دربھنگہ: المنصور ٹرسٹ، دربھنگہ کے زیرِ اہتمام ادبی و فکری نشست ’’گفتگو‘‘ کا کامیاب انعقاد حکیم دمڑی منزل، ڈاکٹر آفتاب حسین کمپلیکس، سبھاش چوک، دربھنگہ میں عمل میں آیا۔ نشست کا موضوع ’’ادیبوں کے عصری تقاضے‘‘ تھا، جبکہ معروف افسانہ نگار ڈاکٹر مجیر احمد آزاد کی تازہ تصنیف ’’کشمیر کا ادھورا سفر‘‘ کی باوقار رسمِ اجراء بھی انجام دی گئی۔
تقریب کے مہمانِ خصوصی اور کلیدی مقرر پروفیسر آفتاب احمد آفاقی، صدر شعبۂ اردو، بنارس ہندو یونیورسٹی، وارانسی تھے، جبکہ صدارت پروفیسر محمد آفتاب اشرف، سابق صدر شعبۂ اردو، للت نارائن متھلا یونیورسٹی، دربھنگہ نے کی۔ نظامت کے فرائض معروف ادیب انور آفاقی نے انجام دیے۔
ابتدائی کلمات میں ڈاکٹر احسان عالم نے مصنف ڈاکٹر مجیر احمد آزاد کی ادبی خدمات پر روشنی ڈالتے ہوئے کہا کہ انہوں نے شاعری، افسانہ نگاری، تنقید اور تبصرہ نگاری کے ساتھ ساتھ سفرنامہ نگاری میں بھی اپنی منفرد شناخت قائم کی ہے۔ انہوں نے کہا کہ ان کے دونوں سفرناموں کو قارئین کی بھرپور پذیرائی حاصل ہوئی، جو ان کی گہری مشاہداتی بصیرت کا مظہر ہیں۔ڈاکٹر ایوب راعین نے مصنف سے اپنی دیرینہ رفاقت کا ذکر کرتے ہوئے کہا کہ ڈاکٹر مجیر احمد آزاد ہمیشہ سفر اور مشاہدے کے شوقین رہے ہیں، یہی وجہ ہے کہ ان کے سفرناموں میں حقیقت نگاری اور دلکشی نمایاں نظر آتی ہے۔
صدرِ مجلس پروفیسر محمد آفتاب اشرف نے اردو سفرنامہ نگاری کی روایت اور اس کی ادبی اہمیت پر تفصیل سے روشنی ڈالتے ہوئے کہا کہ ’’کشمیر کا ادھورا سفر‘‘ ایک دلچسپ اور معیاری تصنیف ہے، جو قاری کو اپنے ساتھ سفر پر لے جاتی ہے۔
مہمانِ خصوصی پروفیسر آفتاب احمد آفاقی نے اپنے خطاب میں کہا کہ ادب کو زمانے کے بدلتے ہوئے حالات اور سماجی تقاضوں سے ہم آہنگ ہونا چاہیے۔ انہوں نے کہا کہ اردو زبان کے تحفظ اور فروغ کے لیے انفرادی اور اجتماعی سطح پر سنجیدہ کوششیں ناگزیر ہیں، جبکہ نوجوان نسل میں مطالعے کا ذوق پیدا کرنا وقت کی اہم ضرورت ہے۔

انہوں نے دربھنگہ ٹائمز پبلی کیشنز کی اشاعتی خدمات کو سراہتے ہوئے دو سو سے زائد کتابوں کی اشاعت پر مبارک باد پیش کی اور کہا کہ معیاری کتابوں کی اشاعت خوش آئند ہے، تاہم قارئین کی کم ہوتی تعداد اہلِ قلم اور معاشرے دونوں کے لیے تشویش کا باعث ہے۔ انہوں نے دربھنگہ کو بہار کی علمی و ادبی سرگرمیوں کا اہم مرکز قرار دیتے ہوئے کہا کہ یہاں کی ادبی روایت ہمیشہ زندہ اور فعال رہی ہے۔

