(پی این این)
لکھنؤ: اتر پردیش میں جمعہ کو کئی مقامات پر آندھی، گرج چمک اور بارش کے امکان کے درمیان محکمہ موسمیات نے آنے والے دنوں میں شدید گرمی اور لو چلنے کی وارننگ جاری کی ہے۔ محکمہ موسمیات کے مطابق 18 اور 19 مئی کو ریاست کے کئی حصوں میں شدید گرم لہر چل سکتی ہے۔
لکھنؤ کے محکمہ موسمیات کی جانب سے جاری یومیہ روزانہ رپورٹ کے مطابق 15 مئی کو مغربی اور مشرقی اتر پردیش کے کچھ مقامات پر گرج چمک کے ساتھ بارش اور بوندا باندی کا امکان ہے۔ اس دوران 40 سے 50 کلومیٹر فی گھنٹہ کی رفتار سے تیز ہوائیں چل سکتی ہیں جن کی رفتار بڑھ کر 60 کلومیٹر فی گھنٹہ تک پہنچ سکتی ہے۔ اس کے ساتھ ہی بادلوں کی گرج اور بجلی گرنے کا بھی خدشہ ظاہر کیا گیا ہے۔محکمہ موسمیات کے مطابق 16 مئی سے ریاست میں موسم بنیادی طور پر خشک رہنے لگے گا۔ تاہم جنوبی علاقوں میں کہیں کہیں لو چلنے کا امکان برقرار رہے گا۔ 17 مئی کو بھی ریاست کے مختلف حصوں میں گرم لہر کا اثر دیکھنے کو مل سکتا ہے۔ بلیٹن کے مطابق 18 اور 19 مئی کو مغربی اور مشرقی اتر پردیش کے کئی علاقوں میں شدید گرم لہر کی صورتحال بن سکتی ہے۔
محکمہ موسمیات نے لوگوں کو دوپہر کے وقت زیادہ محتا رہنے اور بلا ضرورت دھوپ میں باہر نہ نکلنے کا مشورہ دیا ہے۔ 20 اور 21 مئی کو مغربی اتر پردیش میں موسم خشک رہنے کی توقع ہے جبکہ مشرقی اتر پردیش کے کچھ مقامات پر گرج چمک کے ساتھ ہلکی بارش ہو سکتی ہے۔ ان دنوں جنوبی علاقوں میں کہیں کہیں لو چلنے کا امکان رہے گا۔
محکمہ موسمیات نے لوگوں سے آندھی اور بجلی گرنے کے دوران کھلے مقامات پر نہ رکنے، درختوں کے نیچے پناہ نہ لینے اور بجلی کے آلات سے دوری بنائے رکھنے کی اپیل کی ہے۔ اس کے ساتھ ہی گرمی اور لو سے بچاؤ کے لیے وافر مقدار میں پانی پینے اور دھوپ سے ہر طرح سے بچنے کا مشورہ دیا گیا ہے۔

(پی این این)
امروہہ:جامع مسجد امروہہ پر نماز جمعہ سے قبل معروف عالم دین، شیخ الحدیث، صدر جمعیت علماء اتر پردیش حضرت مولانا مفتی سیّد محمد عفان منصور پوری صاحب نے قربانی کے فضائل، اہمیت اور مسائل پر نہایت مدلل اور ایمان افروز خطاب فرمایا۔ کثیر تعداد میں موجود حاضرین کو خطاب کرتے ہویے فرمایا کہ قربانی حضرت ابراہیم علیہ السلام اور حضرت اسماعیل علیہ السلام کی عظیم سنت ہے، جس کے ذریعے بندہ اپنے رب کے سامنے کامل اطاعت اور تسلیم و رضا کا عملی مظاہرہ پیش کرتا ہے۔
انہوں نے کہا کہ قربانی صرف جانور ذبح کرنے کا نام نہیں بلکہ یہ جذبۂ ایثار، تقویٰ اور اللہ تعالیٰ کی رضا حاصل کرنے کا بہترین ذریعہ ہے۔انہوں نے قرآن و حدیث کی روشنی میں قربانی کی فضیلت بیان کرتے ہوئے فرمایا کہ نبی کریم صلی اللہ علیہ وسلم نے اپنی پوری حیات مبارکہ میں قربانی کا اہتمام فرمایا اور امت کو بھی اس عظیم عبادت کی تاکید فرمائی۔ مولانا نے کہا کہ صاحبِ نصاب مسلمان پر قربانی واجب ہے اور اس عبادت کو محض رسم یا دکھاوے کے طور پر انجام دینا اس کی روح کے خلاف ہے۔اپنے خطاب میں مولانا عفان منصور پوری نے قربانی کے اہم مسائل بھی تفصیل سے بیان کیے۔
انہوں نے فرمایا کہ قربانی کا جانور صحت مند، عیب سے پاک اور شرعی اصولوں کے مطابق ہونا چاہیے۔ انہوں نے قربانی کے ایام، جانور کی عمر، حصے داری، نیت کی درستگی اور گوشت کی تقسیم جیسے مسائل پر عوام کی رہنمائی فرمائی۔
