(پی این این)
نئی دہلی: ملک کے اہم سرکاری اسپتالوں میں شمار ہونے والے دہلی کے رام منوہر لوہیا( آر ایم ایل) اسپتال میں مریضوں کے علاج اور جانوں کے تحفظ کو لے کر سنگین سوالات اٹھنے لگے ہیں۔ الزام ہے کہ اسپتال کے ٹراما سینٹرکے نیوروسرج ڈپارمنٹ سمیت مختلف شعبوں میں ڈاکٹروں اور طبی عملے کی حد درجہ لاپروائی کے باعث مریضوں کو بروقت اور مناسب علاج نہیں مل پا رہاہے، جس کے نتیجے میں مبینہ طور پر روزانہ کئی مریض اپنی جانوں سے ہاتھ دھو بیٹھتے ہیں۔
مریضوں اور ان کے اہل خانہ کا کہنا ہے کہ سنگین حالت میں اسپتال پہنچنے والے مریضوں کو فوری طبی امداد ملنا ضروری ہے، لیکن علاج میں تاخیر، ڈاکٹروں کی عدم توجہی اور مریضوں کی شکایات کو سنجیدگی سے نہ لینے جیسے مسائل سامنے آ رہے ہیں۔ خاص طور پراسپتال کے ٹراما سینٹر میں پہنچنے والے شدید زخمی اور نازک حالت کے مریضوں کے علاج میں کسی بھی قسم کی تاخیر ان کی زندگی کے لیے خطرناک ثابت ہو سکتی ہے۔
ایسے ہی معاملے میں ایک مریض جس کی ٹراما سینٹر کے نیوروسرجری ڈپارٹمنٹ میں طویل علاج کے دوران موت ہوگئی،اس معاملے میںان کےاہل خانہ کے ایک فرد کا کہنا ہے کہ روڈ ایکسیڈنٹ میں اس کے چھوٹے بھائی کے ہاتھ اور سرمیں چوٹ آئی تھی،اسے علاج کے لئے آرایم ایل اسپتال میں لایا گیا، لیکن بروقت اسے  ایڈمنٹ نہیں کیاگیا، بہت بھاگ دوڑ اور محنت و مشقت کے بعداسے ایڈمنٹ کیاگیا، لیکن اس کے بعد بھی وقت پر مناسب طبی امداد نہ ملنے، علاج کے دوران ڈاکٹروں کی حد درجہ لاپروائی او رمناسب دیکھ ریکھ سمیت مختلف بدانتظامی کے باعث اس نے اپنے چھوٹے بھائی کو کھو دیا۔
ذرائع اور متاثرہ افراد کا الزام ہے کہ بعض ڈاکٹروں کی لاپروائی کے باوجود اسپتال انتظامیہ کی جانب سے مؤثر نگرانی اور جواب دہی کا نظام نظر نہیں آتا، سوال پوچھے جانے پر تسلی بخش جواب نہیں دیا جاتا،مریض کی حالت اور وہ ٹھیک ہوپائے گا یا نہیں اس تعلق سے بھی کوئی واضح جواب ڈاکٹروں کی طرف سے نہیں ملتا۔ سوال یہ بھی اٹھ رہا ہے کہ اگر کسی ڈاکٹر یا طبی عملے کی غفلت سے مریض کی حالت بگڑتی ہے تو اس کی ذمہ داری طے کرنے اور مستقبل میں ایسے واقعات کو روکنے کے لیے انتظامیہ کیا اقدامات کر رہی ہے۔
اسپتال انتظامیہ پر یہ الزام بھی عائد کیا جا رہا ہے کہ وہ لاپروائی برتنے والے ڈاکٹروں اور عملے کو نہ تو مؤثر طور پر تنبیہ کر رہی ہے اور نہ ہی ان کے خلاف سخت کارروائی کرتی دکھائی دیتی ہے۔ انتظامیہ کی اس مبینہ چشم پوشی سے نہ صرف لاپروائی کرنے والے اہلکاروں کے حوصلے بلند ہو رہے ہیں بلکہ مریضوں اور ان کے اہل خانہ میں بھی خوف اور بے اعتمادی پیدا ہو رہی ہے۔
