دیوبند:آج ہونے والی برسات کی پہلی بارش کے بعد لوگوں کو شدت کی گرمی سے راحت ملی ہے حالانکہ صبح سویرے سے ہی شروع ہونے والی بارش کے سبب دیوبند کے کئی محلوں میں خاص طور پر نشیبی علاقوں میں پانی بھرا رہا جس کی وجہ سے لوگوں کو کافی پریشانیوں کا سامنا کر نا پڑا ۔میونسپل بورڈ کی جانب سے نالوں کی صفائی کرانے کے دعووں کی بھی قلعی کھل گئی ۔بدھ کے روز صبح سویرے سے ہی آسمان میں گھنے بادل چھائے ہوئے تھے اور ہلکی ہلکی بارش کے آغاز کے ساتھ کچھ ہی دیر میں چاروں طرف زبردست بارش شروع ہوگئی ،محکمۂ موسمیات کے مطابق کئی گھنٹوں تک چلنے والی مسلسل بارش کو 56؍ ایم ایم ریکارڈ کیا گیا جس کی وجہ سے شہر کی سڑکیں اور گلیاں پانی سے بھر گئیں خاص طور پر محلہ بڑضیاء الحق ،دارالعلوم چوک ،نواز گرلز پبلک اسکول سے ملحقہ سڑک ،کہنی مسجد کا علاقہ ،پٹھان پورہ ،ریتی چوک ،نیچرگڑھ ،ریلوے روڑ ،شاہ جلال اور روی داس مارگ سمیت کئی محلے بارش کے پانی کے سبب تالاب بنے رہے ،حالانکہ جون کے پہلے ہفتہ میں تقریباً 86؍ایم ایم بارش ریکارڈ کی گئی تھی لیکن اس کے باوجود لوگ شدید گرمی کے باعث بہت زیادہ پریشان تھے ۔بدھ کے روز ہونے والی بارش سے کسانوں اور باغ مالکان کے چہرے بھی کھل اٹھے اس بارش کے بعد دھان کی فصل بونے کی تیاریاں بھی شروع کردی گئی ہیں ۔تروینی شوگر فیکٹری کی لیبارٹری کے انچارج سبھاش ورما نے بتایا کہ ابھی آئندہ دوتین دنوں میں مزید بارشیں ہوں گی جس کے بعد درجۂ حرارت میں مزید کمی آئے گی ۔انہوںنے کہا کہ ان بارشوں کی وجہ سے کسانوں کو بھی کافی راحت ملے گی اور اب انہیں مہنگا ڈیزل خرید کر اپنے کھیتوں کی سینچائی کرنے سے چھٹکارہ مل جائے گا ۔

دیوبند:ریاست کے وزیر اعلی یوگی آدتیہ ناتھ کے سہارنپور کے دورے کے لیے تیاریاں تیز ہو گئی ہیں۔ اس تناظر میں بی جے پی شہر ایم ایل اے راجیو گمبر، بی جے پی شہرصدر شیتل بشنوئی اور انتظامی عہدیداروں نے آج مجوزہ جلسہ گاہ کا مشترکہ طور پر معائنہ کیا۔ معائنہ کے دوران سکیورٹی انتظامات، ٹریفک مینجمنٹ، پارکنگ،ا سٹیج کے انتظامات، پینے کے پانی، بجلی، صفائی اور دیگر ضروری انتظامات کا جائزہ لیا گیا۔
عہدیداروں کو تمام تیاریاں بروقت اور منظم طریقے سے مکمل کرنے کی ہدایت دی گئی، تاکہ چیف منسٹر کے متوقع دورہ کے دوران کسی قسم کی تکلیف نہ ہو۔ اس موقع پر عوامی نمائندوں اور عہدیداروں نے آپس میں رابطہ قائم کرنے اور تمام انتظامات کو یقینی بنانے کی ضرورت پر زور دیا تاکہ کامیاب تقریب کو یقینی بنایا جا سکے۔ انتظامیہ وزیراعلیٰ کے متوقع دورے کے لیے تمام ضروری تیاریوں کو حتمی شکل دینے میں مصروف ہے۔
وزیراعلیٰ کے دورہ سہارنپور کے لیے پروٹوکول جاری ۔اتر پردیش کے وزیر اعلیٰ کے 30 جون کو سہارنپور کے مجوزہ دورے کے لیے ایک تفصیلی پروٹوکول جاری کیا گیا ہے۔ پرائیویٹ سکریٹری دیویندر سنگھ چوہان کے جاری کردہ خط کے مطابق وزیر اعلیٰ لکھنؤ سے صبح 11:10 بجے ریاستی طیارے کے ذریعے روانہ ہوں گے اور صبح 11:10 بجے سرساوا ہوائی اڈے پر پہنچیں گے۔ وزیر اعلیٰ 11:10 بجے گاؤں اسماعیل پور کے کمپوزٹ اسکول پہنچیں گے اور 11:10 سے 11:30 بجے تک اسکول چلو ابھیان” کا آغاز کریں گے۔ اس کے بعد وہ مہاراج سنگھ ڈگری کالج گراؤنڈ میں منعقدہ ایک پروگرام میں شرکت کریں گے۔
