(پی این این)
پٹنہ :بہار میں بھارتیہ جنتا پارٹی (بی جے پی) کے پہلے وزیر اعلیٰ سمراٹ چودھری ہوں گے۔تمام قیاس آرائیوں کی تصدیق کرتے ہوئے ڈپٹی سی ایم سمراٹ چودھری کو بی جے پی قانون ساز پارٹی کی میٹنگ میں دوبارہ قانون ساز پارٹی کا لیڈر منتخب کیا گیا۔ ان کا نام دوسرے ڈپٹی سی ایم وجے سنہا نے تجویز کیا تھا۔ اس کے بعد مقننہ کے سنٹرل ہال میں این ڈی اے کے اراکین اسمبلی کی مشترکہ میٹنگ میں بی جے پی لیڈر سمراٹ چودھری کے نام کو منظوری دی گئی، جنہیں لیڈر بھی منتخب کیا گیا۔ اس کے بعد سمراٹ حکومت بنانے کا دعویٰ کرنے گورنر کے پاس گئے۔ سمراٹ چودھری کی قیادت والی نئی حکومت بدھ کو صبح 11 بجے لوک بھون (راج بھون) میں حلف برداری کرے گی۔ گورنر کے سکریٹری گوپال مینا نے کل شام سمراٹ چودھری سے ان کی رہائش گاہ پر ملاقات کی اور حلف برداری کی تقریب کے انتظامات پر تبادلہ خیال کیا۔
اس سے پہلے جنتا دل یونائیٹڈ (جے ڈی یو) کے صدر نتیش کمار نے تقریباً 3:15 بجے گورنر کو چیف منسٹر کے طور پر اپنا استعفیٰ سونپ دیا۔ انہوں نے اپنے دور حکومت کا آخری کابینہ اجلاس منعقد کیا۔ این ڈی اے قانون ساز پارٹی کی میٹنگ کے بعد، نیا لیڈر حکومت بنانے کا دعویٰ پیش کرے گا۔ نئی بی جے پی زیرقیادت این ڈی اے حکومت کی حلف برداری کی تقریب بدھ کو صبح 11 بجے لوک بھون (راج بھون) میں ہوگی، جہاں پانچ حلقہ جماعتوں کے محدود تعداد میں وزراء حلف لیں گے۔ دہلی سے تقریب میں بی جے پی اور این ڈی اے پارٹیوں کے سینئر لیڈروں کی شرکت متوقع ہے۔

(پی این این)
پھلواری شریف:امارت شرعیہ نے سی بی ایس ای طرزپربہار ، اڈیشہ وجھارکھنڈ ومغربی بنگال میں متعدد امارت پبلک اسکول قائم کیے جو بچے اور بچیوں کی نفسیات اورمزاج کو اسلامی سانچے میں ڈھالنے اور معیاری عصری تعلیم کو فروغ دینے کا مثالی کارنامہ انجام دے رہاہے ۔اب اساتذہ کرام کی اخلاقی ذمہ داری ہے کہ معلم انسانیت حضرت محمد صلی اللہ علیہ وسلم کے صفا ت وکمالات کا عملی نمونہ پیش کریں ، بچوںسے محبت وشفقت کا معاملہ کریں اور ان میں اسکول سے محبت پیداکرنے کی کوشش کریں ، ان خیالات کا ا ظہار امیر شریعت مولانا سید احمد ولی فیصل رحمانی نے امارت پبلک اسکول کے اساتذہ ومعلمات کے ایک خصوصی اجتماع میں کیا۔
امارت شرعیہ کے میٹنگ ہال میں امارت شرعیہ کی نگرانی میں چلنے والے امارت پبلک اسکولس پھلواری شریف ،نگڑی ،اربارانچی،کٹیہار، پورنیہ، کشن گنج گریڈیہہ، گڈا، آسنسول،کٹک اڈیشہ وغیرہ سے تشریف لانے والے اساتذہ ومعلمات سے خطاب کرتے ہوئے امیر شریعت نے کہاکہ حسن اخلاق اورمعیاری تعلیم وتربیت کے ذریعہ ہی اسکول ترقی کی راہ پر گامزن ہوسکتا ہے ، اس لیے ٹیم ورک کے ساتھ کاموں کو قوت بخشا جائے اور نظم ونسق کے ساتھ اسکول کو بہتر سے بہتر اورمعیاری بنایاجائے ، حاضری سو فیصد لازمی ہو، بچوں کی نفسیات اورمزاج کاخیال رکھتے ہوئے ان کی تربیت ہو، زبان وبیان کی اصلاح پر توجہ دیںاور وقفہ وقفہ سے تعلیمی جائزہ لیتے رہیں، بچوں سے دوران تعلیم پانچ منٹ کے لیے فیزیکل ایکسرسائز کروایاجائے تاکہ ان کے اندر نئی توانائی پیداہو، اس سلسلہ میں امیر شریعت نے اساتذہ کرام سے بھی استصواب رائے کیا جس میں بعض اساتذہ کرام نے تعلیم میںAtlasکا استعمال کرے Exportکرانے پر توجہ دلائی ۔ امیر شریعت نے ا ن آراء پر تحسینی کلمات اداکرتے ہوئے ہر بچہ کو ہرفلڈ کے لیے تیار کرنے کے لیے لائحہ عمل بنانے پر توجہ دلائی۔
