نئی دہلی:عام آدمی پارٹی کے قومی کنوینر اروند کیجریوال آئندہ جمعہ کو رام للا کے درشن کے لیے ایودھیا جائیں گے۔ رام مندر کے چڑھاوے میں مبینہ چوری کا معاملہ سامنے آنے کے بعد اروند کیجریوال کا یہ پہلا دورۂ ایودھیا ہوگا۔ انہوں نے سوشل میڈیا پلیٹ فارم “ایکس” پر اس سلسلے میں جانکاری شیئر کرتے ہوئے کہا کہ ایودھیا واقع شری رام مندر میں چڑھاوے کی مبینہ چوری سے ہر سناتنی بہت زیادہ دکھی ہے، لہٰذا وہ جمعہ کو شری رام مندر جا کر درشن کریں گے۔ اتوار کو بھی اروند کیجریوال نے رام مندر کے چڑھاوے میں کروڑوں روپے کی مبینہ چوری پر تشویش کا اظہار کیا تھا۔ انہوں نے اس واقعے کو کروڑوں ہندوؤں کے عقیدے اور مذہبی جذبات پر ضرب قرار دیا تھا۔ انہوں نے کہا تھا کہ ایودھیا کے رام مندر سے کروڑوں روپے کے چڑھاوے کی چوری کی خبریں سامنے آ رہی ہیں۔ اطلاعات کے مطابق تقریباً 200 کروڑ روپے نقد رقم مبینہ طور پر چوری ہوئی ہے، جبکہ ہیرے اور جواہرات سے بھرے کئی صندوق بھی غائب بتائے جا رہے ہیں۔ اس کے باوجود اب تک اس معاملے میں کوئی ایف آئی آر درج نہیں کی گئی ہے۔ نہ اتر پردیش پولیس نے کوئی مقدمہ درج کیا ہے اور نہ ہی ای ڈی یا سی بی آئی نے اس سلسلے میں کوئی کارروائی کی ہے۔اروند کیجریوال نے مزید کہا تھا کہ لوگ بتا رہے ہیں کہ اس معاملے میں بہت بڑے بڑے نام شامل ہیں اور اگر غیر جانبدارانہ اور صحیح طریقے سے کارروائی کی گئی تو حکومت بھی گر سکتی ہے۔ انہوں نے سوال اٹھایا کہ ملک کی عوام فیصلہ کرے کہ کسے بچایا جانا چاہیے، حکومت کو یا کروڑوں لوگوں کے عقیدے اور آستھا کو؟

نئی دہلی: دہلی میونسپل کارپوریشن (ایم سی ڈی) میں عام آدمی پارٹی کے قائد حزبِ اختلاف انکش نارنگ نے شاہدرہ ساؤتھ زون کے بلڈنگ ڈپارٹمنٹ میں تعینات جونیئر انجینئر (جے ای) روہت ناگپال کے ساتھ بی جے پی کونسلر میناکشی شرما کی جانب سے مبینہ بدتمیزی اور دباؤ ڈالنے کے واقعے کو انتہائی سنگین قرار دیا ہے۔انہوں نے بی جے پی پر سخت تنقید کرتے ہوئے کہا کہ اگر غیر قانونی تعمیرات کے خلاف کارروائی کرنے والے افسران کو سیاسی دباؤ، دھمکیوں اور مداخلت کا سامنا کرنا پڑے گا تو دہلی میں قانون کی حکمرانی کیسے قائم ہوگی؟ انکش نارنگ نے کہا کہ ایک طرف بی جے پی غیر قانونی تعمیرات کے خلاف کارروائی کے بڑے بڑے دعوے کرتی ہے، جبکہ دوسری طرف اس کے عوامی نمائندوں پر انہی افسران کو ڈرانے اور ان پر دباؤ ڈالنے کے الزامات لگ رہے ہیں جو غیر قانونی تعمیرات کے خلاف کارروائی کر رہے ہیں۔ یہ نہایت تشویشناک صورتحال ہے۔ انہوں نے کہا کہ دہلی میں غیر قانونی تعمیرات کی وجہ سے مسلسل حادثات پیش آ رہے ہیں۔