نئی دہلی :IGDTUW انڈکشن پروگرام-2026: دہلی کی وزیر اعلیٰ ریکھا گپتا نے اندرا گاندھی دہلی ٹیکنیکل یونیورسٹی برائے خواتین (IGDTUW) انڈکشن پروگرام-2026 کی اختتامی تقریب میں شرکت کی۔ اس موقع پر، انہوں نے یونیورسٹی میں نئے تعلیمی سفر کا آغاز کرنے والی طالبات کو مبارکباد دی اور ان کے خواب کو پورا کرنے کے لیے حوصلہ افزائی کی۔سوشل میڈیا پر تقریب کی تصاویر شیئر کرتے ہوئے وزیر اعلیٰ ریکھا گپتا نے کہا کہ انہیں آئی جی ڈی ٹی یو ڈبلیو انڈکشن پروگرام-2026 کی اختتامی تقریب میں شرکت کا موقع ملا۔ اس تقریب میں دہلی کے لیفٹیننٹ گورنر اور یونیورسٹی کے چانسلر ترنجیت سنگھ سندھو، دہلی حکومت کے وزیر آشیش سود اور یونیورسٹی فیملی کے ارکان بھی موجود تھے۔طلباء سے خطاب کرتے ہوئے سی ایم ریکھا گپتا نے کہا کہ یہ ان کی تعلیمی زندگی میں ایک نئی شروعات ہے۔ انہوں نے تمام طلباء کو دل کی گہرائیوں سے مبارکباد اور نیک خواہشات کا اظہار کیا اور ان پر زور دیا کہ وہ اپنے خوابوں کی تکمیل کے لیے عزم کے ساتھ آگے بڑھیں۔ سی ایم ریکھا گپتا کا پیغام سادہ تھا: آج لڑکیوں کے لیے مواقع کی کوئی کمی نہیں ہے۔
تعلیم سے لے کر ٹیکنالوجی، اختراع اور قیادت تک، ہر شعبے میں ترقی کی راہیں کھل رہی ہیں۔ اس لیے لڑکیوں کے لیے ضروری ہے کہ وہ اپنی صلاحیتوں پر اعتماد رکھیں اور دستیاب مواقع سے بھرپور فائدہ اٹھائیں۔ انہوں نے کہا کہ آج ملک کی بیٹیوں کے لیے آسمان کھلا ہے۔ اس لیے اگر اہداف بلند ہوں تب بھی پیچھے ہٹنے کی ضرورت نہیں۔ اعتماد کے ساتھ آگے بڑھنا سب سے اہم ہے۔
سی ایم ریکھا گپتا نے بھی وزیر اعظم نریندر مودی کی قیادت کے بارے میں بات کی۔ انہوں نے کہا کہ نوجوانوں بالخصوص لڑکیوں کے لیے تعلیم، ٹیکنالوجی، اختراعات اور قیادت کے شعبوں میں نئے مواقع پیدا ہو رہے ہیں۔ یہ ایک ایسے وقت میں اہم ہے جب ملک میں فنی تعلیم اور خواتین کی شرکت پر زور دیا جا رہا ہے۔IGDTUW اس سمت میں ایک اہم ادارہ ہے۔ یہ یونیورسٹی کشمیری گیٹ، دہلی میں واقع ہے اور خواتین کو تکنیکی اور اعلیٰ تعلیم فراہم کرنے پر توجہ مرکوز کرتی ہے۔ یہ یونیورسٹی 2012 میں دہلی حکومت کے ایک ایکٹ کے تحت قائم کی گئی تھی۔
IGDTUW کی توجہ صرف ڈگریاں حاصل کرنے تک محدود نہیں ہے۔ طلباء کو تکنیکی تعلیم، اختراعات اور پیشہ ورانہ مہارتوں کے ذریعے مستقبل کے چیلنجوں کے لیے تیار کرنا بھی اس کے مشن کا ایک اہم حصہ ہے۔ 2026-27 کے لیے یونیورسٹی کی تعلیمی سرگرمیوں میں مختلف انجینئرنگ اور دیگر پروگراموں کے لیے نئے تعلیمی بیچوں کی تیاری شامل ہے۔
