(پی این این)
پٹنہ: بہار کے وزیر اعلیٰ سمراٹ چودھری نے حکام کو ہدایت دی ہے کہ چمپارن خطے کو ملک کے اہم گنا پیدا کرنے والے علاقوں میں ترقی دینے کے لیے تیز رفتاری سے کام کیا جائے۔
وزیر اعلیٰ مسٹر چودھری نے آج لوک سیوک آواس میں واقع ’سنکلپ سبھاگار‘ میں محکمہ گنا صنعت کے جائزہ اجلاس میں حکام کو ریاست میں چینی صنعت کی بحالی، سرمایہ کاری کو فروغ دینے اورکسانوں کی آمدنی میں اضافے کے لیے ضروری اقدامات کرنے کی ہدایت دی۔
اجلاس میں وزیراعلیٰ مسٹر چودھری نے کہا کہ بہار میں گنا پر مبنی صنعتوں کی ترقی کے بے پناہ امکانات ہیں۔ انہوں نے رئیام، سکری، ساساموسا، مدھورا، موتی پور، سمستی پور، چکیا، چنپٹیا اور موتیہاری سمیت بن پڑی چینی ملوں والے علاقوں میں صنعتی سرگرمیوں کو دوبارہ زندہ کرنے کے لیے تیزی سے کام کرنے کی ہدایت دی۔ انہوں نے کہا کہ اس سے مقامی سطح پر روزگار کے مواقع میں اضافہ ہوگا اور کسانوں کو بھی براہِ راست فائدہ پہنچے گا۔مسٹرچودھری نے حکام سے کہا کہ چمپارن خطے کو ملک کے صفِ اول کے گنا پیدا کرنے والے علاقوں میں شامل کرنے کے لیے ایک خصوصی عملی منصوبہ تیار کیا جائے۔ گنا کی پیداوار اور پیداواریت میں اضافہ کے ساتھ کسانوں کو بہتر منڈیاں دستیاب کرانے کے لئے تمام ضروری اقدامات کیے جائیں۔
وزیر اعلیٰ نے بہار گنا صنعت فروغ پالیسی 2026 کے تحت زیادہ سے زیادہ سرمایہ کاری راغب کرنے، سرمایہ کاروں کی حوصلہ افزائی کرنے اور چینی صنعت کی جدیدکاری پر خصوصی توجہ دینے کی بھی ہدایت دی۔انہوں نے کہا کہ ریاستی حکومت کسانوں کی خوشحالی، صنعتی ترقی اور دیہی معیشت کو مضبوط بنانے کے لیے پُرعزم ہے اور گنا کے شعبے کی ہمہ جہت ترقی کے لیے ہر ممکن تعاون فراہم کرے گی۔

(پی این این)
ارریہ:بہار پردیش کانگریس کمیٹی کی ہدایت پر ارریہ ضلع کانگریس کمیٹی کے صدر معصوم رضا کی قیادت میں نیتا جی سبھاش اسٹیڈیم سے کلکٹریٹ تک پیدل مارچ نکالا گیا، جس میں NEET امتحان میں بے قاعدگیوں، مسلسل پیپر لیک ہونے، بڑھتی ہوئی مہنگائی، نوجوانوں کی بے روزگاری اور کسانوں کے ساتھ نا انصافی کے خلاف احتجاج کیا گیا۔ اس کے بعد چاندنی چوک پر دھرنا دیا گیا اور وزیر اعظم نریندر مودی کا پتلا جلایا گیا۔
اس موقع پر ضلع کانگریس کے صدر معصوم رضا نے کہا کہ آج ملک کا نوجوان اپنے مستقبل کو لے کر گہری بے چینی اور عدم تحفظ کے ماحول میں جی رہا ہے۔ NEET سمیت مختلف مسابقتی امتحانات میں مسلسل پیپر لیک ہونے اور بے ضابطگیوں نے لاکھوں محنتی طلباء کے خوابوں کو چکنا چور کر دیا ہے۔ مرکزی اور ریاستی حکومتیں نوجوانوں کو روزگار فراہم کرنے میں ناکام رہی ہیں جبکہ مہنگائی عام لوگوں کی کمر کچل رہی ہے۔ کسان اپنی پیداوار، کھاد، بیج اور آبپاشی جیسی بنیادی سہولتوں کی مناسب قیمت کے لیے جدوجہد کر رہے ہیں، لیکن ان کی آواز کو نظر انداز کیا جا رہا ہے۔