، جہاں وہ شہری اور دیہی اسمبلی حلقوں میں ترقیاتی پروجیکٹوں کا سنگ بنیاد رکھیں گے اور افتتاح کریں گے اسکے بعد ایک جلسہ عام سے خطاب کریں گے۔ دوپہر 12:55 بجے وزیر اعلیٰ سرکٹ ہاؤس پہنچیں گے، جہاں طے شدہ پروگرام کے بعد، وہ سہارنپور ڈویژن میں محکمہ تعمیرات عامہ کے موجودہ کاموں کا جائزہ لینے اور نئے کام کے منصوبوں پر تبادلہ خیال کرنے کے لیے دوپہر 1:30 بجے سے 2:45 بجے تک میٹنگ کریں گے۔ اس کے بعد وزیر اعلیٰ دوپہر 3 بجے سرساوا ہوائی اڈے پر پہنچیں گے اور سرکاری طیارہ سے لکھنؤ کے لیے روانہ ہوں گے۔

علی گڑھ:دھان کی روپائی اور خریف فصلوں کی بوائی کے موسم میں کسانوں کو مناسب مقدار میں کیمیائی کھاد، بیج اور بجلی کی بلا تعطل فراہمی یقینی بنانے کے مطالبے کو لے کر آج سابق رکن اسمبلی وویک بنسل کی قیادت میں ضلع اور شہر کانگریس کمیٹی کے زیر اہتمام کلکٹریٹ احاطے کے سامنے ایک بڑا دھرنا و احتجاجی مظاہرہ کیا گیا۔
دھرنے میں موجود کانگریس کارکنان اور شہریوں سے خطاب کرتے ہوئے سابق رکن اسمبلی وویک بنسل نے کہا کہ دھان کی روپائی اور خریف فصلوں کی بوائی کا وقت شروع ہونے والا ہے، لیکن کیمیائی کھاد کی ذخیرہ اندوزی کے باعث کسانوں کو کھلے بازار میں مہنگے داموں کھاد خریدنے پر مجبور ہونا پڑ رہا ہے۔ انہوں نے کہا کہ سرکاری مراکز پر بھی کسانوں کو ضرورت کے مطابق کھاد دستیاب نہیں ہو رہی ہے۔ جس کسان کو چار بوری کھاد کی ضرورت ہوتی ہے، اسے پورا دن قطار میں کھڑے رہنے کے بعد صرف ایک بوری کھاد ہی مل پاتی ہے۔انہوں نے کہا کہ ریاست میں بجلی کی ناکافی فراہمی کے سبب کسانوں کو آبپاشی کے شدید بحران کا سامنا ہے۔ وزیراعلیٰ یوگی آدتیہ ناتھ کی جانب سے بجلی کٹوتی نہ کرنے کی ہدایات کے باوجود ریاست میں بجلی کا بحران برقرار ہے، جس سے کسان شدید مشکلات سے دوچار ہیں۔
وویک بنسل نے کہا کہ سال 2014 میں وزیر اعظم نریندر مودی نے کسانوں کی آمدنی دس برسوں میں دوگنی کرنے کا وعدہ کیا تھا، لیکن بارہ برس کے اقتدار کے بعد بھی کسانوں کی حالت کسی سے پوشیدہ نہیں ہے۔ چھوٹے کسان آج روزگار کی تلاش میں اپنے گاؤں چھوڑ کر شہروں کی طرف ہجرت کرنے پر مجبور ہیں۔ انہوں نے سوال اٹھایا کہ ایسی صورتحال میں حکومت ’’سمردھ کسان، خوشحال دیش‘‘ کا نعرہ کس بنیاد پر دے رہی ہے۔
دھرنے سے شہر کانگریس صدر نوید خان، سبودھ نندن شرما، سابق صدر حاجی نوشاد قریشی، ڈی آر یادو، ونیش کمار سنگھ، ڈاکٹر محمد سہیل اختر، یوتھ کانگریس ضلع صدر سنجے یادو اور رئیس غازی سمیت دیگر مقررین نے بھی خطاب کیا۔ تمام مقررین نے موجودہ حالات میں کسانوں کی حالت پر تشویش ظاہر کرتے ہوئے حکومت سے فوری اور مؤثر اقدامات کرنے کا مطالبہ کیا۔
احتجاجی پروگرام کے اختتام پر کیمیائی کھاد اور بیج کی مناسب دستیابی اور بلا تعطل بجلی فراہمی کو یقینی بنانے کے مطالبے پر مشتمل گورنر اتر پردیش کے نام ایک میمورنڈم اے سی ایم دوم دگ وجے سنگھ کو پیش کیا گیا۔دھرنے کی صدارت ضلع کانگریس صدر ٹھاکر سومویر سنگھ نے کی جبکہ نظامت ندیم غفور نے انجام دی۔
اس موقع پر سابق صدر صلاح الدین واسی، محمد اسلم قریشی، شاہ رخ خان، ارشاد فریدی،عامل حسین، شاہد خان، صابر محمد، ندیم احمد زیدی، اکھلیش کمار پرجاپتی، ڈاکٹر راکیش سارسوت، سعید الدین چودھری، مجیدن نیتانی، رضوانہ بیگم، سید راشد علی، قطب الدین، نصرالدین احمد، فقیرا، باب الدین عباسی، شہباز ضیاء الدین، محمد آصف، نبی احمد، عارف صدیقی، وکاس چیتن، سریندر بگھیل، عقیل احمد قصار، سنی پرجاپتی، انوراگ پرتاپ سنگھ، رشبھ گاندھی، ارپت یادو، الیاس سیفی، کنور شعیب، پرشانت سنگھ، وشال، پرمود سمیت بڑی تعداد میں کانگریس کارکنان اور کسان موجود رہے۔