(پی این این)
پٹنہ:بہار کے نائب وزیر اعلیٰ اور وزیر برائے آبی وسائل وجے کمار چودھری نے متعلقہ حکام کو سخت ہدایات جاری کرتے ہوئے کہا ہے کہ ریاست میں ممکنہ سیلاب اور خشک سالی (قحط سالی) کی صورتحال سے نمٹنے کے لیے تمام تر تیاریاں مقررہ وقت سے پہلے اور بہترین معیار کے ساتھ مکمل کی جائیں۔
سنچائی بھون کے آڈیٹوریم میں منعقدہ ایک اعلیٰ سطحی جائزہ اجلاس کی صدارت کرتے ہوئے نائب وزیر اعلیٰ نے واضح کیا کہ کام مکمل کرنے کی آخری تاریخ (ڈید لائن) کا انتظار کیے بغیر تمام ضروری حفاظتی اقدامات وقت سے پہلے مکمل کر لیے جائیں، تاکہ ضرورت پڑنے پر ان کا دوبارہ جائزہ لے کر خامیوں کو دور کیا جا سکے۔
وزیرِ آبی وسائل نے افسران کو خبردار کرتے ہوئے کہا”بہترین اور مخلصانہ کارکردگی کا مظاہرہ کرنے والے افسران ستائش کے مستحق ہوں گے، جبکہ فرائض میں جان بوجھ کر لاپرواہی اور سستی برتنے والوں کے خلاف سخت تادیبی کارروائی عمل میں لائی جائے گی۔”
اجلاس کے آغاز میں محکمہ آبی وسائل کے سکریٹری ڈاکٹر چندر شیکھر سنگھ نے نائب وزیر اعلیٰ وجے کمار چودھری کا استقبال کیا اور ریاست میں سیلاب کے انتظام اور آبپاشی کے نظام کو مضبوط بنانے کے لیے محکمے کی جانب سے کی جانے والی تیاریوں سے متعلق تفصیلی بریفنگ دی۔
جائزہ اجلاس کے دوران نائب وزیر اعلیٰ نے ریاست کے مختلف سیلاب سے متاثرہ اضلاع کی صورتحال کا جائزہ لیا۔ انہوں نے ندیوں کے کٹاؤ کو روکنے والے کاموں کی پیش رفت، بندوں کی مرمت اور دیکھ بھال، سیلاب سے بچاؤ کے ضروری سامان کی دستیابی اور انتہائی حساس مقامات کی چوبیس گھنٹے نگرانی کے حوالے سے تفصیلی تبادلہ خیال کیا اور موقع پر ہی ضروری احکامات جاری کیے۔

(پی این این)
بہار شریف:کندن کمار، ضلع مجسٹریٹ – نالندہ کی صدارت میں راجکیہ ملماس میلہ ۔2026 کے موقع پر تعینات مجسٹریٹس، پولیس افسران اور آپدا متروں کو ان کے فرائض و ذمہ داریوں کی بروقت انجام دہی کے لیے بریفنگ دی گئی۔
بریفنگ کے دوران بنیادی طور پر میلے کے علاقے میں امن و امان، آفات کے انتظام اور ہنگامی حالات سے نمٹنے کے لیے متعلقہ افسران کے ذریعے ماک ڈرل بھی کی گئی۔آئندہ مل ماس میلہ 17 مئی 2026 سے 15 جون 2026 تک راجگیر میں منعقد ہوگا۔ اس موقع پر عقیدت کے ساتھ بڑی تعداد میں لوگ برہم کنڈ میں غسل کے لیے دور دراز سے یہاں پہنچتے ہیں۔میٹنگ میں راجکیہ مل ماس میلہ 2026 کے دوران عقیدت مندوں کی بھاری بھیڑ کو مدنظر رکھتے ہوئے سیکیورٹی، ٹریفک کنٹرول، ہجوم کے انتظام، پارکنگ کا نظام، طبی سہولت، پینے کا پانی، صفائی، روشنی کا انتظام، فائر فائٹنگ، آفات کے انتظام اور مواصلاتی نظام سمیت مختلف انتظامی نکات پر تفصیل سے تبادلہ خیال کیا گیا۔ضلع عہدیدار نے تمام تعینات مجسٹریٹس اور متعلقہ محکمہ جاتی افسران کو ہدایت دی کہ میلے کے دوران اپنے فرائض و ذمہ داریوں کی انجام دہی مکمل چوکسی اور ذمہ داری کے ساتھ یقینی بنائیں، تاکہ عقیدت مندوں کو کسی قسم کی تکلیف نہ ہو۔
تمام پولیس افسران کو حساس مقامات پر خصوصی نگرانی رکھنے، سماج دشمن عناصر پر کڑی نظر رکھنے اور خواتین کی حفاظت کو اولین ترجیح دینے کی ہدایت دی۔انہوں نے کہا کہ میلے کے علاقے میں کافی تعداد میں پولیس فورس کی تعیناتی کی جائے گی اور سی سی ٹی وی کیمروں اور ڈرون کے ذریعے بھی نگرانی کا انتظام یقینی بنایا گیا ہے۔میٹنگ کے دوران آپدا متروں اور ریلیف-ریسکیو ٹیموں کو ممکنہ ہنگامی حالات جیسے بھگدڑ، آگ لگنے، آبی حادثات اور دیگر قدرتی یا انسانی آفات سے نمٹنے کے لیے ضروری ہدایات دی گئیں۔ اس کے بعد منعقد ماک ڈرل میں ریلیف اور بچاؤ کے کاموں کا عملی مظاہرہ کیا گیا، جس میں آپدا متروں، پولیس فورس، محکمہ صحت اور فائر بریگیڈ نے مربوط طریقے سے حصہ لیا۔
