دلی این سی آر
دلی کے آر ایم ایل اسپتال میں مریضوں کی زندگیوں سے مبینہ کھلواڑ
(پی این این)
نئی دہلی: ملک کے اہم سرکاری اسپتالوں میں شمار ہونے والے دہلی کے رام منوہر لوہیا( آر ایم ایل) اسپتال میں مریضوں کے علاج اور جانوں کے تحفظ کو لے کر سنگین سوالات اٹھنے لگے ہیں۔ الزام ہے کہ اسپتال کے ٹراما سینٹرکے نیوروسرج ڈپارمنٹ سمیت مختلف شعبوں میں ڈاکٹروں اور طبی عملے کی حد درجہ لاپروائی کے باعث مریضوں کو بروقت اور مناسب علاج نہیں مل پا رہاہے، جس کے نتیجے میں مبینہ طور پر روزانہ کئی مریض اپنی جانوں سے ہاتھ دھو بیٹھتے ہیں۔
مریضوں اور ان کے اہل خانہ کا کہنا ہے کہ سنگین حالت میں اسپتال پہنچنے والے مریضوں کو فوری طبی امداد ملنا ضروری ہے، لیکن علاج میں تاخیر، ڈاکٹروں کی عدم توجہی اور مریضوں کی شکایات کو سنجیدگی سے نہ لینے جیسے مسائل سامنے آ رہے ہیں۔ خاص طور پراسپتال کے ٹراما سینٹر میں پہنچنے والے شدید زخمی اور نازک حالت کے مریضوں کے علاج میں کسی بھی قسم کی تاخیر ان کی زندگی کے لیے خطرناک ثابت ہو سکتی ہے۔
ایسے ہی معاملے میں ایک مریض جس کی ٹراما سینٹر کے نیوروسرجری ڈپارٹمنٹ میں طویل علاج کے دوران موت ہوگئی،اس معاملے میںان کےاہل خانہ کے ایک فرد کا کہنا ہے کہ روڈ ایکسیڈنٹ میں اس کے چھوٹے بھائی کے ہاتھ اور سرمیں چوٹ آئی تھی،اسے علاج کے لئے آرایم ایل اسپتال میں لایا گیا، لیکن بروقت اسے ایڈمنٹ نہیں کیاگیا، بہت بھاگ دوڑ اور محنت و مشقت کے بعداسے ایڈمنٹ کیاگیا، لیکن اس کے بعد بھی وقت پر مناسب طبی امداد نہ ملنے، علاج کے دوران ڈاکٹروں کی حد درجہ لاپروائی او رمناسب دیکھ ریکھ سمیت مختلف بدانتظامی کے باعث اس نے اپنے چھوٹے بھائی کو کھو دیا۔
ذرائع اور متاثرہ افراد کا الزام ہے کہ بعض ڈاکٹروں کی لاپروائی کے باوجود اسپتال انتظامیہ کی جانب سے مؤثر نگرانی اور جواب دہی کا نظام نظر نہیں آتا، سوال پوچھے جانے پر تسلی بخش جواب نہیں دیا جاتا،مریض کی حالت اور وہ ٹھیک ہوپائے گا یا نہیں اس تعلق سے بھی کوئی واضح جواب ڈاکٹروں کی طرف سے نہیں ملتا۔ سوال یہ بھی اٹھ رہا ہے کہ اگر کسی ڈاکٹر یا طبی عملے کی غفلت سے مریض کی حالت بگڑتی ہے تو اس کی ذمہ داری طے کرنے اور مستقبل میں ایسے واقعات کو روکنے کے لیے انتظامیہ کیا اقدامات کر رہی ہے۔
اسپتال انتظامیہ پر یہ الزام بھی عائد کیا جا رہا ہے کہ وہ لاپروائی برتنے والے ڈاکٹروں اور عملے کو نہ تو مؤثر طور پر تنبیہ کر رہی ہے اور نہ ہی ان کے خلاف سخت کارروائی کرتی دکھائی دیتی ہے۔ انتظامیہ کی اس مبینہ چشم پوشی سے نہ صرف لاپروائی کرنے والے اہلکاروں کے حوصلے بلند ہو رہے ہیں بلکہ مریضوں اور ان کے اہل خانہ میں بھی خوف اور بے اعتمادی پیدا ہو رہی ہے۔
