بغیر کسی امتیاز کےسب کو ملنا چاہیے انصاف،وزیر اعلیٰ یوگی نے مسلسل دوسرے دن جنتا درشن میں مختلف اضلاع سے آئے لوگوں سےکی ملاقات اورسنے ان کے مسائل

(پی این این)
گورکھپور:اتر پردیش کے وزیر اعلیٰ یوگی آدتیہ ناتھ نے کہا ہے کہ عوامی مسائل کا حل حکومت کا عزم ہے۔وزیر اعلیٰ یوگی نے گورکھپور دورے کے دوران مسلسل دوسرے دن اتوار کو گورکھناتھ مندر میں منعقدہ جنتا درشن میں مختلف اضلاع سے آئے لوگوں سے ملاقات کی اور ان کے مسائل سنے۔
اس دوران مسٹریوگی نے تقریباً 150 افراد کے مسائل سنے اور کہا کہ ہر شخص کے مسئلے کا حل حکومت کیا عزم ہے۔ وزیر اعلیٰ نے افسران کو ہدایت دی کہ وہ پوری مستعدی اور حساسیت کے ساتھ یہ یقینی بنائیں کہ بغیر کسی امتیاز کے سب کو انصاف ملے۔ ہر مستحق کو عوامی فلاحی اسکیموں کا فائدہ حاصل ہو، ضرورت مندوں کے مناسب علاج کا انتظام کیا جائے اور زمین پر قبضہ کرنے والے لینڈ مافیا اور دبنگوںکے خلاف سخت کارروائی کی جائے۔انہوں نے تمام درخواستوں کو متعلقہ افسران کے حوالے کرتے ہوئے فوری اور اطمینان بخش کارروائی کی ہدایت دی اور لوگوں کو یقین دلایا کہ ہر مسئلے کا مؤثر حل نکالا جائے گا۔
جنتا درشن میں ایک خاتون نے خاندان کی کمزور معاشی حالت کا ذکر کرتے ہوئے اپنی بیٹی کی شادی میں مدد کی درخواست کی۔ یوگی آدتیہ ناتھ نے جب خاتون کو فی جوڑا ایک لاکھ روپے کی امداد والی مکھیہ منتری ساموہک وواہ ہوجنا کے بارے میں بتایا تو وہ خوش ہو گئی۔ خاتون نے وزیر اعلیٰ سے درخواست کی کہ اس اسکیم کا فائدہ اس کی بیٹی کو بھی دلایا جائے۔ اس پر وزیر اعلیٰ نے افسران کو ضروری کارروائی مکمل کرنے کی ہدایت دی۔
جنتا درشن میں سنگین بیماریوں کے علاج کے لیے مالی مدد کی اپیل لے کر آئے کئی لوگوں سے وزیر اعلیٰ نے کہا کہ پیسے کی کمی کی وجہ سے کسی کا علاج نہیں رکے گا۔ انہوں نے افسران کو ہدایت دی کہ جو بھی ضرورت مند ہوں، انتظامیہ ان کے اعلیٰ سطحی علاج کا تخمینہ جلد تیار کر کے فراہم کرے۔ تخمینہ موصول ہوتے ہی حکومت فوری طور پر رقم فراہم کرے گی۔محصولات اور قانون و انتظام سے متعلق معاملات میں وزیر اعلیٰ نے جلد از جلد کارروائی مکمل کرنے کی ہدایت دی۔