختر حسین، آفتاب عالم، شوکت عالم، اور اشتیاق احمد سمیت یہاں کے اساتذہ اور طالبات بڑی تعداد میں موجود تھے۔