نئی دہلی:بھارتیہ جنتا پارٹی (بی جے پی) رکن پارلیمنٹ بانسری سوراج نے کونڈا سریکھا کو تلنگانہ کابینہ سے برطرف کیے جانے پر کانگریس لیڈر راہل گاندھی کو نشانہ بنایا ہے اور کہا ہے کہ مسٹر گاندھی کا پدرشاہی کو ختم کروکا نعرہ محض ایک کھوکھلی بات ہے۔ بانسری سوراج نے جمعہ کو یہاں صحافیوں سے بات کرتے ہوئے کہا کہ اپوزیشن کے قائد راہل گاندھی کا پدرشاہی کو ختم کرو نعرہ صرف کھوکھلی بات ہے۔ انہوں نے کہا کہ ہماچل پردیش اور کرناٹک میں، جہاں کانگریس کی حکومتیں ہیں، وہاں پر ایک بھی خاتون کو وزرات کا عہدہ نہیں دیا گیا ہے۔ اب تلنگانہ میں جمعرات کو کانگریس کی سینئر لیڈر کو وہاں کی حکومت نے مبینہ طور پر ذلیل کیا اور ریاستی کابینہ سے ہٹا دیا۔ محترمہ سریکھا نے تلنگانہ کی کانگریس حکومت اور وزیر اعلیٰ اے ریونت ریڈی پر بہت سنگین الزامات عائد کیے ہیں۔ انہوں نے کہا، “میں پوچھنا چاہتی ہوں… ان کے لگائے گئے ناانصافی اور بلیک میلنگ کے الزامات پر مسٹر گاندھی ابھی بھی خاموش کیوں ہیں؟ شاید اس لیے کیونکہ ان کے لیے پدرشاہی کو ختم کرو انتخابی نعرے اور سیاسی بیان بازی سے زیادہ کچھ نہیں ہے۔
اصل میں مسٹر گاندھی اور کانگریس کی سوچ یہ ہے کہ اگر خواتین ترقی پسند ہیں، تو ان کے امکانات کو ختم کر دو۔”

سری نگر:جموں و کشمیر میں نیشنل لوک تانترک پارٹی (NLP) کی مہیلا مورچہ کی ریاستی صدر، شائستہ اختر نے نئی دہلی کے ساکیت پولیس اسٹیشن میں دو مسلم خاتون صحافیوں کے ساتھ مبینہ بدسلوکی اور ہراسانی کی شدید مذمت کی ہے۔ انہوں نے اس واقعے کو انتہائی تشویشناک اور جمہوری معاشرے میں ناقابلِ قبول قرار دیا۔شائستہ اختر نے ان اطلاعات پر گہری تشویش کا اظہار کیا جن کے مطابق دہلی پولیس کے اہلکاروں نے اپنی پیشہ ورانہ ذمہ داریاں نبھانے والی دو خاتون صحافیوں پر مبینہ طور پر تشدد کیا اور ان کے ساتھ بدسلوکی کی۔ انہوں نے کہا کہ اگر یہ الزامات ثابت ہو جاتے ہیں تو قانون نافذ کرنے والے اہلکاروں کا ایسا رویہ ہرگز برداشت نہیں کیا جا سکتا اور اس معاملے کی غیر جانبدارانہ اور مقررہ مدت میں تحقیقات ہونی چاہئیں۔شائستہ اختر نے کہا، “پولیس کی ذمہ داری شہریوں کا تحفظ کرنا ہے، نہ کہ انہیں ڈرانا دھمکانا یا ان پر حملہ کرنا۔ صحافیوں کو بغیر کسی خوف، دباؤ، دھمکی یا امتیازی سلوک کے اپنے فرائض کی انجام دہی کی اجازت ہونی چاہیے۔ اگر پولیس اسٹیشن کے اندر دو خاتون صحافیوں کو جسمانی تشدد کا نشانہ بنایا گیا ہے، تو یہ انتہائی تشویشناک معاملہ ہے جس میں احتساب ناگزیر ہے۔”انہوں نے مزید زور دیا کہ کسی صحافی کی شناخت یا مذہب کبھی بھی امتیازی سلوک کی بنیاد نہیں بننا چاہیے۔ پریس کی آزادی جمہوریت کا بنیادی ستون ہے، اور صحافیوں کو یہ حق حاصل ہے کہ وہ انتقامی کارروائی کے خوف کے بغیر سوالات پوچھیں اور حقائق کی رپورٹنگ کریں۔شائستہ اختر نے دہلی پولیس کے حکام اور متعلقہ اعلیٰ افسران پر زور دیا کہ وہ ان الزامات کی فوری طور پر آزادانہ تحقیقات کریں، اگر بدسلوکی ثابت ہو تو ذمہ داروں کی نشاندہی کریں اور اس بات کو یقینی بنائیں کہ متاثرہ صحافیوں کو انصاف ملے۔انہوں نے صحافتی برادری اور سول سوسائٹی سے بھی اپیل کی کہ وہ پریس کی آزادی، خواتین کے وقار اور قانون کی حکمرانی کے تحفظ کے لیے متحد رہیں۔
