نئی ہدلی :دہلی کی پانی کی قلت کو دور کرنے کے لیے حکومت نے مونک نہر سے آنے والے پانی کے لیے پائپ لائن بچھانے کا فیصلہ کیا ہے۔ وزیر اعلیٰ ریکھا گپتا نے کہا کہ اس سے منک نہر سے لیکیج اور چوری کا عملاً خاتمہ ہو جائے گا، اور دہلی کو ہریانہ سے چھوڑا جانے والا سارا پانی ملے گا۔ وزیر اعلیٰ نے کہا کہ یہ پائپ لائن ہریانہ حکومت بچھائے گی، جبکہ دہلی حکومت خرچ برداشت کرے گی۔معلومات کے مطابق مونک نہر دہلی میں پانی کی سپلائی کا اہم ذریعہ ہے۔ خام پانی سیدھے حیدر پور واٹر ٹریٹمنٹ پلانٹ میں جاتا ہے، جہاں اسے ٹریٹ کیا جاتا ہے اور پھر لوگوں کے گھروں کو بھیجا جاتا ہے۔ یہ پانی شمال مغربی، مغربی، بیرونی اور جنوب مغربی دہلی کے کچھ حصوں کو فراہم کیا جاتا ہے۔منک نہر کے ذریعے روزانہ تقریباً 700 کیوسک پانی ہریانہ سے دہلی بھیجا جاتا ہے، لیکن اس پانی کا ایک بڑا حصہ بار بار لیک ہونے کی وجہ سے ضائع ہو جاتا ہے۔ مزید برآں، بہت سی جگہوں پر لوگ راستے میں پانی کے ٹینکر بھرتے ہیں اور یہاں سے پانی پہنچاتے ہیں۔ پانی کی چوری اور ضیاع کی مقدار بعض اوقات 30 سے40 فیصد تک پہنچ جاتی ہے۔ اس کے نتیجے میں دہلی کے مختلف علاقوں میں پانی کی قلت ہے۔ اس مسئلے سے نمٹنے کے لیے دہلی حکومت نے مونک نہر سے پائپ لائن کے ذریعے پانی لانے کا فیصلہ کیا ہے۔مونک کینال 102 کلومیٹر طویل واٹر چینل ہے، جس میں سے 17 کلومیٹر دہلی میں ہے۔ وزیر اعلیٰ نے کہا کہ مونک نہر کے لیے ہریانہ حکومت کی زمین ہے۔ اس لیے یہ فیصلہ کیا گیا ہے کہ ہریانہ حکومت پانی کے لیے پائپ لائن بچھائے گی۔ دہلی حکومت فنڈ فراہم کرے گی۔ ذرائع سے پتہ چلتا ہے کہ اس پروجیکٹ پر تقریباً 7,000 کروڑ روپے لاگت آنے کی امید ہے۔

نئی دہلیـ: دہلی پردیش بھارتیہ جنتا پارٹی (بی جے پی) نے پنجاب میں ہوئے پیپر لیک معاملے پر یہاں عام آدمی پارٹیکے دفتر کے باہر مظاہرہ کیا اور گرفتاریاں دیں۔دہلی بی جے پی کے صدر ہرش ملہوترا کی قیادت میں پارٹی کارکنان نے پنجاب کے وزیرِ تعلیم سردار ہرجوت سنگھ بینس کی برطرفی کے مطالبے کے حق میں یہاں کے کیننگ لین میں واقع عآپ کے دفتر کے باہر مظاہرہ کیا۔ اس دوران پولیس بی جے پی کارکنان کو حراست میں لے کر مندر مارگ تھانے گئی، جہاں سے انہیں ایک گھنٹے بعد تنبیہ کر کے چھوڑ دیا گیا۔مظاہرے میں رکنِ پارلیمنٹ یوگیندر چاندولیا، محترمہ کنول جیت سہراوت، محترمہ بانسری سوراج اور محترمہ سواتی مالیوال، پردیش جنرل سکریٹری وشنو متل، محترمہ یوگیتا سنگھ اور مسٹر موہن لال گہارا، پردیش عہدیدار پروین شنکر کپور، مسٹر راجیش بھاٹیا، مسٹر وجے سولنکی، مسٹر سنیل یادو، مسٹر کیلاش جین، مسٹر وکرم بدھوڑی، مسٹر گورو کھاری، ڈاکٹر انیل گپتا، سونا کماری، محترمہ ساریکا جین، مسٹر کوشل مشرا، محترمہ رچا پانڈے، مسٹر کرشن دیو سنگھ، مسٹر ابھیشیک ٹنڈن، سردار گر میت سنگھ سورا، محترمہ پروینا شرما، محترمہ ارچنا گپتا اور مسٹر شبھیندو شیکھر اوستھی سمیت کئی رہنما موجود تھے۔پارٹی کی یووا مورچہ کے صدر رجت چودھری، دیگر پسماندہ طبقات (او بی سی) مورچہ کے صدر رجت چودھری نیز پوروانچل مورچہ کے صدر سنتوش اوجھا کی قیادت میں تینوں مورچوں کے ہزاروں کارکنان نے حصہ لیا اور گرفتاریاں دیں۔ مسٹر متل نے کہا کہ ملک کے عوام بالخصوص نوجوان پنجاب میں پیپر لیک پر سابق وزیراعلیٰ اروند کیجریوال کی خاموشی سے حیران ہیں۔مسٹر ملہوترا نے کہا، “آج ہم یہاں عام آدمی پارٹی کے دوہرے کردار اور دوہری سیاست کو بے نقاب کرنے آئے ہیں۔ مرکز میں جب پیپر لیک کا مسئلہ آیا تو عآپ نے سب سے پہلے سڑک جام کی، ہنگامہ کیا اور مرکزی وزیرِ تعلیم سے استعفیٰ کا مطالبہ کیا۔ انہوں نے اخلاقیات پر تقریر کی، جوابدہی کا ڈھنڈورا پیٹا، لیکن میں پوچھتا ہوںعآپ سے کہ پنجاب میں گزشتہ 4.5 سال میں کیا ہوا؟”

(پی این این)
نئی: عام آدمی پارٹی کے قومی کنوینر اروند کیجریوال نے ای-20 کے خلاف قومی ٹاؤن ہال کو روکنے کی کوشش کرنے والی مودی حکومت پر سخت حملہ کیا ہے۔
انہوں نے کہا کہ مودی جی پولیس کے زور پر یکم اگست کو کانسٹی ٹیوشن کلب میں ہونے والے اس ٹاؤن ہال کو رکوانے کی کوشش کر رہے ہیں۔ لیکن یکم اگست کو ہی دوپہر 12 بجے سے ای-20 کے خلاف قومی ٹاؤن ہال منعقد ہوگا۔ انہوں نے بتایا کہ کانسٹی ٹیوشن کلب میں رقم جمع ہو چکی ہے، بکنگ کی رسید بھی کٹ چکی ہے، لیکن اب پولیس کلب سے بکنگ منسوخ کرنے کے لیے کہہ رہی ہے۔ جب کلب نے ایسا کرنے سے انکار کر دیا تو پولیس اب ہم سے اجازت لینے کو کہہ رہی ہے، حالانکہ انڈور سرگرمیوں کے لیے کسی اجازت کی ضرورت نہیں ہوتی۔ انہوں نے کہا کہ وزیراعظم کو ای-20 واپس لینا ہی پڑے گا۔ وزیراعظم اسے خاموشی سے واپس لے لیں، ورنہ عوام اسے واپس لینے پر مجبور کر دیں گے۔ آپ کے مرکزی دفتر میں پریس کانفرنس سے خطاب کرتے ہوئے اروند کیجریوال نے کہا کہ ہم نے اعلان کیا تھا کہ آئندہ ہفتے کی ہفتہ کو ای-20 کے خلاف قومی ٹاؤن ہال منعقد کریں گے، لیکن وہاں پولیس پہنچ گئی۔ مودی جی نے ٹاؤن ہال شروع ہونے سے پہلے ہی شکست تسلیم کر لی ہے اور پولیس کے ذریعے اسے رکوانے کی کوشش کر رہے ہیں۔ پہلے پولیس کانسٹی ٹیوشن کلب کے ذمہ داران کے پاس پہنچی اور کہا کہ انہیں اجازت یا منظوری نہ دی جائے۔ کلب کی جانب سے بتایا گیا کہ منظوری دی جا چکی ہے، رقم جمع ہو چکی ہے، رسید کٹ چکی ہے اور بکنگ بھی ہو چکی ہے۔جب پولیس نے بکنگ منسوخ کرنے کے لیے کہا تو کلب نے انکار کر دیا۔
اس کے بعد پولیس ہمارے پاس آئی اور کہنے لگی کہ اجازت حاصل کریں۔ اروند کیجریوال نے کہا کہ آج تک اس ملک میں کسی بھی انڈور سرگرمی کے لیے کبھی کوئی اجازت نہیں لی گئی۔ میں وزیراعظم جی سے پوچھنا چاہتا ہوں کہ وہ یہ بتا دیں کہ آخر کس چیز کی اجازت لینی ہے؟ کیا کھانے، پینے، نہانے اور سونے کے لیے بھی اجازت لینی ہوگی؟ انہوں نے وزیراعظم نریندر مودی سے کہا کہ پولیس کی یہ دھمکی مت دیں۔ عوام نے دکھا دیا ہے کہ وہ مودی جی کی پولیس سے نہیں ڈرتی۔ مودی حکومت زیادہ سے زیادہ لاٹھیاں ہی تو برسائے گی یا جیل ہی تو بھیجے گی، حکومت یہ سب کرکے دیکھ چکی ہے، لیکن اس ملک کی عوام اپنے موقف سے پیچھے ہٹنے والی نہیں ہے۔ وزیراعظم جی کو ای-20 واپس لینا ہی پڑے گا۔ وزیراعظم جی اسے خاموشی سے واپس لے لیں، ورنہ عوام اسے واپس لینے پر مجبور کر دے گی۔