بی ٹیک کے پہلے اور دوسرے سال 2026-27 کے لیے نئی تدریسی اسکیمیں بھی یونیورسٹی کی ویب سائٹ پر دستیاب ہیں۔ ایسی صورت حال میں، انڈکشن پروگرام نہ صرف نئے طلباء کے لیے ایک خوش آئند واقعہ ہے، بلکہ یونیورسٹی کے ماحول، مطالعہ، مواقع اور مستقبل کے امکانات سے خود کو آشنا کرنے کا ایک نقطہ آغاز بھی ہے۔
وزیراعلیٰ نے تقریب میں یونیورسٹی کے عہدیداروں، فیکلٹی اور دیگر اراکین کی موجودگی کو بھی نوٹ کیا۔ تقریب میں یونیورسٹی انتظامیہ اور دہلی حکومت کی تعلیمی قیادت کی موجودگی نے پروگرام کو ایک وسیع پیغام دیا۔ سی ایم ریکھا گپتا نے یہ بھی کہا کہ یونیورسٹی میں پہلا سال طلباء کے لیے بہت سے طریقوں سے خاص ہوتا ہے۔
اسکول چھوڑنا اور اعلیٰ تعلیم اور فنی تعلیم کے ماحول میں داخل ہونا اپنے آپ میں ایک بڑی تبدیلی ہے۔ ایسی صورت حال میں، انڈکشن پروگرام طلباء کو نئے ماحول کے ساتھ آرام دہ ہونے کا موقع فراہم کرتا ہے۔ ریکھا گپتا نے طلباء پر زور دیا کہ وہ اعتماد کے ساتھ آگے بڑھیں۔
آئی جی ڈی ٹی یو ڈبلیو کے انڈکشن پروگرام-2026 کی اختتامی تقریب میں، وزیر اعلیٰ ریکھا گپتا کا نئے طلباء کے لیے پیغام ایک تحریک اور اعتماد تھا۔ ان کا زور اس بات پر تھا کہ بیٹیاں اپنی صلاحیتوں کو پہچانیں، نئے مواقع کو اپنائیں اور تعلیم، ٹیکنالوجی، اختراعات اور قیادت کے شعبوں میں اپنی ایک مضبوط شناخت قائم کریں۔

(پی این این)
نئی دہلی: قومی کونسل برائے فروغ اردو زبان، نئی دہلی بہ اشتراک اصلاحی ہیلتھ کیئر فاؤنڈیشن’اردو زبان میں طبی تاریخ نویسی اور تذکرہ نگاری کی روایت‘ کے موضوع پر نہرو گیسٹ ہاؤس، جامعہ ملیہ اسلامیہ کے کمیٹی روم میں ایک روزہ سمینار کا انعقاد کیا گیا۔ سمینار میں طبی تاریخ نویسی اور تذکرہ نگاری کی روایت، اس کے تاریخی و تہذیبی پس منظر اور اردو زبان و ادب سے اس کے گہرے رشتے کے حوالے سے پرمغز خطبات اور مقالات پیش کیے گئے۔
سمینار کے افتتاحی اجلاس کے مہمانِ خصوصی ڈاکٹر نورظہیر احمد(ڈائرکٹر جنرل، سینٹرل کونسل فار ریسرچ اِن یونانی میڈیسن) نے قومی اردو کونسل اور اصلاحی ہیلتھ کیئر فاؤنڈیشن کو اس اہم اور منفرد موضوع پر سمینار کے انعقاد پر مبارک باد پیش کی۔ اپنے خطاب میں انھوں نے بین العلومی تناظر میں اردو زبان میں طبی تاریخ نویسی اور تذکرہ نگاری کی روایت کی اہمیت پر روشنی ڈالتے ہوئے کہا کہ طبی تاریخ محض امراض، علاج اور اطبّا کے احوال کا بیان نہیں، بلکہ یہ ہمارے تہذیبی، علمی اور سماجی ارتقا کی ایک اہم دستاویز بھی ہے۔ اردو میں طبی تاریخ نویسی اور تذکرہ نگاری کی ایک گراں قدر روایت موجود ہے، جسے محفوظ کرنا اور نئی نسل تک منتقل کرنا ہماری علمی ذمہ داری ہے۔