ریکھا نےکیا سی ٹی اسکین اور تین ایم آر آئی مشینوں کا افتتاح

نئی دہلی: دہلی کی وزیر اعلیٰ ریکھا گپتا نےسیوا سنکلپ ابھیان کے تحت لوک نائک ہسپتال میں جدید ترین ڈوئل سورس 256-سلائس سی ٹی اسکین مشین اور تین جدید ترین ایم آر آئی مشینوں کا افتتاح کیا۔ گپتا نے لوک نائک ہسپتال میں پہلے شروع کی گئی صحت کی سہولیات کا ذکر کرتے ہوئے بتایا کہ یہاں ماؤں اور نومولود بچوں کی بہتر دیکھ بھال کے لیے لیکٹیشن مینجمنٹ یونٹ قائم کیا گیا ہے، جودودھ کے بینک کے طور پر کام کر رہا ہے۔ اس کے علاوہ، ہسپتال میں این اے ٹی مشین فراہم کی گئی ہے، جس سے ایچ آئی وی اور ہیپاٹائٹس کی جانچ تقریباً 48 گھنٹے میں کی جا سکتی ہے۔ یہ ٹیکنالوجی خون کی جانچ کو زیادہ موثر بنانے اور محفوظ بلڈ ڈونیشن کے عمل کو مضبوط کرنے میں بھی مددگار ہے۔ ہسپتال میں نادر بیماریوں میں مبتلا مریضوں کے لیے خاص وارڈ بھی تیار کیا گیا ہے، جہاں انہیں ضروری علاج اور سہولیات فراہم کی جا رہی ہیں۔
وزیر اعلیٰ نے نومولود بچوں کو سنگین بیماریوں سے بچانے کے لیے شروع کی گئی انمول یوجنا کا بھی ذکر کیا۔ انہوں نے بتایا کہ اس اسکیم کے تحت پیدائش کے فوری بعد نومولود بچے کے خون کے ایک قطرے سے ممکنہ جینیاتی بیماریوں کی جانچ کی جاتی ہے۔ اس سے بیماری کی ابتدائی حالت میں شناخت کر کے وقت پر ضروری علاج شروع کرنے میں مدد ملتی ہے اور بچے کی بہتر صحت کو یقینی بنانے کی سمت میں اہم قدم اٹھایا جاتا ہے۔انہوں نے کہا کہ دہلی حکومت کا عزم ہے کہ معاشی صورتحال یا کسی دوسری مشکل کی وجہ سے کوئی بھی شہری معیاری طبی سہولیات سے محروم نہ رہے۔ اسی مقصد سے سرکاری ہسپتالوں میں جدید طبی ٹیکنالوجی، بہتر بنیادی ڈھانچے اور جدید جانچ کی سہولیات کو وسعت دی جا رہی ہے۔ انہوں نے کہا کہ وقت پر بیماری کی شناخت اور مناسب علاج کی دستیابی سے مریضوں کو بہتر طبی سہولیات ملیں گی اور دہلی کے صحت کے نظام کو مزید مضبوط بنایا جا سکے گا۔
دہلی کے وزیر صحت ڈاکٹر پنکج کمار سنگھ نے کہا کہ لوک نائک ہسپتال میں اب جدید ترین ‘ڈوئل سورس سی ٹی اسکینر اور3-ٹیسلا ایم آر آئی سسٹم سے مریضوں کو اور زیادہ بہتر اور انتہائی تیز رفتار جانچ کی سہولیات ملیں گی۔ ایل این جے پی ہسپتال گنجان آبادی والے علاقے میں ہے اور لاکھوں کی تعداد میں مریض علاج کروانے کے لیے آتے ہیں۔ اس بات کو مدنظر رکھتے ہوئے سی ٹی اسکین اور ایم آر آئی کی یہ سہولیات مریضوں کو بالکل مفت فراہم کی جائیں گی۔انہوں نے کہا کہ اس ہسپتال میں لاکھوں کی تعداد میں آنے والے مریضوں کو مدنظر رکھتے ہوئے ہماری حکومت نے نومولود بچوں کی صحت کی جانچ کے لیے مشن انمول کی سہولیات بھی لوک نائک ہسپتال میں جاری رکھی ہوئی ہیں۔ پچھلی حکومت کے گزشتہ 12 سالوں کے اقتدار میں اس طرح کی سہولیات فراہم کرنے کی سمت میں کوئی توجہ ہی نہیں دی گئی۔ وزیر اعلیٰ ریکھا گپتا کی ہنر مند قیادت میں ہماری حکومت دہلی کے سرکاری ہسپتالوں میں جدید طبی سہولیات کو انتہائی تیز رفتاری سے وسعت دے رہی ہے۔