انہوں نے کہا، “ایک جمہوری حکومت کو سوالات کا سامنا کرنے کے لیے تیار رہنا چاہیے۔ ایک جمہوری پولیس فورس کو صحافیوں کا احترام کرنا چاہیے۔ اور ہر شہری—قطع نظر اس کے مذہب، جنس یا پیشے کے—قانون کے تحت وقار اور تحفظ کا حقدار ہے۔”شائستہ اختر نے اس عزم کا اعادہ کیا کہ نیشنل لوک تانترک پارٹی (NLP) آئینی اقدار، اظہارِ رائے کی آزادی، خواتین کے وقار اور آزاد میڈیا کے تحفظ کے لیے مضبوطی سے کھڑی ہے

(پی این این)
نئی دہلی: ویلفیئر پارٹی آف انڈیا کے قومی خواتین ونگ نے نئی دہلی کے ساکیت پولیس اسٹیشن میں دو آزاد خواتین صحافیوں، شاہین خان اور نفیسہ خان کے ساتھ مبینہ تشدد، غیر قانونی حراست اور مذہبی شناخت کی بنیاد پر امتیازی سلوک کی سخت مذمت کی ہے۔ یہ واقعہ 3 ستمبر 2026 کو پیش آیا۔قومی خواتین ونگ کی کنوینر اور پارٹی کی نیشنل جنرل سکریٹری محترمہ شیما محسن نے واقعے پر گہری تشویش کا اظہار کرتے ہوئے کہا کہ دونوں صحافی ایک عوامی پروگرام میں سوالات کرنے کے بعد اپنی پیشہ ورانہ ذمہ داریاں ادا کر رہی تھیں کہ انہیں مبینہ طور پر پولیس اہلکاروں کی جانب سے زبانی ہراسانی اور جسمانی تشدد کا سامنا کرنا پڑا۔
انہوں نے کہا کہ اگر یہ الزامات درست ہیں تو یہ محض پولیس کی بدسلوکی کا معاملہ نہیں بلکہ آزادیٔ صحافت، آزادیٔ اظہار اور بنیادی انسانی حقوق کی سنگین خلاف ورزی ہے۔ خاص طور پر یہ بات انتہائی تشویش ناک ہے کہ مبینہ طور پر ان کی مذہبی شناخت معلوم ہونے کے بعد پولیس اہلکاروں کا رویہ مزید جارحانہ ہوگیا۔ مذہبی شناخت کی بنیاد پر کسی شہری کو نشانہ بنانا آئین کے بنیادی اصولوں اور قانون کی حکمرانی کے منافی ہے۔
شیما محسن نے کہا کہ ملک میں مسلمانوں کے خلاف بڑھتی ہوئی نفرت اور عدم برداشت پہلے ہی ایک سنگین تشویش کا باعث ہے۔ جب سیاسی رہنماؤں کی نفرت انگیز تقاریر اور قانون نافذ کرنے والے اداروں کی مبینہ خاموشی یا چشم پوشی ایسے رویوں کو تقویت دیتی ہے تو اس کے نتائج جمہوریت اور سماجی ہم آہنگی کے لیے انتہائی خطرناک ہوسکتے ہیں۔
انہوں نے مزید کہا کہ صحافیوں کو اپنے فرائض کی ادائیگی کے دوران ہراساں یا تشدد کا نشانہ بنانا جمہوریت پر براہِ راست حملہ ہے۔ اور اگر خواتین صحافیوں کو پولیس اسٹیشن جیسی جگہ پر بھی تحفظ حاصل نہ ہو تو یہ اس امر کا سنگین سوال ہے کہ سوال پوچھنے اور اختلاف کی آواز بلند کرنے والی خواتین کے لیے ملک میں عوامی مقامات کس قدر محفوظ رہ گئے ہیں۔ معزز سپریم کورٹ اس واقعے کا ازخود نوٹس لیتے ہوئے بنیادی حقوق اور آزادیٔ صحافت کی اس مبینہ خلاف ورزی کا جائزہ لے۔2. واقعے کی فوری، شفاف اور غیر جانب دار عدالتی تحقیقات کرائی جائیں اور قصوروار پائے جانے والے اہلکاروں کے خلاف سخت قانونی کارروائی کی جائے۔
3. مبینہ تشدد اور بدسلوکی میں ملوث پولیس اہلکاروں کے خلاف فوری طور پر ایف آئی آر درج کی جائے اور تحقیقات کو متاثر ہونے سے بچانے کے لیے ضروری اقدامات کیے جائیں۔4. دہلی پولیس کمشنر اور وزارتِ داخلہ واقعے کی جواب دہی یقینی بنائیں اور صحافیوں، بالخصوص خواتین صحافیوں، کے لیے ایسا محفوظ اور امتیاز سے پاک ماحول یقینی بنائیں جہاں وہ بلاخوف اپنے پیشہ ورانہ فرائض انجام دے سکیں، خواہ ان کا تعلق کسی بھی جنس، مذہب یا سماجی پس منظر سے ہو۔ویلفیئر پارٹی آف انڈیا کا قومی خواتین ونگ شاہین خان اور نفیسہ خان کے ساتھ مکمل یکجہتی کا اظہار کرتا ہے اور ان تمام آزاد صحافیوں کے ساتھ کھڑا ہے جو دباؤ اور خوف کے باوجود سچائی، آزادیٔ اظہار اور جمہوری اقدار کے تحفظ کے لیے اپنا کردار ادا کر رہے ہیں۔