انھوں نے مزید کہا کہ موجودہ ڈیجیٹل عہد میں ہمارے لیے یہ ناگزیر ہے کہ ہم اپنے طبی، ادبی اور علمی ورثے کو جدید ذرائع کے ذریعے محفوظ کریں اور اسے عالمی سطح پر متعارف کرائیں، تاکہ ہمارے اسلاف کی علمی کاوشیں محض ماضی کا حصہ بن کر نہ رہ جائیں، بلکہ آنے والی نسلوں کے لیے تحقیق و جستجو کا سرچشمہ بن سکیں۔
اس سے قبل استقبالیہ کلمات پیش کرتے ہوئے ڈاکٹر شمع کوثر یزدانی (اسسٹنٹ ڈائرکٹر ،اکیڈمک)، قومی کونسل برائے فروغ اردو زبان، نئی دہلی، نے قومی اردو کونسل کے اغراض و مقاصد پر روشنی ڈالی۔ انھوں نے اس موضوع سے متعلق کونسل کی جانب سے شائع ہونے والی اہم کتابوں کا ذکر کرتے ہوئے کہا کہ کونسل نے علمی، ادبی اور تحقیقی کتابوں کی اشاعت کے علاوہ طبی، سائنسی اور سماجی علوم کے میدان میں بھی گراں قدر خدمات انجام دی ہیں۔ انھوں نے بتایا کہ کونسل کی جانب سے جدید اور قدیم اطبا اور طب سے متعلق 50 سے زائد کتابوں کی ترتیب و تدوین بھی کی گئی ہے۔
مہمانِ اعزازی پروفیسر کوثر مظہری(صدرِ شعبۂ اردو، جامعہ ملیہ اسلامیہ) نے اپنی گفتگو میں طبی اصطلاحات اور اردو زبان کے باہمی رشتے پر نہایت جامع انداز میں روشنی ڈالی۔ انھوں نے اردو شاعری کے الفاظ، تراکیب اور قوافی میں مستعمل بعض ایسے الفاظ کی نشان دہی کی جو طبی اصطلاحات سے مماثلت رکھتے ہیں۔
اس ضمن میں انھوں نے مختلف اہم ادویہ اور امراض کے ناموں کا حوالہ دیتے ہوئے اس امر کی طرف توجہ دلائی کہ اردو زبان و ادب کا طب، بالخصوص یونانی طب کی تہذیبی و علمی روایت سے ایک گہرا، قدیم اور معنویت سے بھرپور رشتہ رہا ہے۔ یہ مماثلتیں اس بات کی غماز ہیں کہ اردو زبان و ادب اور طب کی روایت نے ایک دوسرے کے ساتھ مل کر ہماری تہذیبی اور علمی تاریخ کو ثروت مند بنایا ہے۔ پروفیسر کوثر مظہری نے مزید کہا کہ یونانی طب محض علاج معالجے کا ایک نظام نہیں، بلکہ یہ ایک وسیع تہذیبی اور علمی ورثہ ہے، جس کے اثرات ہماری زبان، ادب اور روزمرہ زندگی تک پھیلے ہوئے ہیں۔
سیشن کے دوسرے مہمانِ اعزازی ڈاکٹر یونس افتخار منشی (ڈپٹی ڈائرکٹر جنرل، سینٹرل کونسل فار ریسرچ اِن یونانی میڈیسن) نے اپنے خطاب میں طب کی مخصوص زبان اور اس کے لسانی ارتقا پر اظہارِ خیال کرتے ہوئے کہا کہ طب کی اپنی ایک مخصوص زبان ہوتی ہے اور جس معاشرے میں اس علم کی آبیاری ہوتی ہے، وہاں کی زبان بھی طبی اصطلاحات کی تشکیل، ترویج اور فروغ کا اہم ذریعہ بنتی ہے۔ طبی زبان کسی ایک زبان تک محدود نہیں رہتی، بلکہ مختلف تہذیبوں اور علمی روایتوں کے باہمی تعامل سے تشکیل پاتی ہے۔ انھوں نے کہا کہ طبی اصطلاحات میں فارسی اور عربی کے علاوہ دیگر زبانوں کے الفاظ بھی شامل ہوئے ہیں، جو صدیوں پر محیط علمی و تہذیبی میل جول کی عکاسی کرتے ہیں۔ انھوں نے مختلف ادویہ اور امراض کے ناموں کی مثالیں پیش کرتے ہوئے ان کے ماخذ اور لسانی پس منظر پر روشنی ڈالی۔