تقریب کے دوران ڈاکٹر منصور خوشتر، سکریٹری المنصور ٹرسٹ نے کتاب کی اشاعت کے پس منظر پر روشنی ڈالتے ہوئے کہا کہ ڈاکٹر مجیر احمد آزاد کے سفرنامے محض سیاحتی روداد نہیں بلکہ معلومات، مشاہدات اور ادبی لطافت کا حسین امتزاج ہیں۔ انہوں نے بتایا کہ مصنف کا پہلا سفرنامہ ’’دارجلنگ کی سیر‘‘ قارئین میں بے حد مقبول ہوا، جبکہ تازہ تصنیف ’’کشمیر کا ادھورا سفر (سری نگر اور پہلگام کی سیر)‘‘ بھی اسی روایت کی کامیاب کڑی ہے، جسے دربھنگہ ٹائمز پبلی کیشنز نے شائع کیا ہے۔

انہوں نے کہا کہ اڑتالیس صفحات پر مشتمل یہ مختصر مگر معلوماتی سفرنامہ قدرتی مناظر، تاریخی مقامات، سماجی مشاہدات اور ذاتی تاثرات کو نہایت سادہ، رواں اور مؤثر انداز میں پیش کرتا ہے، جس سے قاری خود کو اس سفر کا حصہ محسوس کرتا ہے۔

تقریب کے اختتام پر ڈاکٹر منصور خوشتر نے مہمانان، مقررین اور شرکائے مجلس کا شکریہ ادا کرتے ہوئے کہا کہ المنصور ٹرسٹ آئندہ بھی ایسی ادبی، فکری اور علمی نشستوں کے انعقاد کا سلسلہ جاری رکھے گا تاکہ ادب و ثقافت کے فروغ کے ساتھ نئی نسل میں مطالعے کا رجحان مضبوط ہو۔

دربھنگہ:ضلع کے بہیڑی تھانہ علاقے میں پولیس نے بروقت کارروائی کرتے ہوئے ایک ممکنہ بڑی مجرمانہ واردات کو ناکام بنا دیا۔
منگل کی دیر رات مبینہ ہوائی فائرنگ کی اطلاع ملتے ہی پولیس نے چھاپہ ماری کر 4 مشتبہ افراد کو گرفتار کر لیا، جبکہ ان کے قبضے سے ایک تھار گاڑی اور فائرنگ کے چار کھوکھے برآمد کیے گئے۔ واقعے کے دوران چند دیگر مشتبہ افراد اندھیرے کا فائدہ اٹھا کر فرار ہونے میں کامیاب ہو گئے، جن کی گرفتاری کے لیے پولیس مسلسل چھاپہ ماری کر رہی ہے۔
پولیس کے مطابق مقامی دیہاتیوں نے اطلاع دی تھی کہ لوآجان پل کے قریب چور کی جانب جانے والے راستے پر چند افراد ایک تھار گاڑی کھڑی کر کے مشکوک حالت میں موجود ہیں اور ہوائی فائرنگ کر رہے ہیں۔ اطلاع کو سنجیدگی سے لیتے ہوئے بہیڑی تھانہ صدر سورج کمار گپتا پولیس ٹیم کے ساتھ فوری طور پر موقع پر پہنچے اور علاقے کی ناکہ بندی کرتے ہوئے کارروائی شروع کی۔
پولیس کی اچانک کارروائی سے موقع پر موجود افراد میں بھگدڑ مچ گئی۔ اس دوران چار افراد کو گرفتار کر لیا گیا، جبکہ ان کے چند ساتھی اندھیرے کا فائدہ اٹھا کر فرار ہو گئے۔ پولیس نے جائے وقوع سے ایک کالے رنگ کی تھار گاڑی اور فائرنگ میں استعمال ہونے والے چار کھوکھے ضبط کر لیے۔
واقعے کی اطلاع ملتے ہی بینی پور کے سب ڈویژنل پولیس افسر (ایس ڈی پی او) باسوکی ناتھ جھا بھی موقع پر پہنچے اور پوری کارروائی کا جائزہ لیا۔ پولیس نے گرفتار افراد کا طبی معائنہ بھی کرایا ہے تاکہ یہ معلوم کیا جا سکے کہ آیا وہ شراب کے نشے میں تھے یا نہیں۔ اس سلسلے میں مزید قانونی کارروائی جاری ہے۔
