رجسٹرار جامعہ ملیہ اسلامیہ کی حج بیت اللہ سے واپسی پر تہنیتی پروگرام کاانعقاد

(پی این این)
نئی دہلی : آج شام جامعہ ملیہ اسلامیہ کے نہرو گیسٹ ہاؤس میں حج بیت اللہ سے واپسی پر پروفیسر مہتاب عالم رضوی کے اعزاز میں ایک پُروقار تہنیتی پروگرام کا انعقاد کیا گیا۔ اس روح پرور تقریب میں عزیز و اقارب، اہل خانہ ، جامعہ کے اساتذہ، مختلف فیکلٹی کے ڈین، سینٹرز کے ڈائریکٹرز ، اور نان ٹیچنگ اسٹاف نے بڑی تعداد میں شرکت کی۔
پروگرام کا آغاز تلاوتِ قرآن مجید سے ہوا، اس کے بعد شیخ الجامعہ پروفیسر مظہر آصف نے مبارک باد پیش کرتے ہوئے کہا کہ حج اسلام کا پانچواں رکن ہے، حج روحانی تربیت اور تزکیہ نفس کا ذریعہ ہے اس کے علاوہ انہوں نے مزید کہا کہ حج تمام مسلمانوں کو اتحاد، مساوات اور اخوت کا درس دیتا ہے. اس کے علاوہ تمام اساتذہ نے فرداً فرداً معانقہ کر کے رجسٹرار صاحب کو دلی مبارک باد پیش کی اور ان کے لیے دعاؤں کا اظہار کیا کہ اللہ تعالیٰ ان کے اس عظیم فریضے کو قبول فرمائے اور ان کے گھرانے کے لیے باعثِ برکت بنائے۔
اس موقع پر پروفیسر محمد مہتاب عالم رضوی نے اپنے خیالات کا اظہار کرتے ہوئے کہا کہ حج ایک روحانی سفر ہے جو انسان کی زندگی کو بدل دیتا ہے۔ انہوں نے بیت اللہ، منیٰ، عرفات اور مدینہ منورہ کی روح پرور کیفیات کا تذکرہ کیا اور حاضرین سے درخواست کی کہ وہ بھی اس سعادت کے لیے دعا کریں۔آخر میں میزبان کی جانب سے مہمانوں کی تواضع کی گئی اور دعائیہ کلمات کے ساتھ تقریب اختتام پذیر ہوئی۔