متعدد افراد اپنی جانیں گنوا چکے ہیں اور بے شمار خاندان متاثر ہوئے ہیں۔ ایسے وقت میں ضرورت اس بات کی ہے کہ افسران کو غیر جانبدارانہ اور آزادانہ انداز میں کام کرنے دیا جائے، نہ کہ انہیں سیاسی دباؤ کے تحت لانے کی کوشش کی جائے۔ انکش نارنگ نے کہا کہ بی جے پی کی حکمرانی والی ایم سی ڈی میں بدعنوانی اور غیر قانونی تعمیرات کے حوالے سے مسلسل سوالات اٹھتے رہے ہیں۔
اگر کوئی افسر قواعد و ضوابط کے مطابق کارروائی کرتا ہے اور اسی کو ہراساں کیا جاتا ہے تو اس سے یہ پیغام جاتا ہے کہ بی جے پی غیر قانونی تعمیرات کے خلاف کارروائی نہیں بلکہ انہیں تحفظ فراہم کرنا چاہتی ہے۔ انہوں نے میونسپل کمشنر سے مطالبہ کیا کہ اس پورے معاملے کی غیر جانبدارانہ تحقیقات کرائی جائیں اور اگر کسی عوامی نمائندے نے اپنے عہدے کا غلط استعمال کرتے ہوئے کسی افسر پر دباؤ ڈالنے کی کوشش کی ہے تو اس کے خلاف مناسب کارروائی کی جائے۔ ساتھ ہی ایم سی ڈی انتظامیہ اس بات کو یقینی بنائے کہ تمام افسران کسی بھی سیاسی مداخلت کے بغیر قانون اور ضابطوں کے مطابق اپنے فرائض انجام دے سکیں۔ انکش نارنگ نے کہا کہ عام آدمی پارٹی دہلی میں شفاف، جوابدہ اور بدعنوانی سے پاک انتظامیہ کے لیے اپنی جدوجہد جاری رکھے گی اور غیر قانونی تعمیرات کو تحفظ فراہم کرنے والی کسی بھی سیاست کی مخالفت کرتی رہے گی۔

(پی این این)
نئی دہلی: ہماری صدا ٹرسٹ کے زیرِ اہتمام منعقد ہونے والے 7-Day Future Creator AI CreativeLearning Summer Camp 2026 کا شاندار اختتام پذیر ہوا۔ سات روزہ اس تعلیمی و تربیتی کیمپ میں نمایاں کارکردگی دکھانے والے طلبہ کو میڈلز، ٹرافیز اور تعریفی اسناد پیش کرکے ان کی حوصلہ افزائی کی گئی۔
اختتامی تقریب میں بطورِ مہمانِ خصوصی سینئر کمیونٹی لیڈر ڈاکٹر فخرِ عالم، سینئر انجینئر محمد عارض، SIO کے ریاستی صدر حارث نیازی، SIO دہلی کے زونل سیکریٹری سید عمیر افضل، سینئر منیجر سعید فہد اور جامعہ ملیہ اسلامیہ کے ریسرچ اسکالر و SIO دہلی کے جونیئر ایسوسی ایٹ سرکل سیکریٹری محمد الفاظ خان شریک ہوئے۔ طلبہ نے تمام معزز مہمانوں کا گلدستے پیش کرکے پرتپاک استقبال کیا۔مہمانانِ خصوصی نے طلبہ کی صلاحیتوں، محنت اور تخلیقی سرگرمیوں کو سراہتے ہوئے انہیں مستقبل میں مزید محنت اور کامیابی کے لیے نیک تمناؤں سے نوازا۔تقریب کا آغاز ہماری صدا ٹرسٹ کے بانی و جنرل سیکریٹری محمد ارشاد عالم کے استقبالیہ خطاب سے ہوا۔