گرفتار افراد کی شناخت اروند یادو، پرنس کمار، دلخوش کمار اور اشوک کمار کے طور پر ہوئی ہے۔ پولیس کے مطابق ان میں دو ملزمان سمستی پور ضلع کے وارث نگر تھانہ علاقے، ایک روسڑا تھانہ علاقے اور ایک دربھنگہ ضلع کے سلحا گاؤں، تھانہ بہیڑی، کا رہائشی ہے۔
بہیڑی تھانہ صدر سورج کمار گپتا نے بتایا کہ ابتدائی تفتیش سے شبہ ہے کہ گرفتار افراد بہیڑی-بہیڑا اسٹیٹ ہائی وے (ایس ایچ-88) کے کنارے کسی سنگین مجرمانہ واردات کی منصوبہ بندی کر رہے تھے۔ پولیس تمام پہلوؤں سے معاملے کی تفتیش کر رہی ہے، ملزمان کے مجرمانہ ریکارڈ کی جانچ کی جا رہی ہے اور فرار ہونے والے ساتھیوں کی گرفتاری کے لیے مختلف مقامات پر مسلسل چھاپہ ماری کی جا رہی ہے۔
انہوں نے کہا کہ یہ بھی جاننے کی کوشش کی جا رہی ہے کہ ہوائی فائرنگ کا اصل مقصد کیا تھا اور آیا اس کے پیچھے کسی بڑی مجرمانہ سازش کا منصوبہ موجود تھا۔ پولیس کا کہنا ہے کہ تحقیقات مکمل ہونے کے بعد مزید اہم انکشافات سامنے آنے کی توقع ہے۔

(پی این این)
پھلواری شریف:صوبۂ جھارکھنڈ میں ایس آئی آر کا عمل جاری ہے ۲۹؍ جولائی ۲۰۲۶ء فارم جمع کرنے کی آخری تاریخ طے ہے ،گاؤں ،دیہات اور پسماندہ علاقہ کے لوگوں کے لیےمتعلقہ کاغذات کی فراہمی اور فارم کی صحیح صحیح خانہ پُری میں دشواریوں کا پیش آنا فطری بات ہے ،خاص طور پر پرانے ووٹر لسٹ سے ناموں کا انتخاب، آدھار اور ووٹر لسٹ سے اس کی ہم آہنگی اور فارم جمع کرنے کے بعد اس کی وصولیابی کی رسید کا حصول عام لوگوں کے لیے یقیناآسان نہیں ہے ،جب کہ یہ عمل دستوری اعتبار سے غیر معمولی اہم اور شہریت و شناخت کے لئے بنیاد کی حیثیت رکھتا ہے۔
ایسی صورت حال میں امارت شرعیہ بہار،اڈیشہ ،جھارکھنڈ و مغربی بنگال جس نے ہمیشہ پریشانی اور مشکلات کی گھڑی میں رضاکارانہ طور پر بلا تفریق مذہب و ملت عوام و خواص اور ضرورت مندوں کی رہنمائی کی ذمہ داری ادا کی ہے اور اس سے قبل صوبۂ جھارکھنڈ میں پیرنٹس میپنگ کے موقع پر پورے جھارکھنڈ کے اندر بیداری پیدا کرنے اور لوگوں کی رہنمائی کرنے کی ذمہ داری نبھائی ہے ،اس کے لئے ضروری تھا کہ وہ اس موقع پر بھی عوام وخواص کی ہرممکن رضاکارانہ رہنمائی کرے تاکہ کوئی مستحق شہری فارم بھرنے اور وقت پر جمع کرنے سے محروم نہ ہو جائے یا غلط فارم بھرنے کی وجہ سے آنے والے دن میں پریشانی کا شکار نہ ہو؛چنانچہ امیر شریعت بہار،اڈیشہ وجھارکھنڈ مفکر ملت حضرت مولانا احمدو لی فیصل رحمانی مدظلہ کی ہدایت ،ناظم امارت شرعیہ مولانا مفتی محمد سعید الرحمٰن قاسمی ومولانا انظار عالم قاسمی صدر قاضی شریعت کے مشورہ اور تنظیم امارت شرعیہ کے انچارج مولانا مفتی محمد سہراب ندوی قاسمی نائب نائب ناظم امارت شرعیہ اوران کے رفقاء کے تعاون سے پورے جھارکھنڈ کےلئے ۲۴؍اضلاع