عوامی حلقوں کا کہنا ہے کہ آر ایم ایل جیسے بڑے اور اہم اسپتال میں مریضوں کے علاج سے متعلق کسی بھی شکایت کو معمولی سمجھ کر نظر انداز نہیں کیا جا سکتا۔ ضرورت اس بات کی ہے کہ اسپتال کے ٹراما سینٹر اور دیگر تمام شعبوں میں علاج کے نظام، ڈاکٹروں کی حاضری، مریضوں کو بروقت طبی سہولت کی فراہمی اور مبینہ طبی غفلت کے معاملات کی غیر جانب دارانہ جانچ کرائی جائے۔
متاثرہ خاندانوں اور شہریوں نے مطالبہ کیا ہے کہ مریضوں کی جانوں سے مبینہ طور پر ہونے والے کھلواڑ کو فوری طور پر روکا جائے، لاپروائی کے ذمہ دار ڈاکٹروں اور عملے کی جواب دہی طے کی جائے اور اسپتال انتظامیہ کو بھی اپنی نگرانی کی ذمہ داریوں میں کوتاہی پر جواب دہ بنایا جائے، تاکہ علاج کے لیے اسپتال آنے والے کسی بھی مریض کو لاپروائی یا انتظامی غفلت کی قیمت اپنی جان سے نہ چکانی پڑے۔
واضح رہے کہ مریضوں کی جان اور علاج کا معاملہ انتہائی حساس ہے، اس لیے ان الزامات اور شکایات کی شفاف اور غیر جانب دارانہ تحقیقات ضروری ہیں تاکہ حقائق سامنے آ سکیں اور اگر کسی سطح کسی بھی ڈاکٹریا انتظامیہ کے کسی بھی عملے پر کوتاہی ثابت ہوتی ہے تو ذمہ دار افراد کے خلاف سخت سے سخت کارروائی کی جا ئے۔

(پی این این)
نئی دہلی : مرکز برائے فاصلاتی و آن لائن تعلیم(سی ڈی او ای)جامعہ ملیہ اسلامیہ نے نیلسن منڈیلا سینٹر فار پیس اینڈ کنفلکٹ ریزولیوشن (این ایم سی پی سی آر) کے اشتراک سے سی ڈی او ای کانفرنس ہال میں ’عالمی امن دوہزار چھبیس:چیلنجز اور امکانات ‘ کے موضوع پر ایک خصوصی لیکچر کا اہتمام کیا۔ اس پروگرام کا انعقاد عزت مآب پروفیسر مظہر آصف،شیخ الجامعہ ،جامعہ ملیہ اسلامیہ کی سرپرستی اورپروفیسر محمد مہتاب عالم رضوی ،مسجل، جامعہ ملیہ اسلامیہ کے تعاون و رہنمائی میں کیا گیا۔ آسٹریلیا کے شہر سڈنی میں قائم انسٹی ٹیوٹ فار اکنامکس اینڈ پیس( آئی ای پی) کے چیف آپریٹنگ آفیسر، جناب بریٹ سیول نے یہ اہم خطبہ دیا۔ پروگرام کا انعقاد سی ڈی او ای کے ڈائریکٹر اور این ایم سی پی سی آر میں پروفیسر کے عہدے پر فائز پروفیسر اسلم خان کی قیادت میں کیا گیا، جب کہ سینٹر کے ڈائریکٹر پروفیسر ابوذر خیری نے مہمان مقرر اور شرکا کا خیرمقدم کیا۔
مہمان خطیب جناب سیول نے گلوبل پیس انڈیکس (جی پی آئی) کے حوالے سے بدلتے ہوئے عالمی امن کے منظر نامے پر روشنی ڈالی ، جو تیئس اشاریوں کے توسط سے امن کا جائزہ لیتا ہے جن میں سماجی تحفظ اور سلامتی، جاری تنازعات اور عسکریت پسندی شامل ہیں۔ انھوں نے کہا کہ گزشتہ اٹھارہ برسوں میں سے پندرہ میں عالمی امن میں کمی آئی ہے اور اس نے تنازعات کی بدلتی ہوئی نوعیت کو اجاگر کیا ہے ، جس میں بیرونی طاقتوں کے بڑھتے کردار، پراکسی ایکٹرز اور طویل تنازعات شامل ہیں۔
