(پی این این)
علی گڑھ:جواہر لعل نہرو میڈیکل کالج، علی گڑھ مسلم یونیورسٹی کے شعبہ کمیونٹی میڈیسن نے عالمی یومِ انسدادِ تمباکو نوشی کی مناسبت سے یونیورسٹی کے اربن ہیلتھ ٹریننگ سینٹر (یو ایچ ٹی سی) میں بیداری پروگرام منعقد کیا، جس کا مقصد عوام کو تمباکو کے استعمال کے مضر اثرات سے آگاہ کرنا اور تمباکو سے پاک طرزِ زندگی کو فروغ دینا تھا۔
یہ پروگرام شعبہ کمیونٹی میڈیسن کی صدر پروفیسر عظمیٰ ارم کی رہنمائی میں منعقد ہوا۔ سینئر ریزیڈنٹ ڈاکٹر شائستہ پروین نے تمباکو نوشی کے خلاف مسلسل عوامی بیداری کی ضرورت پر زور دیا۔ جونیئر ریزیڈنٹ ڈاکٹر ریا نے تمباکو کے استعمال سے ہونے والے مضر نتائج پر گفتگو کرتے ہوئے بتایا کہ اس کا تعلق سرطان، قلبی امراض، سانس کی بیماریوں اور دیگر سنگین طبی مسائل سے ہے۔ جونیئر ریزیڈنٹ ڈاکٹر روہن کوشک نے تمباکو نوشی ترک کرنے کے طریقوں، احتیاطی تدابیر اور دھوئیں والی اور بغیر دھوئیں والی تمباکو مصنوعات کے خطرات پر گفتگو کی۔
اس موقع پر یو ایچ ٹی سی کی لیڈی سی ایم او ڈاکٹر صبوحی افضل، ڈاکٹر شائستہ پروین، پوسٹ گریجویٹ طلبہ، انٹرنز، انڈر گریجویٹ طلبہ، میڈیکل سوشل ورکرز اور یو ایچ ٹی سی کے عملے کی موجودگی میں شرکاء نے تمباکو نہ استعمال کرنے کا حلف بھی لیا اور تمباکو کے مضر اثرات سے متعلق بیداری پیدا کرنے اور تمباکو سے پاک معاشرے کے فروغ کے عزم کا اعادہ کیا۔

(پی این این)
رُڑکی: ادیب معاشرے کو جوڑنے کے ساتھ ساتھ ہماری ثقافت اور تہذیب کو محفوظ رکھنے میں اہم کردار ادا کرتے ہیں۔ شاعری کسی مدرسے یا یونیورسٹی میں نہیں سیکھی جاتی، یہ الہامی عطیہ ہوتی ہے۔یہ خیالات موہنی دیوی ڈگری کالج میں پدم وبھوشن گوپال داس نیرج، پدم شری بیکل اتساہی و پدم شری بشیر بدر کی یاد میں ہوئے آل انڈیا کوی سمیلن و مشاعرے میں اتر پردیش کی ایڈیشنل ڈسٹرکٹ جج و معروف شاعرہ محترمہ مینا خان ناز نے ظاہر کرتے ہوئے کہا کہ عمدہ ادب ہی عمدہ سماج اور قومیت کے جذبے کو مضبوط کرتا ہے۔
مشاعرے کے مہمانِ خصوصی ہریدوار کے پولیس سپرنٹنڈنٹ پروفیسر شیکھر سویال نے کہا کہ شاعری بھی ایک تپسیا اور یوگ سادھنا سے کم نہیں ہے کیونکہ شاعر دنیاوی الجھنوں اور ہنگاموں سے الگ اپنی دنیا بساتا ہے۔ سی او منگلور ابھِنَے چودھری، سی او بھگوان پور دَکش شوکھنڈ نے کہا کہ شاعری ایسی صنف ہے جو آج کے مادی اور سائنسی دور میں بھی کسی سورس کی محتاج نہیں، اے آئی کے ذریعے آج سب کچھ ممکن ہے مگر جو شاعری کے جذبات یا خیالات شاعر پیش کر سکتا ہے وہ اے آئی بھی ظاہر نہیں کر سکتا۔