انہوں نے تاکید کی کہ قربانی کے دوران صفائی ستھرائی، نظم و ضبط اور پڑوسیوں کے حقوق کا خاص خیال رکھا جائے تاکہ اسلام کی بہترین تعلیمات دنیا کے سامنے پیش کی جا سکیں۔ مفتی عفان نے موجودہ حالات کا ذکر کرتے ہوئے مسلمانوں کو اتحاد، اخوت اور دینی شعور اپنانے کی نصیحت کی۔ انہوں نے فرمایا کہ مسلمانوں کو اپنی عبادات کے ساتھ ساتھ اخلاق و کردار کو بھی بہتر بنانا چاہیے، کیونکہ اسلام امن، محبت اور انسانیت کا درس دیتا ہے۔ نماز جمعہ کے بعد ملک و ملت کی سلامتی، اتحادِ امت اور عالم اسلام کے امن و استحکام کے لیے خصوصی دعا کی گئی۔

(پی این این)
لکھنؤ/بھوپال/نئی دہلی:اترپردیش میں 80 کلو میٹر کی رفتار سے طوفان آگیا، جس میں ایک شخص ہوا میں اڑ گیا اور شدید زخمی ہوگیا۔ آندھی طوفان کی رفتار کے تحت کئی حادثے ہوئے جس میں 110 لوگوں کی موت ہوگئی۔ بریلی میں ایک مکان گرگیا جس میں کئی لوگ دب گئے۔
اترپریش کے کئی اضلاع میں آندھی اور بارش نے زبردست تباہی مچائی۔ تیز آندھی کے سبب درخت اور بجلی کے کھمبے گر گئے جس سے کئی جگہ بجلی سپلائی معطل ہو گئی۔ خراب موسم کی وجہ سے ریاست کے مختلف اضلاع میں 110 لوگوں کی موت بھی ہو گئی جبکہ کئی لوگ زخمی ہوئے ہیں۔ سب سے زیادہ وارانسی، پریاگ راج اور کانپور ڈویزن میں َلوگوں کی موت ہوئی ہے۔
دیہی علاقوں میں کچے مکان اور ٹین شیڈ اُڑ گئے وہیں فصلوں کو کافی نقصان ہوا ہے۔ تیز بارش اور دھول بھری آندھی کی وجہ سے سڑکوں پر آمد و رفت متاثر رہی۔ کئی جگہ درخت گرنے سے ٹریفک میں رخنہ پڑا ہے۔ جو خبریں سامنے آ رہی ہیں ان کے مطابق بھدوہی میں 18، اناؤ اور بدایوں میں 6-6، سیتاپور، رائے بریلی، چندوسی، کانپور دیہات، ہردوئی اور سنبھل میں 2-2، کوشامبی، شاہجہاں پور، سون بھدر اور لکھیم پور کھیری میں 1-1 شخص کی موت خراب موسم کے سبب ہوئی ہے۔
آندھی کی وجہ سے دہلی-ہاوڑا ریلوے روٹ میں تقریباً ڈیڑھ گھنٹے کے لئے رخنہ پڑا۔ وہیں فتح پور میں درخت گرنے سے او ایچ ای لائن ٹوٹ گئی۔ جس کی وجہ سے کانپور ہوکر آنے جانے والی 22 ٹرینیں متاثر ہوئیں۔
وہیں پریاگ راج۔جونپور ریل سیکشن پر تھروئی اور سرائے چنڈی ریلوے اسٹیشن کے درمیان ایک 4 بڑا درخت گرگیا جس سے ٹرینوں کی آمد و رفت ٹھپ ہوگئی۔ لکھنؤ اور پرتاپ گڑھ روٹ پر بھی کافی اثر پڑا۔وزیراعلیٰ یوگی آدتیہ ناتھ نے ریاست میں بے موسم بارش، آندھی اور بجلی گرنے سے ہوئے نقصان پر متاثرین کو معاوضہ دینے کا حکم دیا ہے۔
انہوں نے کہا کہ متاثرین کو راحت پہنچانے کا کام 24 گھنٹے کے اندر پورا کیا جائے۔ انہوں نے ضلع مجسٹریٹوں سمیت دیگر محکموں کے افسران کو موقع پر پہنچ کر متاثرین کو ہر ممکن مدد پہنچانے کی ہدایت دی ہے۔ انہوں نے کہا کہ اس کام میں لاپرواہی برداشت نہیں کی جائے گی۔
دریں اثنا راجستھان میںتیز گرمی اور ہیٹ ویو کا قہر جاری ہے۔ جیسلمیر میں درجہ حرارت 46 ڈگری پار کرگیا ہے۔ اسی طرح بیکانیر ، جوت پور، جیسلمیر ، باڑمیر میں گرمی کا ریڈ الرٹ جاری کردیا گیا۔ راجستھان کے 13اضلاع میں ہیٹ ویو کی وارننگ دی گئی ہے۔ مدھیہ پردیش کے 25 اضلاع میں ہیٹ ویو چل رہی ہے۔ اندور ، اجین ، دھار ، رتلام میں درجہ حرارت 45 پار کر گیا ہے۔ یہاں بھی الرٹ جاری کردیا گیا ہے۔