کو ۱۱؍ٹیموں کے درمیان تقسیم کر کے ہر ٹیم کے لئے قائد اور معاونین طے کر نے کے بعد تین دن قبل جھارکھنڈ کے متعلقہ اضلاع میںٹیمیں روانہ کی جاچکی ہیں اور یہ ٹیمیں اپنے مفوضہ کاموں میں سرگرم عمل بھی ہو چکی ہے ،ان ٹیموں کے ذریعہ اب تک جو رپورٹس موصول ہو رہی ہیں وہ نہایت ہی امید افزا ہیں ،ان ٹیموں کے ذریعہ پریشان حال لوگوں کی اچھی مدد ہو رہی ہے ،یہ ٹیمیں بلاک وار پروگرام کے اعتبار سے گاؤں تک پہونچ کر لوگوں سے حالات دریافت کرتی ہیں اور ادھورے کاموں کو مکمل کرنے کے لئے نوجوانوں کی ٹیم کو سرگرم اور بی ایل اوز سے رابطہ کرتی ہے ۔
بلاک کی سطح پر ایک’’ ہیلپ ڈیسک‘‘ کا قیام عمل میں لایا جاتا ہے تاکہ جوکاغذی دشواریاں ہیں ان کا حل سمجھایا جاسکے ،پورے جھارکھنڈ کی سطح پر رانچی میں واقع امارت شرعیہ کے دارالقضاء کے دفتر میں ایک ’’ہیلپ سینٹر‘‘ بھی قائم کیا گیا ہے ،جہاں ایس آئی آر کے سلسلہ میں ضروری معلومات رکھنے والے کئی افراد متعین کیے گئے ہیں، تاکہ ان کے ذریعہ ضروری رہنمائی کا کام آن لائن انجام پاتا رہے ،خود حضرت امیر شریعت مدظلہ اور ناظم امارت شرعیہ ان ٹیموں کی کارکردگی کاروزانہ جائزہ لیتے ہیں اور یہ حضرات بھی تحریری رپورٹ کے ذریعہ اپنی کارکردگی سے مطلع کرتے ہیں ،اس وقت مولانا مفتی انور قاسمی قاضی شریعت رانچی ضلع رانچی و کھونٹی ۔ مولانا مفتی سہیل اختر قاسمی نائب قاضی شریعت مرکزی دارالقضاء پٹنہ ضلع گڈا و دمکا۔جناب مولانا احمد حسین قاسمی مدنی معاون ناظم امارت شرعیہ ضلع دیوگھر و جامتاڑا۔جناب مولانا قمر انیس قاسمی معاون ناظم امارت شرعیہ ضلع مشرقی و مغربی سنگھ بھوم اور ضلع کھرساواں۔جناب مولانا مفتی قیام الدین قاسمی ضلع صاحب گنج و پاکوڑ۔جناب ڈاکٹر حفظ الرحمٰن صاحب ضلع لوہردگا و گملا۔جناب مولانا اکرام الدین قاسمی ضلع لاتیہار،پلاموں و گڑھوا۔جناب مولانا محمد شاہد قاسمی قاضی شریعت دھنباد ضلع دھنباد و بوکارو۔جناب مولانا ضمیرالدین قاسمی ضلع گریڈیہہ و کوڈرما۔ جناب مولاناکلیم اللہ مظہر قاسمی ضلع رامگڈھ و ہزاری باغ اور جناب مولانا مختار قاسمی ضلع سمڈیگا کی ٹیم کی قیادت کر رہے ہیں ۔بیداری اور تعاون کا یہ عمل ان شاءاللہ پہلے مرحلہ میں ۲۹ ؍جولائی تک جاری رہے گااور اس کے بعد ناموں کےجائزہ کے عمل میں بھی تعاون دیا جائے گااور اللہ نے چاہا تو فہرست کے شائع ہونے تک مکمل نگرانی رکھی جائے گی تاکہ حکومتی اصول وشرائط کے مطابق ہر مستحق شہری کا نام لسٹ میں شامل رہ سکے۔
اور وہ آئندہ دنوں میں دشواری و پریشانی میں مبتلا نہ ہوں ، یہ اطلاع دفتر نظامت امارت شرعیہ پھلواری شریف پٹنہ سے جناب مولانا محمد شارق رحمانی صاحب نے دی ۔