(پی این این)
نئی دہلیـ:دہلی کی وزیراعلیٰ ریکھا گپتا نے پیر کے روز پنجابی باغ ویسٹ میٹرواسٹیشن پر ارپن کیندر (پرانے کپڑوں کا عطیہ مرکز) کا افتتاح کیا جسے دہلی میٹروریل کارپوریشن (ڈی ایم آر سی) اور دہلی میٹرولیڈیز ویلفیئر آرگنائزیشن کے تعاون سے شروع کیا گیا ہےوزیراعلیٰ نے کیو آر کوڈ پر مبنی ڈیجیٹل نظام کے ذریعے کپڑے عطیہ کرنے کے عمل کا معائنہ بھی کیا۔
انہوں نے کہا کہ تیار دہلی کی تعمیر صرف سڑکوں، پلوں اور میٹرولائنوں سے نہیں ہوتی، بلکہ ذمہ دار شہریوں، وسائل کے احترام اور ماحولیاتی تحفظ کے اجتماعی احساس سے ہوتی ہے۔ جب کچرے کو وسائل میں بدلا جاتا ہے اور ترقی کے ساتھ فطرت کے تحفظ کو یقینی بنایا جاتا ہے، تبھی حقیقی معنوں میں تیار معاشرے کی تعمیر ہوتی ہے۔ انہوں نے کہا کہ پرانے کپڑوں کی ری سائیکلنگ صرف کچرا کم کرنے کا ذریعہ نہیں ہے، بلکہ پانی، توانائی اور قدرتی وسائل کے تحفظ کا بھی مؤثر طریقہ ہے۔ ہر شہری کی طرف سے عطیہ کیا گیا ایک کپڑا ماحولیاتی تحفظ کے ساتھ ساتھ کسی ضرورت مند کی زندگی میں بھی مثبت تبدیلی لا سکتا ہے۔
انہوں نے کہا کہ دہلی میٹروکے 10 اہم اسٹیشنوں پر یہ مراکز قائم کیے جا رہے ہیں۔ جس میں پہلے مرحلے کے تحت آج پانچ اہم اسٹیشنوں، شالیمار باغ، پنجابی باغ ویسٹ، میور وہار فیز-1، شاہدرہ اور روہینی ویسٹ پر ارپن مراکز کا آغاز کر دیا گیا ہے۔ اس کے لیے متعلقہ اداروں کے درمیان باضابطہ مفاہمت ناموں پر دستخط بھی ہو چکے ہیں۔ تمام منتخب میٹرواسٹیشنوں پر ٹیکسٹائل کلیکشن کم سیل کیاسک قائم کیے جا رہے ہیں، جہاں شہری اپنے استعمال کے قابل پرانے کپڑے عطیہ کر سکیں گے۔ شہریوں کی سہولت کے لیے کپڑے عطیہ کرنے کے پورے عمل کو ڈیجیٹل اور شفاف بنایا گیا ہے۔ عطیہ دہندگان کیو آر کوڈ پر مبنی نظام کے ذریعے آسانی سے اپنے پرانے کپڑے عطیہ کر سکیں گے اور انہیں ڈیجیٹل رسید بھی حاصل ہوگی۔
اس سے زیادہ سے زیادہ لوگوں کی شرکت یقینی ہوگی۔ وزیراعلیٰ نے دہلی کے باشندوں سے اپیل کرتے ہوئے کہا کہ وہ اپنے گھروں میں رکھے استعمال کے قابل پرانے کپڑوں کو ارپن مراکز تک ضرور پہنچائیں۔ شہریوں کا ایک چھوٹا سا تعاون نہ صرف لینڈ فل میں جانے والے ٹیکسٹائل کچرے کو کم کرے گا، بلکہ ماحولیاتی تحفظ، وسائل کے تحفظ اور ضرورت مند لوگوں کی زندگی میں مثبت تبدیلی لانے میں بھی اہم کردار ادا کرے گا۔