پروگرام میں مہمانِ خصوصی کے طور پر تشریف لائے ایم ایل اے منگلور قاضی نظام الدین، معروف صنعتکار و نیوٹیک گروپس انڈیا-دبئی کے سی ای او مشرف علی خان، بی جے پی ضلع صدر ڈاکٹر مدھو سنگھ، وزیرِ مملکت شوبھا رام پرجاپتی، شیام ویر سینی، فونکس کے چیئرمین نوجوان سماج سیوک انجینئر چیرب جین، الائنس کلب انٹرنیشنل کی ڈسٹرکٹ گورنر انیتا گپتا، چیئرمین اروند گپتا، وزیرِ مملکت مفتی شمعون قاسمی، اقلیتی تعلیمی اتھارٹی کے چیئرمین پروفیسر سرجیت سنگھ گاندھی، نے بھی نیرج، بیکل و بدر جی کو خراجِ عقیدت پیش کر کے شاعری سے لطف اندوز ہوئے۔مشاعرے کے بانی اور اتراکھنڈ اردو اکیڈمی کے سابق نائب صدر ڈاکٹر افضل منگلوری نے کہا کہ اس مشاعرے کا مقصد محبت ,اتحاد اور سماج میں پھیلی نفرت کو ختم کرنا ہے – یہ خوشی کی بات ہے کہ یہاں پر ہندو ,مسلمان اور تمام سیاسی پارٹیوں کے نمائندوں کے ساتھ ساتھ تمام ضلعے کے اعلی افسران موجود ہیں جو اس بات کی دلیل ہے کہ محبت کے پیغام کے لیے ہر کوئی دل سے ادب کی محفلوں کو پسند کرتا ہے۔
ملک بھر سے آئے شاعروں میں مینا خان، مَیکش اعظمی، مونیکا اروڑا منتشا، ششانک نیرج، شَیلیش گوتم، مہیش شریواستو، پردیپ دیوانہ، پرم ویر کوشک، عادل رشید، شریف، منوج آریہ، اُدے کمار مصور، انیل امروہوی، سید نفیس، دیپک اروڑا دیپ، اشوک پال سنگھ وغیرہ نے حب الوطنی، سماجی ہم آہنگی، ویر رس کی غزلوں و نظموں سے سماں باندھ دیا۔
اس سے قبل موہنی دیوی ڈگری کالج کے مینیجنگ ڈائریکٹر یوگیش سنگھل، سشیل سنگھل، چیئرمین منیشا سنگھل، ڈائریکٹر اکشے سنگھل، اشونی سنگھل، امیت گوئل، منیشا جین، نوین جین، اروند گپتا، بال کلیان کی سپروائزر گنگا دیوی، استاد اشوک پال، اُدے کمار مصور، انیتا گپتا نے مہمانوں، مدعو شاعروں و صحافیوں کا شال، پھول مالاؤں، و مومنٹو سے استقبال کیا۔
اس موقع پر، ضلع جنرل سیکریٹری اکشے پرتاپ سنگھ، صدر جمہوریہ ایوارڈ یافتہ ایچ ایم کپور، ایڈووکیٹ برجیش تیاگی، بھاجیومو پردیش نائب صدر گورو کوشک، پرنسپل نریندر سنگھ امبیڈکر، سماج سیوک، سبھاش نمبردار، سلمان فریدی، ایشور لال شاستری، وکاس وشِشٹ، رام کمار اُپادھیائے، نریندر آہوجا، حیدر زما خان، قاضی نورالدین، سابق کونسلر انیل شرما بلّو، عمران دیش بھکت، سید نفیس الحسن، قاضی سراج الدین، وغیرہ موجود رہے۔ آخر میں کالج کی چیئرمین منیشا سنگھل نے سب کا شکریہ ادا کیا۔ شاعر مَیکش اعظمی کی سرسوتی وندنا و سید نفیس کے حب الوطنی گیت سے کوی سمیلن کا آغاز ہوا۔