ہندوستان پر گفتگو کرتے ہوئے ، خطیب نے کہا کہ چھوٹے اور نسبتاً یکساں ممالک کے ساتھ موازنہ ہندوستان کے حجم، تنوع اور جغرافیائی پیچیدگیوں کی مناسب عکاسی نہیں کرسکتا۔ اس سلسلے میں ان کا موقف تھا کہ چین، امریکہ اور برازیل جیسے بڑے ممالک کے ساتھ موازنہ زیادہ معنی خیز تناظر فراہم کر سکتا ہے۔ انھوںنے مصنوعی ذہانت اور ڈرون جنگ کے بڑھتے ہوئے استعمال کے بارے میں بھی بات کی، اور خاص طور پر روس یوکرین تنازعہ میں، اور جنگ کے لیے اے آئی اور امن کے لیے اے آئی میں سرمایہ کاری کے درمیان بڑھتے ہوئے فرق کی طرف توجہ مبذول کروائی۔
لیکچر پر اظہار خیال کرتے ہوئے این ایم سی پی سی آرکے پروفیسر راجیو نایان نے امن کی پیمائش کے لیے استعمال ہونے والے طریقہ کار اور اشاریوں کا تنقیدی جائزہ لینے کی ضرورت پر زور دیا۔ ہندوستانی فکری روایات کا حوالہ دیتے ہوئے انھوں نے اس بات پر زور دیا کہ امن کو بامعنی اور پائے دار بنائے رکھنے کے لیے اس کے ساتھ انصاف کا ہونا بھی ضروری ہے۔
اپنے اختتامی کلمات میں پروفیسر اسلم خان نے اس بات پر زور دیا کہ امن کو محض جنگ کی عدم موجودگی یا کسی ایک اشاریے کے ذریعے نہیں سمجھا جا سکتا۔ انھوں نے ایک ایسے وسیع ترنظام پر مبنی نقطہ نظر کی ضرورت پر زور دیا جو سلامتی، ترقی، طرزِ حکمرانی، ٹیکنالوجی، انصاف، ثقافت اور انسانی بہبود کے باہمی مربوط کرداروں کو تسلیم کرے۔ انھوں نے مقامی سیاق و سباق اور فکری روایات پر مبنی نقطہ نظر تشکیل دیتے ہوئے عالمی اشاریوں کا تنقیدی جائزہ لینے کی اہمیت کو بھی اجاگر کیا۔
لیکچر کے بعد فیکلٹی اراکین، تحقیقی اسکالرس اور طلبہ کے ساتھ سوال و جواب کا مذاکراتی سیشن ہوا۔ پروگرام کا اختتام این ایم سی پی سی آر کے اسسٹنٹ پروفیسر ڈاکٹر سدھانشو ترویدی کے اظہارتشکر پر ہوا۔

(پی این این)
نئی دہلی :دہلی میں ایک شخص نے ہائی کورٹ میں درخواست دائر کی جب اس کی پرانی موٹر سائیکل کو مبینہ طور پر چھین لیا گیا درخواست میں اس شخص نے میونسپل انتظامیہ سے ایک کروڑ روپے سے زائد کا معاوضہ طلب کیا تھا تاہم عدالت نے درخواست خارج کر دی۔ گاڑی کے مالک نے سنگل جج کے فیصلے کو چیلنج کیا تھا۔ یہ فیصلہ چیف جسٹس ڈی کے اپادھیائے اور جسٹس تیجس کریا پر مشتمل بنچ نے سنایا۔ٹرانسپورٹ اتھارٹی نے دسمبر 2024 میں 18 سال پرانی موٹر سائیکل کو ضبط کر لیا تھا کیونکہ اس کی درجہ بندی زندگی کے اختتامی گاڑی (ELV) کے طور پر کی گئی تھی اور اس کے مطابق اسے ختم کر دیا گیا تھا۔ اپیل کنندہ کا موقف ہے کہ موٹر سائیکل اس کے گھر کے باہر کھڑی تھی اور اس سے کوئی آلودگی نہیں تھی۔ مزید برآں، اپیل کنندہ نے عدالت کو بتایا کہ موٹر سائیکل پچھلے چار سالوں سے استعمال میں نہیں تھی۔عرضی گزار نے بعد میں 1.43 کروڑ روپے کے معاوضے کا مطالبہ کیا۔
اس شخص نے یہ معاوضہ اپنی موٹر سائیکل کو غلط طریقے سے پکڑنے اور اسکریپ کرنے کی وجہ سے طویل المدتی ذہنی اذیت اور ایذا رسانی کی وجہ سے مانگا۔ درخواست گزار کا کہنا ہے کہ وہ موٹر سائیکل سے جذباتی طور پر وابستہ تھا۔اس شخص کا دعویٰ ہے کہ اس نے ایک انتہائی قیمتی، اچھی طرح سے رکھی ہوئی اور قدیم ذاتی چیز کھو دی۔ اس لیے وہ ہتک عزت کا معاوضہ مانگ رہا ہے۔دریں اثنا، حکام نے بتایا کہ موٹر سائیکل کو “رجسٹریشن اینڈ فنکشننگ آف وہیکل سکریپنگ فیسیلٹی (RVSF) رولز، 2021کے تحت ختم کر دیا گیا تھا کیونکہ گاڑی کا مالک تین ہفتوں کے اندر مطلوبہ انڈرٹیکنگ جمع کرانے میں ناکام رہا۔24 اگست کے اپنے فیصلے میں، ڈویژن بنچ نے سنگل جج کے اس فیصلے میں مداخلت کرنے سے انکار کر دیا جس میں درخواست گزار کو سول کورٹ میں مقدمہ دائر کرنے کی ہدایت کی گئی تھی۔عدالت نے اپنے فیصلے میں کہا، اینڈ آف لائف گاڑیوں (ELVs) کی ضبطی اور اسکریپنگ RVSF کے اصولوں اور رہنما خطوط کے تحت کی جاتی ہے۔ قواعد کے مطابق، کسی بھی ELV کو کسی عوامی جگہ پر حرکت یا پارک کیا ہوا پایا جاتا ہے اور اسے رجسٹرڈ گاڑیوں کے سکریپنگ سینٹر کے حوالے کر دیا جاتا ہے۔”
اس میں یہ بھی کہا گیا ہے کہ اگر ضبطی کے تین ہفتوں کے اندر درخواست دائر کی جاتی ہے تو ایسی گاڑیاں چھوڑی جا سکتی ہیں۔درخواست گزار کے کیس کا جائزہ لیتے ہوئے عدالت نے کہا کہ اس بات کا کوئی ثبوت نہیں ہے کہ اپیل کنندہ نے اپنی گاڑی کی رہائی کے لیے درخواست دی تھی۔ اپیل کنندہ کو معاوضہ حاصل کرنے کے لیے ثبوت فراہم کرنے کی ضرورت ہوگی۔عدالت نے کہا، “اپیل کنندہ کے معاوضے کے مطالبے کو پورا کرنے سے پہلے، اس بات کا جائزہ لیا جانا چاہیے کہ آیا مدعا علیہ نے زندگی کی آخری گاڑیوں کو ضبط کرنے، چھوڑنے اور اسکریپ کرنے کے قانونی طریقہ کار پر عمل کیا ہے۔ یہ اس بات کی بھی جانچ پڑتال کرنے کی ضرورت ہے کہ آیا گاڑی قانونی طور پر ضبط کی گئی تھی اور کیا اپیل کنندہ اس بات کی تصدیق کرنے میں ناکام رہا کہ گاڑی کو اسکریپ کے لیے بھیج دیا گیا تھا۔”عدالت نے کہا، “ان معاملات کا ایک رٹ پٹیشن میں اچھی طرح سے جائزہ نہیں لیا جا سکتا، اس لیے اس اپیل کو خارج کیا جاتا ہے۔”