ضلع عہدیدار نے کہا کہ راجکیہ مل ماس میلہ نالندہ ضلع کی مذہبی اور ثقافتی شناخت کا اہم انعقاد ہے۔ انتظامیہ کی ترجیح عقیدت مندوں کی حفاظت، سہولت اور آسان آمدورفت کو یقینی بنانا ہے۔ اس کے لیے تمام محکموں کے درمیان بہتر تال میل قائم کرتے ہوئے کام کیے جا رہے ہیں۔میٹنگ میں سب ڈویژنل آفیسر، سب ڈویژنل پولیس آفیسر، مختلف محکموں کے سینئر افسران، مجسٹریٹس، پولیس افسران اور بڑی تعداد میں آپدا متر وغیرہ موجود تھے۔

(پی این این)
بہار شریف:بہار کے سابق وزیر اعلیٰ نتیش کمار اور ان کے بیٹے وزیر صحت نشانت کمار جمعرات کی صبح 10 بجے اپنے آبائی گاؤں ہرناوت کے کلیان بیگھا پہنچے۔ وزارت اعلیٰ کے عہدے سے استعفیٰ دینے اور راجیہ سبھا رکن بننے کے بعد یہ ان کا اپنے آبائی گاؤں کا پہلا دورہ ہے۔نتیش کمار اور نشانت کمار نے گاؤں کے دیوی مندر میں پوجا ارچنا کی۔ اس کے بعد رام لکھن سنگھ اسمرتی واٹیکا احاطے میں پہنچ کر نتیش کمار نے اپنی اہلیہ مرحومہ منجو دیوی کو خراج عقیدت پیش کیا۔ بتادیں کہ آج ان کی اہلیہ کی 19ویں برسی ہے۔
قابل ذکر ہے کہ جب نتیش کمار وزارت اعلیٰ کے عہدے پر تھے تو مقامی لوگ ہزاروں کی تعداد میں انہیں درخواست دینے کے لیے کلیان بیگھا پہنچتے تھے لیکن اس بار کچھ الگ منظر دیکھنے کو ملا۔ اس بار محض درجنوں درخواستیں دیہاتیوں نے سابق وزیر اعلیٰ کو سونپی ہیں۔
موصول درخواستوں کے ازالے کے لیے نتیش کمار نے ضلع عہدیدار کندن کمار کو جانچ کرنے کی ہدایت دی۔اس دوران ان کے ساتھ دیہی ترقی کے وزیر شروان کمار، نالندہ کے رکن پارلیمان کوشلیندر کمار اور ضلع کے تمام عوامی نمائندے بھی موجود رہے۔ اسی دوران نتیش کمار زندہ باد کے نعرے لگے۔ اور سائلوں کی فریاد بھی سنی۔
ہرناوت کے سابق رکن اسمبلی انجینئر سنیل کمار نے بتایا کہ سابق وزیر اعلیٰ کا یہ دورہ مکمل طور پر نجی اور خاندانی تھا، لیکن گاؤں والوں اور حامیوں کی محبت کو دیکھتے ہوئے خصوصی انتظامات کیے گئے تھے۔ انہوں نے بتایا کہ پہلے کی طرح اس بار بھی نتیش کمار نے اپنے کردار کو پیش کیا۔ان کی آمد کے پیش نظر کلیان بیگھا گاؤں میں سیکیورٹی کے پختہ انتظامات کیے گئے تھے۔ اور پورے گاؤں کو محرابی دروازوں اور پھولوں سے سجایا گیا تھا۔ نتیش کمار کے بیٹے وزیر صحت نشانت کمار تقریباً ایک گھنٹے تک کلیان بیگھا گاؤں میں واقع اپنے مکان میں رکے۔ اور مقامی کارکنوں سے ملاقات کی۔
وہیں موقع پر استھاواں کے رکن اسمبلی ڈاکٹر جتیندر کمار، اسلام پور کے رکن اسمبلی روشن رنجن، رکن اسمبلی کے بیٹے و جے ڈی یو ضلع نائب صدر انیل سنگھ، جے ڈی یو بلاک صدر روی کانت کمار، جے ڈی یو کارکن ککّو سنگھ، انجینئر روی شنکر، سنتوش کمار سنگھ، روہت سنگھ، کشیشور سنگھ، سونو کمار، اروند سنگھ، منا جی، ہرناوت نگر پنچایت کے چیف کونسلر نمائندہ دھیرج کمار عرف پلّو سنگھ، ہرناوت تجارت منڈل صدر دلیپ سنگھ، صدر ڈی ایس پی 2 سنجے کمار جیسوال، بہار شریف ڈی ایس پی نورالحق، ہرناوت تھانہ انچارج مکیش کمار ورما، کلیان بیگھا تھانہ انچارج نشا کماری، بی ڈی او ڈاکٹر پنکج کمار، سی او پوجا کماری، ایگزیکٹو آفیسر سوربھ سمن، میڈیکل انچارج ڈاکٹر راجیو رنجن سنہا، ڈاکٹر راکیش کمار، نوین کمار، سورج کمار سمیت سینکڑوں لوگ موجود تھے۔