ڈاکٹر یونس افتخار منشی نے مزید کہا کہ برصغیر ہند و پاک میں یونانی طب کے زندہ اور متحرک رہنے اور اس کی علمی روایت کو نسل در نسل منتقل کرنے میں اردو زبان نے نہایت اہم کردار ادا کیا ہے۔ اردو نے نہ صرف طبی علوم کے ابلاغ کو آسان بنایا بلکہ یونانی طب کے علمی سرمائے کو محفوظ رکھنے اور عام کرنے میں بھی ایک مؤثر وسیلے کی حیثیت سے اپنی ذمہ داری ادا کی ہے۔
کلیدی خطبہ پیش کرتے ہوئے حکیم وسیم احمد اعظمی (سابق ڈپٹی ڈائرکٹر، سینٹرل ریسرچ انسٹی ٹیوٹ آف یونانی میڈیسن) نے اردو تذکرہ نگاری کی روایت، اس کے ارتقا اور طبی تذکرہ نگاری کے مختلف پہلوؤں پر تفصیل سے گفتگو کی۔ انھوں نے اردو تذکرہ نگاری کے حوالے سے فورٹ ولیم کالج کی علمی سرگرمیوں، مرزا علی لطف کے ’گلشنِ ہند‘، حیدر بخش حیدری، میر تقی میر کے ’نکات الشعرا‘ اور محمد حسین آزاد کے ’آبِ حیات‘ جیسے اہم متون کا ذکر کیا اور تذکرہ نگاری کی روایت میں ان کی اہمیت کو واضح کیا۔ انھوں نے طبی تذکرہ نگاری کے ضمن میں ’تذکرۃ الاطباء‘، ’طبقات الاطباء‘ اور دیگر تذکرۂ اطباء و حکما کی روایت کا حوالہ دیتے ہوئے کہا کہ طبی تذکرے محض اطبا، حکما اور ان کی تصانیف کا تعارف نہیں کراتے بلکہ اپنے عہد کی طبی فکر، علمی ماحول، تہذیبی صورتِ حال اور طب کے ارتقا کے اہم شواہد بھی فراہم کرتے ہیں۔ ان کے مطابق ایک اچھے تذکرے میں اختصار کے ساتھ جامعیت، تحقیق پسندی، غیر جانب داری اور مستند معلومات کا ہونا ضروری ہے۔ تذکرہ نگاری کا اسلوب غیر انشائیہ، متوازن اور غیر جانب دار ہونا چاہیے، تاکہ شخصیت اور اس کے علمی و فنی کارناموں کا حقیقت پسندانہ جائزہ پیش کیا جا سکے۔ انھوں نے کہا کہ یہ خصوصیات تذکرہ نگاری کے لیے بنیادی حیثیت رکھتی ہیں۔
تعارفی کلمات میں سید منیر عظمت (سکریٹری، اصلاحی ہیلتھ کیئر فاؤنڈیشن) نے یونانی طب اور صحت کے حوالے سے اس موضوع کی اہمیت و افادیت پر روشنی ڈالی۔ انھوں نے اردو زبان، طب اور برصغیر کی تاریخی و تہذیبی روایت کے باہمی تعلق پر گفتگو کرتے ہوئے اصلاحی ہیلتھ کیئر فاؤنڈیشن کے اغراض و مقاصد، تعلیمی سرگرمیوں، سماجی شعور بیدار کرنے اور سماجی خدمات کے حوالے سے بھی اظہارِ خیال کیا۔
