(پی این این)
دیوبند:سہارنپور سے کانگریس کے رکن پارلیمنٹ عمران مسعود کو اتر پردیش کانگریس کا صوبائی کارگزار صدر مقرر کیے جانے کے بعد مغربی اتر پردیش کی سیاست میں ان کا دائر کار مزید وسیع ہوگیا ہے، اس فیصلے کے ساتھ ہی ان کا سیاسی قد بھی اونچا ہو گیا ہے، اب اتر پردیش میں ہونے والے کسی بھی اتحاد میں عمران مسعود کا رول اہم ہوگا۔
کارگزار صدر مقرر کیے جانے کے بعد سہارنپور سے کانگریس کے ایم پی عمران مسعود نے میڈیا سے گفتگو کرتے ہوئے پارٹی قیادت کا شکریہ ادا کرتے ہوئے کہا کہ پارٹی نے ان سے جو توقعات وابستہ کی ہیں، انہیں پورا کرنے کی پوری کوشش کریں گے۔ انہوں نے کہا کہ پارٹی قیادت جہاں بھی ذمہ داری دے گی، وہاں پوری وفاداری اور خلوص کے ساتھ کام کریں گے۔
انہوں نے تنظیم کو مضبوط بنانے کے لیے کارکنوں کے ساتھ مل کر کام کرنے کی بات کہی۔ عمران مسعود کو نئی ذمہ داری ملنے کی اطلاع کے بعد سہارنپور واقع ان کی رہائش گاہ پر حامیوں اور کانگریس کارکنوں کی آمد کا سلسلہ شروع ہوگیا۔ کارکنوں نے ان سے ملاقات کرکے انہیں مبارکباد اور نیک خواہشات پیش کیں۔