،

(پی این این)
لکھنؤ:سماجوادی پارٹی کے صدر اکھلیش یادو نے ایودھیا کے رام مندر میں چڑھاوے کی رقم کے حوالے سے ایک سنگین الزام عائد کیا ہے۔ انہوں نے دعویٰ کیا ہےکہ رام مندر میں عقیدت مندوں کی جانب سے پیش کیے گئے کروڑوں روپے کے نذرانے کی رقم غائب ہوگئی ہے۔ اکھلیش یادو نے یہ بات اپنے سرکاری سوشل میڈیا اکاؤنٹ پر ایک پوسٹ کے ذریعے کہی۔
وہیں دوسری جانب شری رام جنم بھومی تیرتھ شیتر ٹرسٹ نے اس الزام کو مسترد کرتے ہوئے کہا ہے کہ اب تک ایسی کوئی قابلِ ذکر بات سامنے نہیں آئی ہے۔
شری رام جنم بھومی تیرتھ شیتر، ایودھیا کے جنرل سیکریٹری چمپت رائے نے کہا کہ ٹرسٹ کے مالی معاملات کا وقتاً فوقتاً اندرونی آڈٹ کیا جاتا ہے، جس میں ٹرسٹ اور اسٹیٹ بینک آف انڈیا (ایس بی آئی) کے نمائندے شامل ہوتے ہیں۔انہوں نے بتایا کہ آڈٹ کا یہ عمل کئی دنوں تک جاری رہتا ہے اور اس وقت بھی اسی نوعیت کا آڈٹ کیا جا رہا ہے۔ چمپت رائے کے مطابق، اب تک جانچ کے دوران کسی قسم کی قابلِ ذکر بے ضابطگی یا گڑبڑی سامنے نہیں آئی ہے۔
اس پر سماجوادی پارٹی کے سربراہ اکھلیش یادو نے ایک بار پھر ’ایکس‘ پر پوسٹ کرتے ہوئے طنزیہ ردِعمل ظاہر کیا۔ انہوں نے کہا کہ پیش کی گئی وضاحت خود واضح نہیں ہے۔ ایسا لگتا ہے کہ یہ معاملہ ان کے لیے ہر ہفتے پیش آنے والی ایک معمولی بات بن چکا ہے اور اتنی معمولی کہ اب وہ اسے ’’قابلِ ذکر‘‘ بھی نہیں سمجھتے۔
اکھلیش یادو نے سوال اٹھایا کہ یہ بھی واضح کیا جائے کہ محض 40 سیکنڈ کی وضاحت جاری کرنے میں اتنے گھنٹے کیوں لگ گئے؟ اور وضاحت کے نام پر ایک منٹ تک بولنا بھی کیوں دشوار محسوس ہو رہا ہے۔ انہوں نے کہا کہ جس طرح ریاستی حکومت کی خاموشی مشتبہ معلوم ہوتی ہے، اسی طرح یہ صفائی بھی شکوک و شبہات کو جنم دے رہی ہے۔انہوں نے مزید کہا کہ ایسا محسوس ہوتا ہے جیسے وضاحت کے نام پر محض رسمی الفاظ کی ادائیگی کی جا رہی ہو۔ اکھلیش یادو کے مطابق، اس نہایت کمزور وضاحت نے دنیا بھر کے سناتن سماج کے شکوک میں مزید اضافہ کر دیا ہے اور انہیں مزید رنجیدہ و مضطرب کر دیا ہے۔
واضح رہے کہ شری رام جنم بھومی تیرتھ شیتر کے ایک عہدیدار نے بتایا کہ مندر میں آنے والے نذرانے کی رقم کی گنتی اسٹیٹ بینک آف انڈیا (ایس بی آئی) کی ایودھیا شاخ کے مقرر کردہ عملے کے ذریعے کی جاتی ہے۔