افتتاحی اجلاس کی نظامت ڈاکٹر عمیر منظر(ایسوسی ایٹ پروفیسر، مولانا آزاد نیشنل اردو یونیورسٹی، لکھنؤ کیمپس، لکھنؤ)نے کی، جبکہ کلماتِ تشکر ڈاکٹر نازش احتشام اعظمی (جنرل سکریٹری، اصلاحی ہیلتھ کیئر فاؤنڈیشن) نے ادا کیے۔
افتتاحی اجلاس کے بعد دو تکنیکی اجلاس منعقد کیے گئے، پہلے اجلاس کی صدارت پروفیسر ادریس احمد، پروفیسر احمد محفوظ،پروفیسر ندیم احمد اور جناب عارف زیدی (سابق ڈین، جامعہ ہمدرد، دہلی)نے کی۔اس میں ڈاکٹر خورشید احمد شفقت اعظمی(دہلی)، ڈاکٹر محمد رضی الاسلام ندوی، پروفیسر عبداللہ عزیز(لکھنؤ)، پروفیسر حکیم اشہر قدیر(علی گڑھ)،حکیم امان اللہ(دہلی)، ڈاکٹر فیض الرحمن اقدس(دہلی) اور ڈاکٹر عبدالحلیم (لکھنؤ) نے اپنے مقالات پیش کیے۔اجلاس کی نظامت ڈاکٹر محمد فیصل نے کی۔
دوسرے تکنیکی اجلاس کی صدارت ڈاکٹر خورشید احمد شفقت اعظمی، پروفیسر شاہ عالم اور پروفیسر علاء الدین خاں نے کی۔اس اجلاس میں پروفیسر خان محمد قیصر(ممبئی)، ڈاکٹر عمیر منظر(لکھنؤ)، ڈاکٹر اسعد فیصل فاروقی(علی گڑھ)، ڈاکٹر محمد مقیم(دہلی) اور ڈاکٹر شاہنواز فیاض(دہلی) نے اپنے مقالات پیش کیے۔اس اجلاس کی نظامت ڈاکٹر ثاقب عمران نے کی۔
سامعین میں شامل اہم افراد میں جناب سہیل انجم، پروفیسر نجمی، حکیم اجمل خان، ڈاکٹر محمد فیصل، قومی اردو کونسل سے ڈاکٹر شمع کوثر یزدانی( اسسٹنٹ ڈائرکٹر،اکیڈمک)، ڈاکٹر مسرت ( ریسرچ آفیسر)، محترمہ نہاں رُباب ( اسسٹنٹ ایڈیٹر) اور محترمہ ذیشان فاطمہ( ریسرچ اسسٹنٹ) شامل رہیں۔

(پی این این)
نئی دہلی:جامعہ ملیہ اسلامیہ کو حکومتِ ہند کی وزارتِ صحت و بہبودِ خاندان کے زیر اہتمام محکمہ صحت تحقیق کی انسانی وسائل کی ترقی اسکیم کے جزواداروں اور سائنسی پیشہ ور افراد؍اداروں؍انجمنوں کی معاونت کے تحت ایک موقر گرانٹ منظور کی گئی ہے۔
اس اسکیم کے تحت، ڈی ایچ آر منتخب ملکی اداروں کو مخصوص ترجیحی شعبوں میں مصروف کار امیدواروں کے لیے خصوصی تربیتی پروگرام منعقد کرنے میں معاونت فراہم کرتا ہے۔ جامعہ ملیہ اسلامیہ کو اس کے تجویز کردہ پروجیکٹ بعنوان “اینٹی مائکروبیل ریزسٹنس میں مالیکیولر اور ملٹی اومکس طریقہ کار: تشخیص سے علاج تک کے لیے پانچ سال کی مدت کے واسطے چھیاسٹھ اعشاریہ تیئس لاکھ روپے کی خطیر گرانٹ منظور کی گئی ہے۔
یونیورسٹی کے لیے یہ گرانٹ ایک نمایاں کامیابی ہے اور یہ اینٹی مائکروبیل ریزسٹنس جیسے اہم شعبے میں بائیو میڈیکل تحقیق، سائنسی تربیت اور صلاحیت سازی کو مضبوط بنانے میں نمایاں کردار ادا کرے گی۔ یہ پروگرام مالیکیولر اور ملٹی اومکس طریقہ کار میں خصوصی تربیت فراہم کرے گا، جس میں اے ایم آر کی تشخیص، ملٹی اومکس طریقہ کار اور علاج کی حکمت عملیوں کی تیاری جیسے شعبے شامل ہوں گے۔ یہ اقدام بائیو میڈیکل سائنس کے ایک اہم اور تیزی سے ارتقا پذیر شعبے میں ہنر مند افرادی قوت تیار کر کے حکومتِ ہند کے ‘اسکل انڈیا پروگرام کے مقاصد کے حصول میں بھی معاون ثابت ہوگا۔