عوامی حلقوں کا کہنا ہے کہ آر ایم ایل جیسے بڑے اور اہم اسپتال میں مریضوں کے علاج سے متعلق کسی بھی شکایت کو معمولی سمجھ کر نظر انداز نہیں کیا جا سکتا۔ ضرورت اس بات کی ہے کہ اسپتال کے ٹراما سینٹر اور دیگر تمام شعبوں میں علاج کے نظام، ڈاکٹروں کی حاضری، مریضوں کو بروقت طبی سہولت کی فراہمی اور مبینہ طبی غفلت کے معاملات کی غیر جانب دارانہ جانچ کرائی جائے۔
متاثرہ خاندانوں اور شہریوں نے مطالبہ کیا ہے کہ مریضوں کی جانوں سے مبینہ طور پر ہونے والے کھلواڑ کو فوری طور پر روکا جائے، لاپروائی کے ذمہ دار ڈاکٹروں اور عملے کی جواب دہی طے کی جائے اور اسپتال انتظامیہ کو بھی اپنی نگرانی کی ذمہ داریوں میں کوتاہی پر جواب دہ بنایا جائے، تاکہ علاج کے لیے اسپتال آنے والے کسی بھی مریض کو لاپروائی یا انتظامی غفلت کی قیمت اپنی جان سے نہ چکانی پڑے۔
واضح رہے کہ مریضوں کی جان اور علاج کا معاملہ انتہائی حساس ہے، اس لیے ان الزامات اور شکایات کی شفاف اور غیر جانب دارانہ تحقیقات ضروری ہیں تاکہ حقائق سامنے آ سکیں اور اگر کسی سطح کسی بھی ڈاکٹریا انتظامیہ کے کسی بھی عملے پر کوتاہی ثابت ہوتی ہے تو ذمہ دار افراد کے خلاف سخت سے سخت کارروائی کی جا ئے۔
نئی دہلی، 19 ستمبر (یو این آئی) دہلی انٹرنیشنل ایئرپورٹ لمیٹڈ (ڈائل) نے ہفتہ کو اعلان کیا کہ اندرا گاندھی انٹرنیشنل ایئرپورٹ کے تیسرے رن وے (11 آر/29 ایل) کو 20 ستمبر سے پھر آپریشن میں لایا جائے گا۔ڈائل نے بتایا کہ رن وے کے جامع بحالی پروگرام اور تمام ضروری ریگولیٹری منظوریوں کے ملنے کے بعد اسے دوبارہ آپریشن کے لیے تیار کیا گیا ہے۔ بحالی کا یہ پروجیکٹ فروری 2026 میں شروع ہوا تھا، جس میں آپریشنل حفاظت، کارکردگی، صلاحیت اور طویل مدتی استحکام کو بڑھانے کے مقصد سے جامع کام کیے گئے۔
پروجیکٹ کے تحت رن وے کی سطح کی تجدید، رن وے 29 ایل کے مستقل تھریشولڈ میں تبدیلی، نئی ریپڈ ایگزٹ ٹیکسی وے (آر ای ٹی زیڈ 1) کی تعمیر، ہوائی اڈے کے گراؤنڈ لائٹنگ سسٹم کی اپ گریڈیشن، رن وے کی سطح کو مضبوط بنانے کے کام اور متعلقہ سول و الیکٹریکل بنیادی ڈھانچے میں اصلاحات کی گئیں۔ ڈائل کے مطابق، ان اصلاحات سے رن وے کی فعال صلاحیت کو بڑھانے، طیاروں کی آمد و رفت کو بہتر طریقے سے منظم کرنے، رن وے پر طیاروں کے رہنے کا وقت کم کرنے اور مختلف موسمی حالات میں آپریشنل اعتماد کو بڑھانے میں مدد ملے گی۔
