(پی این این)
دیوبند:فرنیچر کے شوروم میں شارٹ سرکٹ کے باعث آگ لگنے سے لاکھوں روپے مالیت کا فرنیچر جل کر خاکستر ہوگیا۔
شوروم سے اٹھنے والے آگ کے شعلے اور دھوئیں سے علاقے میں سنسنی پھیل گئی۔ شوروم کی بالائی منزل پر رہنے والا خاندان کسی طرح سیڑھیاں چڑھ کر پڑوسی کے گھر کی طرف بھاگنے میں کامیاب ہوگیا۔ فائر بریگیڈ نے موقع پر پہنچ کر گھنٹوں کی جدوجہد کے بعد آگ پر قابو پالیا۔ خوش قسمتی سے اتنے بڑے حادثے کے باوجود کوئی جانی نقصان نہیں ہوا۔گاؤں املیا کے رہائشی امیر عالم شہر کے مجنوں والا روڈ پر بھارت فرنیچر کے نام سے ایک شوروم چلاتے ہیں۔ وہ یہ شوروم محمد احترام سے کرائے پر لیا ہوا ہے۔ مالک اپنے خاندان کے ساتھ شوروم کی بالائی منزل پر رہتا ہے۔ اتوار کی صبح تقریباً 7 بجے بند فرنیچر شوروم سے اچانک آگ کے شعلے اور دھواں اٹھنے لگا۔ آگ نے چند ہی لمحوں میں شدید شکل اختیار کر لی جس سے جائے وقوعہ پر خوف وہراس پھیل گیا۔ اوپر سوئے احترام کے گھر والے بھی جاگ گئے اور آگ کے شعلے اور دھواں دیکھ کر چیخنے لگے۔ احترم نے قریبی دکان کی چھت پر چڑھنے کے لیے اپنے گھر سے ایک سیڑھی کا استعمال کیا اور اپنے خاندان کو نکالا۔
اطلاع ملنے پر شوروم کے مالک امیر عالم بھی جائے وقوعہ پر پہنچ گئے۔ لوگوں نے آگ بجھانے کی کوشش کی لیکن آگ پہلے ہی سنگین رخ اختیار کر چکی تھی۔ فائر ڈیپارٹمنٹ کو فوری طور پر اطلاع دی گئی۔ فائر بریگیڈ کی کئی گاڑیاں پہنچیں اور آگ پر قابو پانا شروع کر دیا۔ کافی کوشش کے بعد آگ پر قابو پالیا گیا۔ بتایا جا رہا ہے کہ حادثہ شارٹ سرکٹ کی وجہ سے ہوا ہے۔ شوروم کے مالک امیر عالم کا کہنا ہے کہ آگ لگنے سے انہیں لاکھوں روپے کا نقصان ہوا ہے۔

(پی این این)
لکھنؤ:رضوان احمد فاروقی} مشہور صوفی بزرگ محمد نبی رضا شاہ المعروف بہ دادا میاں کے 119 ویں عرس مبارک کے آغاز کے ساتھ ہی خانقاہ کے اردگرد معتقدین و متوسلین کا ہجوم نظر آرہا ہے۔چہار سمت پروانہ رضا منڈلا رہے ہیں۔ ہندوستان کے مختلف شہروں، قصبات اور دیہات سے آنے والوں کا تانتا بندھا ہوا ہے۔
خانقاہ کے سجادہ نشین حضرت صباحت حسن شاہ کے مطابق سارے پروگرام گزشتہ برسوں کی طرح ہی انجام پائیں گے۔ ہر قوم، فرقے اور مسلک کے افراد کے جذبات و نفسیات کا ممکنہ حد تک خیال رکھا جائے گا۔ منقبتی مشاعرے میں عقیدت مندان دادا میاں نے شریک ہوکر نعت و منقبت کے والہانہ اشعار سے قلوب کو مصفی و مجلی کیا۔ ناظم پروگرام شاعرو ادیب رضوان احمد فاروقی کے مطابق دادا میاں کا مشن باہمی تفریق کو ختم کرکے دلوں کو جوڑنا اور پیغام محبت کو عام کرنا ہے۔ اس مشن میں یہاں کے منتظمین کامیاب ہیں جو آج کے دور میں بڑی کامیابی ہے۔ صدارت استادالشعراء محمد فاروق جاذب لکھنوی نے کی اوربطور مہمان خصوصی سید انوارالحق انوار سیتاپوری پروگرام کا حصہ رہے۔مشاعرہ رات 1 بجے شروع ہوکر اذان فجر سے قبل تمام ہوا۔

(پی این این)
دیوبند: انتظامیہ کی جانب سے سہارنپور کلکٹریٹ کمپلیکس میں واقع مسجد کو بلڈوز کرنے کے بعد ضلع دن بھر ہائی الرٹ پر رہا۔ مذہبی شہر دیوبند میں خاص طور پر دارالعلوم کا علاقہ چھاؤنی میں تبدیل ہو گیا۔ دن بھر بحث و مباحثہ جاری رہا، ہر کونے پر پولیس تعینات تھی۔
ہفتہ کی صبح ڈسٹرکٹ جج نے سٹی مجسٹریٹ کے حکم کو برقرار رکھنے کے بعد انتظامیہ نے مسجد کو منہدم کرنے کی کارروائی کی۔ اس کے ساتھ مسجد کیس میں عائد 6 کروڑ 42 لاکھ روپے کا جرمانہ بھی برقرار رکھا گیا ہے۔ جس کے بعد انتظامیہ اور پولیس نے پورے ضلع میں حفاظتی انتظامات سخت کر دیئے۔ کسی بھی ناخوشگوار صورتحال سے نمٹنے کے لیے ہائی الرٹ جیسی صورتحال تھی۔
مذہبی شہر دیوبند میں سیکورٹی کے انتظامات کو مزید سخت کر دیا گیا اور خاص طور پر دارالعلوم علاقہ سمیت شہر کے حساس علاقوں میں پولیس کی تعیناتی بڑھا دی گئی۔ اہم سڑکوں، چوراہوں اور حساس مقامات پر پولیس اہلکار تعینات ہیں۔ مسلم رہنماؤں کو گھروں میں نظر بند کر دیا گیا۔ جس کی وجہ سے دن بھر بحث و مباحثہ کا بازار گرم رہا۔
دیوبندکے سابق ایم ایل اے معاویہ علی کو گھر میں نظر بند کرنے کے لیے مقامی اہلکار پولیس کے ساتھ ہفتہ کی صبح تقریباً 5 بجے محلہ دیوان میں واقع ان کی رہائش گاہ پر پہنچے اور گھر کو اطراف سے گھیر لیا۔ گھر کے اندر موجود خواتین نے جب انہیں بتایا کہ معاویہ علی گھر پر نہیں ہیں تو پولیس نے ان کے گھر کے باہر ڈیرے ڈال لیے۔ سابق ایم ایل اے کے گھر کے باہر پولیس دن بھر تعینات رہی۔