دیوبند:صوبائی حکومت کی جانب سے بلاک پرمکھوں کو منتظم بنائے جانے کے بعد بدھ کے روز صفائی ملازمین نے بلاک پرمکھ کے شوہر وجے تیاگی کا زبردست استقبال کیا اور مختلف مسائل پر مبنی میمورنڈم ان کے سپرد کیا ۔بلاک آفس پہنچنے والے صفائی ملازمین نے کہا کہ بلاک پرمکھ کو منتظم بنائے جانے سے اس پورے علاقہ کی پنچایتوں کی تشکیل تک منتظمین کی جانب سے پورا نظام بہتر طریقہ سے چلتا رہے گا ۔انہوں نے امید ظاہر کی کہ اس پورے علاقہ میں التواء میں پڑے ترقیاتی کام اب بہت جلد پورے ہوجائیں گے ۔
بلاک پر مکھ کے شوہر وجے تیاگی نے کہا کہ صفائی ملازمین دیہی علاقوں میں صفائی ستھرائی رکھنے میں اپنا اہم کردار ادا کرتے ہیں اس لئے ان کے مسائل کو حل کرنا ان کی پہلی ترجیح ہے ۔اس موقع پر ارجن پردھان ،گنا سمیتی کے چیئرمین چودھری ا وپیندر ،کلدیپ تیاگی ،انل پردھان ،سشیل کمار ،اتل تیاگی ،امت کمار ،ستیندر کمار ،نیرج ،گھنشیام ،مکٹ بہاری ،سومناتھ ،وریندر ،رام کمار اورنندکمار وغیرہ موجود رہے ۔

دیوبند:دیوبند میں سڑک کی تعمیر کے پروجیکٹ کے منیجر پر مزدوروں کو یرغمال بناکر مارپیٹ کرنے ،مزدوری کی اجرت کی ادائیگی نہ کرنے اور جان سے مارنے کی دھمکی دینے کا الزام عائد کیا گیا ہے ۔
مرد مزدوروں کے ساتھ تقریباً ایک درجن خواتین مزدوروں نے بھی دیوبند کوتوالی پہنچ کر اس سلسلہ میں شکایت درج کرائی ہے ۔پروجیکٹ منیجر پر الزام عائد کیا گیا ہے کہ خواتین مزدوروں کی جانب سے اپنی اجرت مانگنے پر ان کے ساتھ بدسلوکی کی گئی اور گالی گلوچ کا بھی سہارا لیاگیا ۔اس پورے واقعہ کا تعلق دیوبند شوگر فیکٹر ی کے علاقہ میں ایک سڑک کی تعمیر سے متعلق ہے ۔رنسورہ گائوں کے باشندہ پنکج نے دیوبند کوتوالی میں تحریر دیتے ہوئے بتایا کہ پروجیکٹ منیجر کی جانب تاج پور کے باشندہ امت اور مظفر نگر کے جاٹان خان پور کے کئی باشندے راجو ،ارجن ،سمندر ،کالا،گوپی اور ننہا کے 1 ؍لاکھ 56؍ ہزار روپے مزدوری کے باقی ہیں ۔تحریر میں بتایا گیا ہے کہ 2؍ اگست کو اپنی مزدوری کی رقم مانگنے پر مذکورہ منیجر نے انہیں تقریباً 24؍ گھنٹے تک یرغمال بنائے رکھا اور اس دوران بڑی بے رحمی کے ساتھ ان کی پٹائی کی گئی ۔
پنکج نے بتایا کہ یرغمال بنائے گئے مزدوروں کو بے رحمی سے پیٹنے کے ساتھ ساتھ گالی گلوچ کی گئی اور آئندہ رقم کا مطالبہ کرنے پر جان سے مارنے کی دھمکی دی گئی ہے ۔اس کے علاوہ کلسٹھ گائوں کی باشندہ خواتین شملا،اندرا ،سویتا ،جسویری ،موسم ،رینو ،مناکشی ،ریکھا ،پھولو اور نشٹھا سمیت دیگر خواتین مزدوروں نے الزام عائد کرتے ہوئے کہا کہ ان کی مارچ مہینہ کے تقریباً 42؍ ہزار روپے اور فی الحال کی جانے والی 11؍ دنوں کی مزدوری کے 56؍ ہزار روپے پروجیکٹ منیجر نے ادا نہیں کئے ۔خواتین مزدوروں کا کہنا ہے کہ مزدوری کی رقم مانگنے پر ان کے ساتھ بدسلوکی کی گئی اور گالیاں دی گئیں ۔پولیس نے پروجیکٹ منیجر اور اس کے ساتھیوں کے خلاف ملنے والے تحریر کی بنیاد پر معاملہ درج کرکے جانچ شروع کردی ہے ۔

دیوبند:قصبہ نانوتہ کے گنگوہ روڈ پر واقع دھرم شالہ میں آزاد سماج پارٹی (کانشی رام) کی ایک جائزہ میٹنگ منعقد ہوئی، جس میں پارٹی کے ضلع عہدیداران، سیکٹر صدور، سیکٹر انچارج، نگر ٹیم، بوتھ صدور اور بڑی تعداد میں فعال کارکنوں نے شرکت کی۔
اجلاس سے خطاب کرتے ہوئے ضلع صدر سچن کھرانہ اور پارٹی کے سینئر رہنما و سابق چیئرمین افضال خان نے کہا کہ تنظیم کو ہر بوتھ، ہر گاؤں اور ہر وارڈ تک مضبوط بنانا وقت کی اہم ضرورت ہے۔
انہوں نے اس موقع پر سیکڑوں نئے کارکنوں کو پارٹی کی مختلف تنظیمی ذمہ داریاں بھی سونپیں اور ان سے پوری دیانت داری کے ساتھ فرائض انجام دینے کی اپیل کی۔ ضلع صدر سچن کھرانہ نے کہا کہ آزاد سماج پارٹی واحد سیاسی جماعت ہے جو ہر طبقے کے افراد کو مساوی عزت و احترام اور نمائندگی فراہم کرتی ہے۔
انہوں نے کہا کہ پارٹی کے قومی صدر چندر شیکھر آزاد کی پالیسیوں اور نظریات کو گھر گھر پہنچانے کے لیے کارکنان کو سرگرم کردار ادا کرنا ہوگا۔ سابق چیئرمین افضال خان نے کہا کہ نئے عہدیداروں کی تقرری سے ضلع میں تنظیم مزید مضبوط ہوگی اور آئندہ انتخابات میں پارٹی کو اس کا فائدہ ملے گا۔ انہوں نے کارکنوں سے عوامی مسائل کو ترجیحی بنیادوں پر اٹھانے اور پارٹی کو نچلی سطح تک منظم کرنے کی اپیل کی۔ اس کے علاوہ اسمبلی صدر انیل کمار، اسمبلی انچارج مہتاب علی، ضلع نائب صدر پرتھوی راج سنگھ، کسان مورچہ ضلع صدر سردار ہرپال سنگھ، مولوی اسد علی اور کونسلر دانش ملک نے بھی خطاب کرتے ہوئے تنظیمی استحکام اور عوامی رابطہ مہم کو مزید مؤثر بنانے پر زور دیا۔ اس موقع پر امجد خان، فراز صدیقی، صادق سیفی، نسیم صدیقی، مستقیم منصوری، سابق پردھان نعیم خان سمیت بڑی تعداد میں پارٹی کارکنان اور عہدیداران موجود رہے۔