پروجیکٹ کے دوران ڈائل نے ڈائریکٹوریٹ جنرل آف سول ایوی ایشن (ڈی جی سی اے)، ایئرپورٹس اتھارٹی آف انڈیا (اے اے آئی)، ایئر ٹریفک کنٹرول (اے ٹی سی)، ایئر لائنز اور دیگر متعلقہ فریقوں کے ساتھ مل کر کام کیا۔ تمام مقررہ حفاظتی، آپریشنل اور ریگولیٹری مراحل مکمل ہونے کے بعد 20 ستمبر سے رن وے پر آپریشن دوبارہ شروع کرنے کی منظوری ملی ہے۔ ڈائل کے چیف ایگزیکٹو آفیسر پردیپ پانیکر نے کہا کہ رن وے 11 آر/29 ایل کو دوبارہ چالو کیا جانا دہلی ہوائی اڈے کے مستقبل کے لیے تیار ہوا بازی کے بنیادی ڈھانچے کی تعمیر کی سمت میں ایک اہم پیش رفت ہے۔
انہوں نے کہا کہ بحالی کے پروگرام کو کامیابی کے ساتھ مکمل کیا جانا حفاظت، آپریشنل عمدگی اور مسافروں کو بہتر سہولیات فراہم کرنے کے عزم کو ظاہر کرتا ہے۔ انہوں نے کہا کہ جدید رن وے کے ساتھ نئی ریپڈ ایگزٹ ٹیکسی وے نیز بہتر نیویگیشن اور لائٹنگ کا نظام دہلی ہوائی اڈے کی صلاحیت اور استحکام کو مزید بڑھائے گا اور ملک میں بڑھتی ہوئی ہوا بازی کی ضروریات کو پورا کرنے میں مدد کرے گا۔ڈائل نے کہا کہ دوبارہ چالو ہونے والے رن وے دہلی ہوائی اڈے کی آپریشنل کارکردگی اور مستقبل میں بڑھنے والے ایئر ٹریفک کو سنبھالنے میں اہم کردار ادا کرے گا نیز عالمی ہوا بازی کی حفاظت اور بنیادی ڈھانچے کے معیار کے مطابق آپریشنز کو یقینی بنانے میں مدد کرے گا۔ یہ رن وے 2008 میں شروع کیا گیا تھا اور گزشتہ 17 سالوں سے مسلسل آپریشن میں تھا، جس کے دوران اس کی باقاعدہ دیکھ بھال کی گئی اور 2017 میں اس کی معمولی بحالی بھی کی گئی تھی۔
گروگرام :گروگرام میں جائز کاروبار کی آڑ میں چلنے والی غیر اخلاقی سرگرمیوں کے خلاف ایک بڑی مشترکہ کارروائی میں گروگرام پولیس اور ہریانہ ریاستی خواتین کمیشن نے سیکٹر 90 کے سفائر 90 مال میں ایک بڑا مشترکہ آپریشن کیا۔ رات 10 بجے سے صبح 3 بجے تک جاری رہنے والی چھ گھنٹے کی سخت چیکنگ مہم کے دوران 18 اسپائر سنٹروں کے اندر چھاپے مارے گئے۔ آپریشن کے دوران جائے وقوعہ پر موجود تقریباً 30 خواتین اور 20 مردوں کو پوچھ گچھ کے لیے حراست میں لیا گیا۔ ابتدائی طور پر آٹھ سپا سنٹرز میں سنگین غیر قانونی سرگرمیوں کے پختہ ثبوت ملے۔پولیس کو سیفائر 90 مال میں واقع سپا سنٹرز میں غیر اخلاقی اور مشکوک سرگرمیوں کی شکایات موصول ہو رہی تھیں اور اس خفیہ آپریشن کی منصوبہ بندی از خود کی گئی تھی۔ 100 سے زیادہ پولیس افسران کی ایک ٹیم نے بیک وقت مال کو گھیر لیا اور چھاپہ مار کارروائی شروع کر دی، جس سے ہلچل مچ گئی۔ آپریشن کے دوران 18 سپا سنٹرز میں سے 8 سے اہم الیکٹرانک آلات، ڈیجیٹل ڈیٹا، مجرمانہ دستاویزات اور دیگر جسمانی ثبوت قبضے میں لیے گئے۔ اس ثبوت کو استعمال کرتے ہوئے، پولیس اب اسپا سینٹرز کے حقیقی مالکان، آپریٹرز، منیجرز اور اس نیٹ ورک کے سہولت کاروں کے کردار کی مکمل تفتیش کر رہی ہے۔
چھاپے کے دوران سپا سنٹرز سے تقریباً 30 خواتین اور 20 مرد پائے گئے۔ ہریانہ ریاستی خواتین کمیشن کی چیئرپرسن اوشا پریہ درشنی کی موجودگی میں ان خواتین سے پوچھ گچھ کی جا رہی ہے تاکہ یہ معلوم کیا جا سکے کہ وہ کن حالات میں کام کر رہی تھیں اور کیا انہیں کسی گینگ نے ایسا کرنے پر مجبور کیا تھا۔ جائے وقوعہ سے ملنے والے افراد کے کردار، ان کی موجودگی کی وجوہات اور ان کی شہادتوں کی تصدیق کی جا رہی ہے۔ تحقیقات کی بنیاد پر ان کے خلاف قانونی کارروائی کا فیصلہ کیا جائے گا۔اس پورے آپریشن کی ابتدائی تفتیش اور ضبطی کا عمل ابھیلکش جوشی، اے سی پی ہیڈکوارٹر-1، غیر اخلاقی ٹریفک (روک تھام) ایکٹ 1956 کے تحت مقرر اسپیشل پولیس آفیسر کی نگرانی میں کیا گیا تھا۔ گروگرام پولیس انتظامیہ نے واضح کیا ہے کہ کسی بھی منظم جرم یا غیر اخلاقی سرگرمیوں کو تجارتی جگہوں کی آڑ میں کام کرنے کی اجازت نہیں دی جائے گی۔ پولیس شہر میں ایسے دیگر مقامات پر بھی کڑی نظر رکھے ہوئے ہے اور آنے والے دنوں میں مزید سخت کارروائی کی جا سکتی ہے۔
نئی دہلی :دہلی ہائی کورٹ نے کہا کہ یونیورسٹی کے طلباء کو اختلاف رائے کا اظہار کرنے، احتجاج کرنے یا احتجاج کی حمایت میں جوش دکھانے کا اہم حق ہے۔ دہلی ہائی کورٹ نے کہا کہ مظاہرین کو دیکھ کر محض مسکرانا بے ضابطگی نہیں سمجھا جا سکتا۔ جسٹس جسمیت سنگھ کی بنچ نے جواہر لعل نہرو یونیورسٹی (جے این یو) کے آٹھ طلباء پر لگائے گئے 19,000 روپے کے جرمانے پر اگلی سماعت تک روک لگا دی ہے۔یونیورسٹی نے ہر ایک طالب علم کو بے ضابطگی پر جرمانہ کیا تھا۔ طلباء نے یونیورسٹی کے چیف پراکٹر کی طرف سے جاری شوکاز نوٹس اور اس کے بعد پراکٹریل کمیٹی کی طرف سے جاری جرمانے کے حکم کو دہلی ہائی کورٹ میں چیلنج کیا۔ یونیورسٹی نے الزام لگایا کہ پانچ طلبہ مبینہ طور پر جارحانہ انداز میں کیمرہ اسٹینڈ کو ہلا رہے تھے۔
