(پی این این)
پریاگ راج: اتر پردیش میں پریاگ راج کے میجا تحصیل علاقے میں منگل کی رات آنے والے تیز آندھی اور طوفان نے عام زندگی کو درہم برہم کر دیا۔ تیز ہواؤں کی وجہ سے کئی مقامات پر درخت گر گئے، جس سے اہم راستوں پر آمدورفت (ٹریفک) معطل ہو گئی اور لوگوں کو مشکلات کا سامنا کرنا پڑا۔
وکاس کھنڈ اروا کے سوراؤں گاؤں کے پاس میجا روڈ-بایاں سرسا مارگ پر انڈر پاس پلیا کے قریب ایک بڑا نیم کا درخت سڑک پر گر گیا۔ اس سے یہ راستہ پوری طرح بند ہو گیا۔ راہگیروں اور گاڑیوں کے ڈرائیوروں کو لمبا چکر لگا کر اپنی منزل تک پہنچنا پڑا، جبکہ کئی گاڑیاں دیر تک جام میں پھنسی رہیں۔ اسی طرح پوسیا چوہان کے پاس بھی درخت گرنے سے آمدورفت متاثر ہوئی۔میجا روڈ ریلوے اسٹیشن محلے کے رہائشی بھولا گپتا کا ٹھیلہ تیز آندھی میں پلٹ گیا، جس سے انہیں معاشی نقصان پہنچا۔ تیز ہواؤں اور دھول بھری آندھی کی وجہ سے لوگ اپنے گھروں میں ہی قید رہے۔
آندھی اور طوفان کے باعث علاقے میں بجلی کی سپلائی بھی معطل ہو گئی۔ کئی مقامات پر درخت گرنے سے صورتحال مزید سنگین بنی ہوئی ہے۔آندھی کے بعد ہونے والی ہلکی بارش سے حبس والی گرمی سے کچھ راحت ملی۔ موسم میں ٹھنڈک آنے سے لوگوں نے تھوڑا سکون محسوس کیا، لیکن طوفان سے ہونے والے نقصان نے ان کی مشکلات میں اضافہ کر دیا ہے۔

(پی این این)
بہرائچ:اتر پردیش کے ضلع بہرائچ میں ایک المناک سڑک حادثے کے نتیجے میں چار افراد ہلاک جبکہ دس دیگر زخمی ہو گئے۔ یہ دردناک حادثہ اس وقت پیش آیا جب ایک تیز رفتار ٹرک اور مسافر بس کے درمیان آمنے سامنے شدید تصادم ہو گیا۔
موصولہ اطلاعات کے مطابق ریاستی ٹرانسپورٹ کی ایک مسافر بس لکھنؤ سے روپئیڈیہا جا رہی تھی۔ بس جب بہرائچ کے بھگوان پور چوراہے کے قریب پہنچی تو سامنے سے آنے والے ایک بے قابو اور تیز رفتار ٹرک نے اسے زور دار ٹکر مار دی۔ حادثے کی شدت اس قدر زیادہ تھی کہ بس اور ٹرک دونوں بری طرح تباہ ہو گئے۔ تصادم کے نتیجے میں بس میں سوار متعدد مسافر شدید زخمی ہو گئے، جبکہ چار افراد موقع پر ہی یا دورانِ علاج جان کی بازی ہار گئے۔
حادثے کی اطلاع ملتے ہی ہرڈی پولیس، ضلعی انتظامیہ اور امدادی ٹیمیں فوری طور پر موقع پر پہنچ گئیں۔ ریسکیو کارروائی کے دوران زخمیوں کو گاڑیوں سے نکال کر فوری طبی امداد کے لیے کمیونٹی ہیلتھ سینٹر رمپوروا منتقل کیا گیا۔ اس کے بعد جن افراد کی حالت زیادہ نازک تھی، انہیں بہتر علاج کے لیے ضلع اسپتال اور بہرائچ میڈیکل کالج ریفر کر دیا گیا۔ ڈاکٹروں کے مطابق تین زخمیوں کی حالت انتہائی تشویشناک بنی ہوئی ہے اور انہیں خصوصی طبی نگرانی میں رکھا گیا ہے۔
