(پی این این)
پٹنہ:بہار کے وزیر اعلیٰ سمراٹ چودھری نے منگل کو کہا کہ اگلے سال ڈاکٹر شیاما پرساد مکھرجی کے یومِ شہادت کے موقع پر ان کے نام سے ایک عظیم الشان نیا پارک عوام کے لیے وقف کیا جائے گا۔
مسٹر چودھری نے آج بھارتیہ جنتا پارٹی (بی جے پی) کے ریاستی دفتر میں بھارتیہ جن سنگھ کے بانی، ممتاز قوم پرست مفکر اور ماہرِ تعلیم ڈاکٹر شیاما پرساد مکھرجی کی برسی (یومِ شہادت) کے موقع پر منعقدہ خراجِ عقیدت تقریب سے خطاب کرتے ہوئے کہا کہ ڈاکٹر مکھرجی کی زندگی قومی مفاد، اکھنڈ بھارت اور ثقافتی خودداری کے لیے وقف تھی اور وہ سب کے لیے ایک عظیم تحریک کا سرچشمہ ہیں۔ انہوں نے کہا کہ ملک ان کی قومی خدمات اور قربانیوں کو ہمیشہ یاد رکھے گا۔
وزیر اعلیٰ نے کہا کہ پنڈت چانکیہ کے بعد اگر کسی رہنما نے اکھنڈ بھارت کے خواب کو حقیقت کا روپ دینے کی سمت میں کام کیا تو وہ ڈاکٹر شیاما پرساد مکھرجی تھے۔
انہوں نے کہا کہ ’’ایک ملک میں دو آئین، دو وزیر اعظم اور دو نشان نہیں چلیں گے‘‘ کا نعرہ بھارتیہ جن سنگھ کے بانی ڈاکٹر مکھرجی نے دیا تھا۔انہوں نے مزید کہا کہ جب ملک میں جمہوریت بحران کا شکار تھی تو جن سنگھ کے کارکنوں نے جمہوریت کے تحفظ کے لیے اپنی جماعت تک کو ضم کر دیا تھا اور بعد میں 1980 میں بھارتیہ جنتا پارٹی کا قیام عمل میں آیا۔مسٹر چودھری نے کہا کہ وزیر اعظم نریندر مودی نے جمہوریت کو مضبوطی فراہم کی ہے۔ 2019 میں ملک کے عوام نے انہیں اتنا مضبوط مینڈیٹ دیا کہ جموں و کشمیر سے دفعہ 370 کا خاتمہ ممکن ہو سکا۔ انہوں نے کہا کہ بی جے پی کے لیے سب سے پہلے ملک، پھر فرد اور اس کے بعد پارٹی کی اہمیت ہے۔وزیر اعلیٰ نے کہا کہ 1984 میں بی جے پی کے صرف دو ارکانِ پارلیمنٹ تھے، جبکہ 2014 میں پارٹی کے 282 ارکانِ پارلیمنٹ منتخب ہوئے۔
انہوں نے کہا کہ جس طرح سابق وزیر اعظم اٹل بہاری واجپائی کی قیادت میں متعدد جماعتوں کا اتحاد قائم ہوا تھا، اسی طرح آج وزیر اعظم نریندر مودی کی قیادت میں قومی جمہوری اتحاد (این ڈی اے) بھی مضبوطی کے ساتھ کام کر رہا ہے۔
انہوں نے مزید کہا کہ نریندر مودی کو ملک کے سب سے طویل عرصے تک منتخب رہنے والے وزیر اعظم ہونے کا اعزاز حاصل ہوا ہے۔اس تقریب میں سابق مرکزی وزیر اور رکنِ پارلیمنٹ رادھا موہن سنگھ، وزیر برائے محصولات و اراضی اصلاحات ڈاکٹر دلیپ کمار جیسوال، رکنِ اسمبلی رتنیش کشواہا، سابق رکنِ اسمبلی ہری بھوشن ٹھاکر بچول، سابق رکنِ اسمبلی پون جیسوال سمیت بڑی تعداد میں عوامی نمائندوں اور بی جے پی کارکنوں نے شرکت کی۔

(پی این این)
بیگو سرائے:ماہ مقدس محرم الحرام میں فعال ومتحرک نوجوان محمد مبشر عالم و محمد مدثر عالم کی مشترکہ قیادت میں طلبہ وطالبات کے اندر دینی تعلیمی بیدار ی کے تحت تکیہ بیگوسرائے میں ’’یک روزہ تربیتی ورکشاب‘‘ کا انعقاد ملی وسماجی رہنما جناب ماسٹر انوار احمد رحمانی رکن شوریٰ و عاملہ وٹرسٹی امارت شرعیہ کی صدارت میں کیا گیا۔
جامع مسجد تکیہ بیگوسرائے کے امام وخطیب جناب قاری عابد حسین عرفانی صاحب نے علمی ،دینی واخلاقی تربیتی محاضرہ پیش فرمایا۔ انہوں نے اپنے خطاب میں کہا کہ نوجوان نسل کو علم دین کے زیور سے آراستہ ہونا وقت کی اہم پکار ہے، اور اخلاقی اقدار کو اپنا کر ہی طلبہ و طالبات معاشرے کے اچھے شہری بن سکتے ہیں۔