وہ ایف آر ٹی سسٹم کی توڑ پھوڑ کرنے والے طلبا کو خوش کر رہے تھے۔ تین دیگر طلباء پر تالیاں بجا کر اور نعرے لگا کر توڑ پھوڑ کی حوصلہ افزائی کرنے کا الزام تھا۔ طلبا نے شوکاز نوٹس کے جواب میں الزامات کی تردید کی۔عبوری راحت دیتے ہوئے، بنچ نے مشاہدہ کیا کہ اگر شوکاز نوٹس میں لگائے گئے الزامات کو سچ مان لیا جائے تو زیادہ سے زیادہ یہ ظاہر ہوتا ہے کہ طلباء مظاہرین کو دیکھ کر مسکرا رہے تھے۔ بنچ کے مطابق، اس طرح کا ایکٹ کسی بھی قسم کی بے ضابطگی نہیں بنتا۔بنچ نے کہا کہ یونیورسٹی کے طلباء کا اختلاف رائے، احتجاج اور مظاہرے کی حمایت کا حق ایک اہم حق ہے۔ اسے کسی بھی طرح سے دبا یا نہیں جا سکتا۔ بنچ نے کہا کہ درخواست گزار طالب علم ہونے کے ناطے اس طرح کی سرگرمی کے لیے سزا نہیں دی جا سکتی۔بنچ نے یہ بھی کہا کہ یونیورسٹی کی کارروائی درخواست گزاروں کے بنیادی حقوق پر حملہ کے مترادف ہے اور اسے قبول نہیں کیا جا سکتا۔ بنچ نے تسلیم کیا کہ طلباء نے اپنا پہلا مقدمہ قائم کر لیا ہے۔ لہٰذا، اس مرحلے پر جرمانے کو نافذ رہنے کی اجازت دینے سے ان کے بنیادی حقوق کو شدید نقصان پہنچ سکتا ہے۔ اس کے بعد بنچ نے آٹھ طلباء پر عائد 19,000 روپے کے جرمانے کو اگلی سماعت تک روک دیا۔ کیس کی اگلی سماعت 12 جنوری 2027 کو ہوگی۔
خانقاہ بشیریہ اصدقیہ میں 118 سالہ عرس شہودی اصدقی روایتی شان و شوکت کے ساتھ اختتام پذیر
سیمانچل میں بیشتر اوقافی املاک بے تجاوزات اور عدم تحفظ کا شکار:مولانا طارق انور
خطرے میں ہے ملک کا آئین،ایودھیا پہنچے ابو عاصم اعظمی ، 2027 کے اسمبلی انتخابات کے لیے سپا کے پوری طرح سے تیارہونے کاکیا دعوی
فوقانیہ اور مولوی کےامتحانات 19 سے 25 جنوری تک ہوں گے منعقد
دہلی میں غیر قانونی بنگلہ دیشیوں کے خلاف مہم تیز، 175 مشتبہ شہریوں کی شناخت
اقراءپبلک اسکول سونیا وہارمیں تقریب یومِ جمہوریہ کا انعقاد
-
بہار10 months agoفوقانیہ اور مولوی کےامتحانات 19 سے 25 جنوری تک ہوں گے منعقد
-
دلی این سی آر2 years agoدہلی میں غیر قانونی بنگلہ دیشیوں کے خلاف مہم تیز، 175 مشتبہ شہریوں کی شناخت
-
دلی این سی آر2 years agoاقراءپبلک اسکول سونیا وہارمیں تقریب یومِ جمہوریہ کا انعقاد
-
دلی این سی آر2 years agoاشتراک کے امکانات کی تلاش میں ہ ±کائیدو،جاپان کے وفد کا جامعہ ملیہ اسلامیہ کا دورہ
-
دلی این سی آر2 years agoجامعہ :ایران ۔ہندکے مابین سیاسی و تہذیبی تعلقات پر پروگرام
-
بہار1 year agoحافظ محمد منصور عالم کے قاتلوں کو فوراً گرفتار کرکے دی جائےسخت سزا : مفتی محمد سعید الرحمن قاسمی
-
محاسبہ2 years agoبیاد گار ہلال و دل سیوہاروی کے زیر اہتمام ساتواں آف لائن مشاعرہ
-
محاسبہ2 years agoجالے نگر پریشد اجلاس میں ہنگامہ، 22 اراکین نے کیا بائیکاٹ