اس پروجیکٹ کی پرنسپل انویسٹی گیٹر، ڈاکٹر شمع پروین، جامعہ ملیہ اسلامیہ، نئی دہلی کے ‘سینٹر فار انٹرڈسپلنری ریسرچ اِن بیسک سائنسز میں پروفیسر ہیں۔ پروفیسر پروین کا تحقیقی دائرہ کار مالیکیولر بائیولوجی، وائرولوجی، متعدی امراض اور ٹرانسلیشنل بائیو میڈیکل ریسرچ پر محیط ہے۔ انھوں نے متعدد مالی معاونت فراہم کرنے والے اداروں، بشمول ڈی بی ٹی، سی ایس آئی آر، یو جی سی اور سی سی آر یو ایم۔آیوش کے تحت تحقیقی منصوبے مکمل کیے ہیں۔ پروفیسر پروین نے تحقیقی تربیت، رہنمائی اور تعلیمی اقدامات، کانفرنسوں اور ورکشاپ کے انعقاد میں بھی نمایاں خدمات انجام دی ہیں۔ منظور شدہ تجویز کے شریک محققین میں سی آئی آربی ایس سی،جامعہ ملیہ اسلامیہ کے پروفیسر امتیاز حسن، پروفیسر عاصم الاسلام، پروفیسر ایس این کاظم اور پروفیسر راجن پٹیل شامل ہیں۔
ان کی مشترکہ مہارت اس پروگرام کی بین علومی نوعیت کو مزید مستحکم کرے گی اور مالیکیولر بائیولوجی، کمپیوٹیشنل طریقہ کار اور ادویات کی دریافت وغیرہ پر محیط اے ایم آر(اینٹی مائکروبیل ریزسٹنس) تحقیق میں جدید تربیت کے لیے راہیں ہموار کرے گی۔
توقع ہے کہ اس اقدام سے اے ایم آر(اینٹی مائکروبیل ریزسٹنس) پر تحقیق میں جامعہ ملیہ اسلامیہ کا کردار مزید مستحکم ہوگا اور بین شعبہ جاتی سائنسی تربیت کو فروغ ملے گا، جس کے نتیجے میں ایسے ماہر محققین اور پیشہ ور افراد تیار ہوں گے جو اینٹی مائکروبیل ریزسٹنس کے بڑھتے ہوئے عالمی چیلنج سے نمٹنے کی صلاحیت رکھتے ہوں۔
پروفیسر محمد مہتاب عالم رضوی،مسجل،جامعہ ملیہ اسلامیہ نے پروفیسر شمع پروین اور ان کی ٹیم کو اس اہم کامیابی پر مبارکباد پیش کی۔ انھوں نے اینٹی مائکروبیل ریزسٹنس کے شعبے میں تحقیق کو پروان چڑھانے اور صلاحیت سازی میں ان کی خدمات کو سراہا اور امید ظاہر کی کہ یہ اقدام جامعہ ملیہ اسلامیہ کی تحقیقی ساکھ اور بائیو میڈیکل سائنسز میں ابھرتے ہوئے چیلنجوں سے نمٹنے میں اس کے کردار کو مزید بہتر بنائے گا۔ یونیورسٹی،ڈی ایچ آر کی اس باوقار گرانٹ کو جدید ترین بائیو میڈیکل تحقیق کو آگے بڑھانے، بین علومی تعاون کو مضبوط بنانے اور اینٹی مائکروبیل ریزسٹنس کے شعبے میں تحقیق و تربیت کے ایک مستحکم نظام کو فروغ دینے کی جانب ایک اہم پیش رفت تسلیم کرتی ہے۔