انہوں نے محرم الحرام کی مناسبت سے گفتگو کرتے ہوئے کہا کہ یہ مہینہ ہمیں قربانی، حق گوئی اور باطل کے سامنے سر نہ جھکانے کا درس دیتا ہے، اس لیے نئی نسل کو اس ماہِ مقدس کے تاریخی و تربیتی پیغامات کو اپنی عملی زندگی میں نافذ کرنا چاہیے۔
ماسٹر انوار احمد رحمانی نے اپنے صدارتی خطاب میں تعلیم وتربیت کی اہمیت ،ضرورت ،معنویت اور افادیت پر سیر حاصل گفتگو فرمائی۔ انہوں نے کہا کہ کسی بھی قوم کی کامیابی کے لیے تعلیم کے ساتھ اچھی تربیت کا ہونا بھی بہت ضروری ہے۔ اس لیے والدین اور سرپرست اپنے بچوں کی تعلیمی و اخلاقی تربیت پر خصوصی توجہ دیں۔
انہوں نے مزید کہا کہ محرم الحرام ہمیں نیکی کا حکم دینے اور برائی سے روکنےاور اسلامی اقدار کے تحفظ کا پیغام دیتا ہےاور ہمیں اس نئے اسلامی سال کا آغاز تعلیمی و اصلاحی بیداری اور اپنے کردار و عمل کی درستگی کے پختہ عزم کے ساتھ کرنا چاہیے۔
اس موقع پر ملی وسماجی کارکنان ، خاص ماسٹر غیاث الدین رحمانی ،الحاج عبد الربان رحمانی ،الحاج نصیر احمد فاروقی ،الحاج عبد الجلیل صاحب ،محمد مرتضیٰ عالم صاحب سابق سرپنچ ،محمد شکیل کے علاوہ محلے کے نوجوانان اور خواتین حضرات بڑی تعداد میں موجود تھے ۔

(پی این این)
ارریہ:معروف ہندی روزنامہ پربھات خبر کی جانب سے ہر سال کی طرح اس سال بھی میٹرک اور انٹرمیڈیٹ سالانہ امتحان 2026 میں فرسٹ ڈویژن سے کامیاب ہونے والے طلبہ و طالبات کی حوصلہ افزائی کے لیے’پرتبھا سمان‘ تقریب کا شاندار انعقاد کیا گیا۔ ارریہ کے وجے وندنا ہال میں منعقدہ اس تقریب میں ضلع کے مختلف تعلیمی اداروں سے تعلق رکھنے والے تقریباً 500 ہونہار طلبہ و طالبات کو میڈل اور توصیفی اسناد پیش کرکے ان کی تعلیمی کامیابیوں کا اعتراف کیا گیا۔
تقریب میں طلبہ، والدین، اساتذہ، تعلیمی اداروں کے ذمہ داران اور سماجی شخصیات کی بڑی تعداد نے شرکت کی۔ اس موقع پر مقررین نے کہا کہ تعلیمی میدان میں نمایاں کارکردگی دکھانے والے طلبہ کی حوصلہ افزائی نہ صرف ان کے اعتماد میں اضافہ کرتی ہے بلکہ دوسرے طلبہ کے لیے بھی ایک مثبت مثال قائم کرتی ہے۔
اس دوران ضلع کے سینئر صحافی قمر عالم معصوم کی صحافتی اور سماجی خدمات کے اعتراف میں انہیں بھی خصوصی طور پر اعزاز سے نوازا گیا۔ ضلع تعلیمی افسر سنجے کمار اور ڈی پی او راشد نواز نے قمر عالم معصوم کو مومنٹو پیش کرتے ہوئے ان کی صحافت کے میدان میں خدمات کو سراہا۔ دونوں افسران نے کہا کہ قمر عالم نے صحافت کے ذریعے عوامی مسائل کو اجاگر کرنے اور تعلیمی و سماجی سرگرمیوں کو عوام تک پہنچانے میں اہم کردار ادا کیا ہے۔ اس موقع پر ضلع تعلیم افسر سنجے کمار نے کامیاب طلبہ کو مبارکباد دیتے ہوئے کہا کہ مسلسل محنت، نظم و ضبط اور اساتذہ و والدین کی رہنمائی ہی کامیابی کی کنجی ہے۔ انہوں نے طلبہ پر زور دیا کہ وہ مستقبل میں بھی اپنی صلاحیتوں کو نکھارتے ہوئے اعلیٰ مقامات حاصل کریں۔
ڈی پی او راشد نواز نے پربھات خبر کی اس پہل کو قابلِ ستائش قرار دیتے ہوئے کہا کہ ایسے پروگرام تعلیمی ماحول کو فروغ دینے اور طلبہ میں مثبت مسابقت پیدا کرنے میں اہم کردار ادا کرتے ہیں۔
انہوں نے کہا کہ معاشرے کی ترقی تعلیم یافتہ اور باصلاحیت نوجوانوں سے وابستہ ہے، اس لیے ان کی حوصلہ افزائی ضروری ہے۔ تقریب کے اختتام پر طلبہ و طالبات نے اس اعزاز پر خوشی کا اظہار کرتے ہوئے پربھات خبر اور منتظمین کا شکریہ ادا کیا۔ شرکاء نے امید ظاہر کی کہ مستقبل میں بھی ایسے پروگرام منعقد ہوتے رہیں گے تاکہ طلبہ کو بہتر کارکردگی کے لیے مزید ترغیب ملتی رہے۔