گاندھی جی کی سچائی اور عدم تشدد سے سبق لیں بچے : ابو فیصل،اردو پرائمری اسکول چاتَرگھاٹ میں گاندھی جی اور شاستری جی کوپیش کیا گیا خراجِ عقیدت

(پی این این)
گیا جی: بابائے قوم مہاتما گاندھی اور سابق وزیر اعظم لال بہادر شاستری کی یومِ پیدائش کے موقع پر اردو پرائمری اسکول چاتَرگھاٹ، نگر پرکھنڈ، گیا جی میں جمعہ کو تقریب کا انعقاد کیا گیا۔ اس موقع پر اسکول احاطے میں دونوں عظیم شخصیات کی تصاویر پر گل پوشی اور پھول نچھاور کرکے خراجِ عقیدت پیش کیا گیا۔ تقریب میں اساتذہ اور طلبہ و طالبات نے شرکت کرتے ہوئے گاندھی جی اور شاستری جی کے افکار و نظریات کو یاد کیا۔
اس موقع پر اسکول کے پرنسپل ابو فیصل نے کہا کہ مہاتما گاندھی اور لال بہادر شاستری کی زندگی صرف تاریخ کا حصہ نہیں، بلکہ موجودہ نسل کے لیے بھی رہنمائی کا اہم ذریعہ ہے۔ گاندھی جی نے سچ، عدم تشدد، ستیہ گرہ اور اخلاقی اقدار کو اپنا ہتھیار بنا کر تحریکِ آزادی کو ایک وسیع عوامی تحریک میں تبدیل کیا۔ انہوں نے کہا کہ گاندھی جی کی زندگی سچائی، محبت، باہمی ہم آہنگی، صفائی اور سماجی مساوات کا پیغام دیتی ہے۔ موجودہ دور میں ان کے نظریات کو اپناتے ہوئے معاشرے میں امن، بھائی چارے اور باہمی اتحاد کو مضبوط کیا جاسکتا ہے۔
تقریب میں اساتذہ نے بھی اپنے خیالات کا اظہار کرتے ہوئے کہا کہ عظیم شخصیات کی یومِ پیدائش منانے کا مقصد صرف ان کی تصاویر پر پھول چڑھانا نہیں، بلکہ نئی نسل کو ان کے افکار اور جدوجہد سے جوڑنا بھی ہے۔ اساتذہ نے طلبہ کو گاندھی جی اور شاستری جی کی زندگی سے سبق حاصل کرتے ہوئے ذمہ دار، حساس اور ایماندار شہری بننے کی ترغیب دی۔
اس موقع پر کئی طلبہ و طالبات نے مہاتما گاندھی اور لال بہادر شاستری کی زندگی، جدوجہد اور اصولوں پر اپنے خیالات پیش کیے۔ بچوں کی پیشکشوں میں دونوں عظیم شخصیات کے تئیں احترام کے ساتھ ساتھ ان کے افکار کو سمجھنے کی جھلک بھی نظر آئی۔ اس سے اسکول کا ماحول حب الوطنی اور قومی خدمت کے جذبے سے سرشار رہا۔
تقریب میں سانیہ خاتون، نازیہ گلشن، ہینا فردوس، وکاس رنجن کمار اور دلیپ کمار سمیت اساتذہ، باورچی نوشابہ خاتون، شہناز خاتون اور سرتا دیوی کے علاوہ بڑی تعداد میں طلبہ و طالبات موجود تھے۔