انہوں نے تمام مہمانوں، والدین، رضاکاروں اور طلبہ کا شکریہ ادا کرتے ہوئے کہا کہ اس کیمپ کا مقصد بچوں اور نوجوانوں کو جدید ٹیکنالوجی، تخلیقی صلاحیتوں اور عملی مہارتوں سے روشناس کرانا ہے تاکہ وہ مستقبل کے چیلنجز کا اعتماد کے ساتھ سامنا کر سکیں۔مختلف مقابلوں میں نمایاں کارکردگیکلاس اول تا ہشتم کے طلبہ کے درمیان مختلف مقابلے منعقد کیے گئے جن میں بہترین کارکردگی دکھانے والے طلبہ کو انعامات سے نوازا گیا۔سنگنگ مقابلہ میں آہل، انم، محمد عمر اور انکت کو اعزازات دیے گئے۔ڈرائنگ مقابلہ میں یوراج، حامد رضا اور پریم جبکہ رائٹنگ مقابلہ میں کنال ارہان اور شہزاد نے نمایاں پوزیشن حاصل کی۔اسپیچ مقابلہ میں فیض، محمد یاسین اور زارا کو انعامات سے نوازا گیا۔اسٹار آف دی کیمپ کیٹیگری میں جونیئر گروپ (کلاس 1 تا 5) سے جوہان، ونشیکا اور ماینک جبکہ سینئر گروپ (کلاس 6 تا 8) سے شاہینہ، زویا، علینہ اور ریحان کو اعزازات دیے گئے۔اسی طرح آیت، ابشام، شاریق، انوراگ، ہیبا اور آفیہ کو ابھرتے ہوئے ستاروں (Emerging Stars) کے طور پر سراہا گیا۔کلاس 9 تا گریجویشن کے طلبہ کے لیے منعقدہ خصوصی امتحان میں نازیہ نے پہلی، علمہ خان نے دوسری اور محمد عرفان خان نے تیسری پوزیشن حاصل کی۔ انہیں خصوصی شیلڈز اور تعریفی اسناد سے نوازا گیا۔رضاکاروں کی خدمات کا اعترافکیمپ کی کامیابی میں اہم کردار ادا کرنے والے رضاکاروں کو بھی ان کی محنت، لگن اور خدمات کے اعتراف میں تعریفی اسناد اور یادگاری مومنٹوز پیش کیے گئے۔ رضاکاروں نے اس اعزاز پر خوشی کا اظہار کرتے ہوئے آئندہ بھی سماجی خدمت جاری رکھنے کے عزم کا اظہار کیا۔جدید تعلیم اور مستقبل کی مہارتوں کا منفرد پروگرامواضح رہے کہ مدن پور کھادر ایکسٹینشن، نئی دہلی میں واقع Rising Skill Development Centre (RSDC) میں منعقد ہونے والے اس سات روزہ کیمپ میں کلاس اول سے گریجویشن تک کے طلبہ نے شرکت کی۔کلاس 1 تا 8 کے بچوں کو AI آگاہی، سوشل میڈیا کے ذمہ دارانہ استعمال، آرٹ اینڈ کرافٹ، اخلاقی و سماجی اقدار، بھائی چارے اور مساوات جیسے موضوعات پر تربیت دی گئی۔
جبکہ کلاس 9 تا گریجویشن کے طلبہ کو Artificial Intelligence (AI)، Communication Skills، Public Speaking، Photography، Reel Making، Advertisement Creation اور Digital Content Production جیسی جدید اور عملی مہارتیں سکھائی گئیں۔
سات روزہ یہ کیمپ طلبہ کے لیے ایک یادگار تجربہ ثابت ہوا جس نے انہیں سیکھنے، تخلیقی صلاحیتوں کو نکھارنے اور مستقبل کے لیے خود کو بہتر طور پر تیار کرنے کا بہترین موقع فراہم کیا۔محمد ارشاد عالم نے کہا کہ ہماری صدا ٹرسٹ آئندہ بھی ایسے تعلیمی، ہنر مندی اور شخصیت سازی کے پروگرام جاری رکھے گی تاکہ نوجوان نسل کو جدید دور کے تقاضوں کے مطابق تیار کیا جا سکے اور وہ ملک و قوم کی ترقی میں مؤثر کردار ادا کر سکیں۔