بہار میں بی جے پی کے راج میں غیر قانونی سرگرمیاں عروج پر،جرائم پیشہ عناصر، شراب مافیا اور جسم فروشی سے وابستہ گروہوں کے خلاف مؤثر کارروائی کرنے میں ناکام ثابت ہو رہی ہےسمراٹ حکومت:تیجسوی یادو

(پی این این)
پٹنہ: پٹنہ کے کوتوالی تھانہ علاقے کے کربگھیا سے اغوا کیے گئے تاجر بنٹی کمار کے قتل کے بعد بہار کی سیاست میں ہلچل مچ گئی ہے۔قائدِ حزبِ اختلاف تیجسوی یادو نے اس معاملے پر بہار حکومت اور پولیس انتظامیہ کو سخت تنقید کا نشانہ بناتے ہوئے الزام لگایا کہ پولیس نے بروقت کارروائی نہیں کی، جس کے باعث اغوا شدہ نوجوان کی جان چلی گئی۔
یورپ کے دورے پر موجود تیجسوی یادو نے اتوار کے روز سوشل میڈیا پلیٹ فارم ایکس پر ایک پوسٹ میں کہا کہ 25 سالہ بنٹی کمار کو 6 جولائی کو پٹنہ جنکشن کے قریب سے اغوا کیا گیا تھا۔انہوں نے پولیس کی کارکردگی پر سوال اٹھاتے ہوئے کہا کہ واقعے کی سی سی ٹی وی فوٹیج دستیاب ہونے کے باوجود اغوا کاروں کی تلاش کرنے کے بجائے پولیس نے متاثرہ خاندان کو ہی ڈانٹ پھٹکار لگائی۔
تیجسوی نے بتایا کہ ہفتہ کے روز راشٹریہ جنتا دل (آر جے ڈی) کے ایک وفد نے بنٹی کمار کی اہلیہ سے ملاقات کی تھی اور ان کی خود بھی فون پر گفتگو ہوئی تھی۔انہوں نے الزام عائد کیا کہ اپوزیشن کے دباؤ کے بعد ہی پولیس نے پٹنہ دیہی کے اتھمل گولا تھانہ علاقے سے برآمد ہونے والی مسخ شدہ لاش کی اطلاع اہلِ خانہ کو دی۔تیجسوی یادو نے اپنی پوسٹ میں کربگھیا علاقے میں مبینہ طور پر چلائے جا رہے سیکس ریکیٹ کا بھی ذکر کیا۔ ان کا الزام ہے کہ بنٹی کمار نے اس غیر قانونی سرگرمی کی مخالفت کی تھی، جس کے بعد انہیں اغوا کر لیا گیا۔انہوں نے یہ دعویٰ بھی کیا کہ مقامی لوگوں کے مطابق سیکس ریکیٹ چلانے والے عناصر کھلے عام سیاسی سرپرستی حاصل ہونے کی بات کرتے ہیں۔
تیجسوی یادو نے وزیرِ اعلیٰ سمراٹ چودھری سے سوال کیا کہ ان جرائم پیشہ افراد اور مبینہ گینگ کے سرغنہ کون ہیں اور ان کے خلاف اب تک کارروائی کیوں نہیں کی گئی۔قائدِ حزبِ اختلاف نے مزید الزام لگایا کہ ریاست میں بھارتیہ جنتا پارٹی کی حکومت بننے کے بعد پٹنہ جنکشن کے اطراف غیر قانونی سرگرمیوں میں اضافہ ہوا ہے۔ انہوں نے حکومت پر یہ بھی الزام عائد کیا کہ وہ جرائم پیشہ عناصر، شراب مافیا اور جسم فروشی سے وابستہ گروہوں کے خلاف مؤثر کارروائی کرنے میں ناکام رہی ہے۔