بہرائچ کے پولیس سپرنٹنڈنٹ وشواجیت چودھری نے حادثے کی تصدیق کرتے ہوئے بتایا کہ ابتدائی اطلاعات کے مطابق چار افراد ہلاک اور دس زخمی ہوئے ہیں۔ انہوں نے کہا کہ زخمیوں کا علاج بہرائچ میڈیکل کالج میں جاری ہے، جہاں ڈاکٹروں اور طبی عملے کی ٹیمیں انہیں ہر ممکن طبی سہولت فراہم کر رہی ہیں۔ انتظامیہ متاثرہ خاندانوں کی مدد اور زخمیوں کے علاج کے لیے مسلسل اقدامات کر رہی ہے۔
بہرائچ پولیس کی جانب سے جاری بیان میں کہا گیا ہے کہ حادثے کے فوراً بعد تمام زخمیوں کو طبی امداد فراہم کی گئی اور سینئر پولیس و انتظامی افسران موقع پر موجود رہ کر صورتحال کی نگرانی کرتے رہے۔ پولیس نے حادثے کے بعد ٹریفک کی روانی بحال کرنے کے لیے بھی اقدامات کیے اور تباہ شدہ گاڑیوں کو سڑک سے ہٹا دیا گیا تاکہ آمد و رفت متاثر نہ ہو۔
پولیس نے مقدمہ درج کرکے حادثے کی وجوہات کی تحقیقات شروع کر دی ہیں۔ ابتدائی طور پر ٹرک کی تیز رفتاری اور بے قابو ہونے کو حادثے کی ممکنہ وجہ قرار دیا جا رہا ہے، لیکن حتمی نتیجہ مکمل تحقیقات کے بعد سامنے آئے گا۔ اس افسوسناک حادثے کے بعد علاقے میں سوگ کی فضا پائی جا رہی ہے، جبکہ مقامی انتظامیہ نے عوام سے ٹریفک قوانین کی پابندی اور محتاط ڈرائیونگ کی اپیل کی ہے تاکہ ایسے جان لیوا حادثات سے بچا جا سکے۔

(پی این این)
علی گڑھ: علی گڑھ مسلم یونیورسٹی کے مختلف شعبوں اور اداروں نے عالمی یومِ ماحولیات کے موقع پر شجرکاری مہمات اور بیداری پروگراموں کا اہتمام کیا۔ملک گیر مہم ’ایک پیڑ ماں کے نام‘ کے تحت فیکلٹی آف لاء نے ڈین فیکلٹی آف لاء پروفیسر شکیل احمد کی قیادت میں شجرکاری مہم کا اہتمام کیا، جس کے تحت فیکلٹی کے احاطے میں 10 پودے لگائے گئے۔
اس موقع پر پروفیسر حشمت علی خان، پروفیسر رحمت اللہ، پروفیسر علی نواز زیدی، پروفیسر ظفر احمد خان، ڈاکٹر رباب خان، ڈاکٹر محب انور، ڈاکٹر گورو، ڈاکٹر ایس ایم یاور، ڈاکٹر شہاب شبیر اور ڈاکٹر صدام حسین سمیت متعدد اساتذہ موجود تھے۔ اس مہم کے ذریعہ حیاتیاتی تنوع کے تحفظ، پائیدار ترقی اور ماحولیات کے تحفظ کے تئیں اجتماعی ذمہ داری کی اہمیت کو اجاگر کیا گیا۔
جواہر لعل نہرو میڈیکل کالج کے شعبہ فزیالوجی نے پروفیسر گل آر نبی خان، چیئرپرسن، شعبہ فزیالوجی کی قیادت میں شجرکاری پروگرام کا اہتمام کیا جس میں اساتذہ، ریزیڈنٹ ڈاکٹروں اور غیر تدریسی عملے کے اراکین نے شرکت کی۔ پروفیسر خان نے تمام شرکاء کے تعاون کو سراہتے ہوئے ماحولیاتی تحفظ اور پائیداری کے تئیں شعبے کے عزم کا اعادہ کیا۔
اے ایم یو گرلز اسکول میں بھی قائم مقام پرنسپل محترمہ الکا اگروال کی نگرانی میں شجرکاری پروگرام منعقد کیا گیا۔ اساتذہ، غیر تدریسی عملے کے اراکین اور طالبات نے کیمپس کے مختلف مقامات پر پودے لگائے۔ طالبات سے خطاب کرتے ہوئے محترمہ اگروال نے قدرتی وسائل کے تحفظ اور صاف ستھرے و صحت مند ماحول کی اہمیت پر زور دیا۔