ناظم امارت شرعیہ بہار، اڈیشہ ، جھارکھنڈ ومغربی بنگال مولانا مفتی محمد سعیدالرحمن قاسمی نے کہا اساتذہ کرام کا مقام ومنصب بہت بلند ہے ، وہ معمارقوم ہوتے ہیں ، محسن انسانیت حضرت محمد صلی اللہ علیہ وسلم معلم انسانیت تھے ، انہوں نے اپنے بلند اخلاق واقدار سے لوگوں کے دلوں کو حق انصاف کو قبول کرنے پر مجبور کردیا، آپ بھی معلم ہیں ، اس اخلاق کے پرتو ہیں، بچے آپ کے پاس امانت ہیں ، آپ اپنی صلاحیت سے انہیں بنانے ، سنوارنے کی کوشش کیجئے اوربچوں کو اپنے کردار وعمل سے متاثر کیجئے ، منکرات سے حتی المقدور پرہیز کیجئے ۔
اسکولوں کے اساتذہ کرام مولانا سہیل سجاد قاسمی ،رانچی، مولانا محمد عثمان قاسمی ،نزہت پروین،پھلواری شریف،روحی پروین ، نازش صباء،شیمونہ نوشین، ثانیہ فیروز،رضوان احمد کٹیہار،صنور حسین گریڈیہہ، عباس گریڈیہہ،عامر خان آسنسول، اظہر عالم ،افتخاراحمد پورنیہ،محمد نوشاد عالم کشن گنج، محمد جنید عالم گڈا،مولانا یوسف اشرفی وغیرہ نے تعلیمی معیار کو مزید بہتر بنانے کے لیے قیمتی مشورے دیے ، اس نشست کا آغاز مولانا یوسف اشرف کی تلاوت کلام اللہ سے ہوا، اس مجلس میں مولانا رضوان احمد ندوی ، حافظ محمد احتشام رحمانی ، مولانا محمد منہاج عالم ندوی ، مولانا ارشد رحمانی ، مولانا محمد شارق رحمانی ، مولانا قیام الدین قاسمی وغیرہ شریک رہے ۔اخیر میں یہ مجلس امیر شریعت کی دعاء پر اختتام پذیر ہوئی ۔

(پی این این)
دربھنگہ :بہار کے دربھنگہ ضلع کے سندرپور علاقے میں ایک دردناک سانحہ پیش آیا جہاں گھریلو گیس کے رساؤ کے باعث اچانک آگ بھڑک اٹھی اور دیکھتے ہی دیکھتے سلنڈر دھماکے کے ساتھ پورا گھر شعلوں کی لپیٹ میں آ گیا۔ اس ہولناک حادثے میں ایک ہی خاندان کے 3 افراد، میاں بیوی اور ان کا 3 ماہ کا معصوم بچہ جاں بحق ہو گئے، جب کہ 8 افراد جھلس کر زخمی ہو گئے، جن میں ایک فائر بریگیڈ اہلکار بھی شامل ہے۔
ذرائع کے مطابق مہلوکین کی شناخت گوبند داس (30)، ان کی اہلیہ نشو کماری (26) اور ان کے 3 ماہ کے بیٹے یوراج کمار کے طور پر ہوئی ہے۔ بتایا جاتا ہے کہ نشو کماری اپنے بچے کو گود میں لے کر کچن میں کھانا تیار کر رہی تھیں کہ اسی دوران گیس لیک ہونے کی وجہ سے جیسے ہی ماچس جلائی گئی، اچانک آگ بھڑک اٹھی اور پورا کچن لپیٹ میں آ گیا۔ بچے کو بچانے کی کوشش میں گوبند داس بھی آگ میں کود پڑے، تاہم وہ بھی شدید جھلس گئے اور بعد میں جانبر نہ ہو سکے۔
عینی شاہدین کے مطابق آگ اتنی تیزی سے پھیلی کہ چند ہی منٹوں میں گھر کا بڑا حصہ شعلوں کی زد میں آ گیا، جب کہ کھڑکیوں اور وینٹی لیٹر سے دھواں اور آگ کے شعلے باہر نکلنے لگے۔ اطلاع ملتے ہی مقامی لوگ موقع پر جمع ہو گئے اور اپنی مدد آپ کے تحت بچاؤ کی کوششیں شروع کیں، تاہم آگ کی شدت کے باعث فوری قابو پانا ممکن نہ ہو سکا۔
ادھر اطلاع ملتے ہی فائر بریگیڈ کی 4 گاڑیاں موقع پر پہنچیں اور کافی جدوجہد کے بعد آگ پر قابو پایا گیا۔ ریسکیو کارروائی کے دوران ایک فائر بریگیڈ اہلکار بھی جھلس کر زخمی ہو گیا۔ زخمیوں میں بیچن داس، گوتم داس اور پڑوسی آدتیہ ٹھاکر سمیت دیگر افراد شامل ہیں، جنہیں علاج کے لیے قریبی اسپتال میں داخل کرایا گیا ہے۔
یونیورسٹی تھانہ کے انچارج سدھیر کمار نے بتایا کہ ابتدائی تفتیش میں یہ بات سامنے آئی ہے کہ کچن حال ہی میں نچلی منزل سے تیسری منزل پر منتقل کیا گیا تھا اور کھانا بنانے کے دوران گیس کے رساؤ کے باعث یہ حادثہ پیش آیا۔ انہوں نے کہا کہ معاملے کی ہر پہلو سے جانچ کی جا رہی ہے۔
وہیں فائر بریگیڈ کے ڈی ایس پی محمد فیض نے کہا کہ اطلاع ملتے ہی ٹیمیں فوری طور پر روانہ کی گئیں اور بروقت کارروائی کے نتیجے میں آگ پر قابو پا لیا گیا، ورنہ نقصان کہیں زیادہ ہو سکتا تھا۔ انہوں نے گھریلو گیس کے استعمال میں احتیاط برتنے کی اپیل بھی کی۔