یوتھ لیڈر جے ڈی یادو نے کہا کہ کانگریس پارٹی نوجوانوں، طلباء، کسانوں اور عام لوگوں کے حقوق کے لیے سڑکوں سے لے کر اسمبلی کے ایوان تک لڑتی رہے گی۔ ہماری جدوجہد اس وقت تک جاری رہے گی جب تک پیپر لیک کے خلاف سخت کارروائی نہیں کی جاتی، نوجوانوں کو روزگار نہیں ملتا، کسانوں کو انصاف نہیں ملتا اور مہنگائی سے نجات نہیں ملتی۔ اس احتجاجی جلوس اور دھرنا میں عوام الناس کی بڑی تعداد سمیت کانگریس کے سیکڑوں کارکنان میں ششی بھوشن جھا، جے ڈی یادو، راجیش کمار یادو، الکا جھا، سنیل پاسوان، علیم الدین، ظفر الحسن، پرشانت کمار یادو، پون کشیپ، اظہار صابری، آنند موہن سنہا، شیوانند شاہ، متھلیش جھا، راجو پودر، راجپوت سنگھ، روشن سنگھ، راجو پودر، راجن سنگھ، نتیش، سفیان عالم، غفار عالم، یوتھ کانگریس کے قومی ترجمان ابو جعفر وغیرہ موجود تھے۔

(پی این این)
چھپرا :آل انڈیا یوتھ کانگریس کی سارن ضلع یونٹ کا ایک پریس کانفرنس منعقد کیا گیا۔کانفرنس میں یوتھ کانگریس کے ضلع الیکشن انچارج نریندر شرما،ضلع کانگریس صدر ڈاکٹر شنکر چودھری اور یوتھ کانگریس صدر سدھیر رائے موجود تھے۔
انہوں نے یوتھ کانگریس کی رکنیت سازی مہم اور تنظیمی انتخابی عمل کے بارے میں معلومات سے آگاہ کیا۔انہوں نے بتایا کہ پورے بہار میں یوتھ کانگریس کی رکنیت سازی مہم اور تنظیمی انتخابات ایک ساتھ منعقد کئے جارہے ہیں۔یہ پوری کارروائی آئی وائی سی ایپ کے ذریعے آن لائن کی جائے گی۔بلاک،اسمبلی،ضلع اور ریاستی سطح پر مختلف کمیٹیاں بنائی جائیں گی۔
انہوں نے بتایا کہ 18 سے 35 سال کی عمر کا کوئی بھی نوجوان 75 روپے کی ممبر شپ فیس ادا کرکے آن لائن ممبر بن سکتا ہے اور انتخابی عمل میں حصہ لے سکتا ہے۔بہار میں ریاستی صدر، ریاستی جنرل سکریٹری،ضلع صدر،ضلع جنرل سکریٹری،اسمبلی صدر اور بلاک صدر سمیت چھ عہدوں کے لیے انتخابات ہوں گے۔
یوتھ کانگریس کے آر او نریندر شرما نے کہا کہ تعلیم یافتہ نوجوان سماج میں پھیلی ناخواندگی،توہم پرستی اور سماجی برائیوں کو ختم کرنے میں اہم رول ادا کرتے ہیں۔انہوں نے نوجوانوں سے اپیل کی کہ وہ بڑی تعداد میں اندراج کرکے جمہوری عمل میں بڑھ چڑھ کر حصہ لیں۔پریس کانفرنس میں راہل کمار یادو،نوین سنگھ تنو،فیصل انور،سنتوش چودھری، سدھانت کمار،راجن یادو،سونو کمار، یاسین آزاد اور دیگر موجود تھے۔