ملک کے عظیم قوم پرست رہنماہیں مولاناآزاد : جسٹس کاٹجو، یومِ پیدائش پر بھاگلپور میں خصوصی پروگرام کا انعقاد، ویڈیو کال کے ذریعے سابق جج مارکنڈے کاٹجو اور مولانا آزاد کی نسل سے تعلق رکھنے والی حسن آرا سلیم نے قوم کو دیا پیغام

(پی این این)
بھاگلپور: عظیم مجاہدِ آزادی، ممتاز ماہرِ تعلیم اور آزاد ہندوستان کے پہلے وزیرِ تعلیم مولانا ابوالکلام آزاد کے یومِ پیدائش اور قومی یومِ تعلیم کے موقع پر بدھ کے روز کوئلہ ڈپو پرائیویٹ بس اڈہ، ڈکشن موڑ واقع تین مزار احاطے میں ایک خصوصی پروگرام منعقد کیا گیا۔ پروگرام میں مولانا آزاد کی تعلیمی خدمات، قوم پرستانہ نظریات، ہندو مسلم اتحاد اور ملک کی مشترکہ تہذیب پر تفصیلی گفتگو کی گئی۔ اس موقع پر سپریم کورٹ کے سابق جج جسٹس مارکنڈے کاٹجو اور مولانا آزاد کی نسل سے تعلق رکھنے والی حسن آرا سلیم نے ویڈیو کال کے ذریعے اپنے پیغامات پیش کیے۔
پروگرام کا آغاز مولانا ابوالکلام آزاد کے لیے فاتحہ خوانی اور بابا شمس الدینؒکے مزار پر چادر پوشی کے ساتھ ہوا۔ دونوں بزرگوں کے لیے دعائے مغفرت بھی کی گئی۔ویڈیو کال کے ذریعے پروگرام سے جڑے سابق جج جسٹس مارکنڈے کاٹجو نے اپنے پیغام میں مولانا آزاد کو ملک کے عظیم قوم پرست رہنماؤں میں شمار کرتے ہوئے کہا کہ وہ ہندوستان کی تقسیم کے سخت مخالف تھے۔ انہوں نے ہندو مسلم اتحاد اور مشترکہ ہندوستانی قومیت کی وکالت کی تھی۔ کاٹجو کے خیالات کے مطابق ہندوستان کی تقسیم برصغیر کی سب سے بڑی تاریخی المیوں میں سے ایک تھی۔ مولانا آزاد کی دور اندیشی، حب الوطنی اور اتحاد کا پیغام آج بھی ملک کے لیے اہمیت رکھتا ہے۔
وہیں، مولانا ابوالکلام آزاد کی نسل سے تعلق رکھنے والی حسن آرا سلیم نے بھی ویڈیو کال کے ذریعے پروگرام میں موجود لوگوں کو اپنا پیغام دیا۔ انہوں نے مولانا آزاد کی تعلیمی وراثت، افکار اور تعمیرِ وطن میں ان کے کردار کو یاد کرتے ہوئے ان کی میراث کو نئی نسل تک پہنچانے کی ضرورت پر زور دیا۔ ان کا پیغام پروگرام میں موجود لوگوں کے لیے خصوصی توجہ کا مرکز رہا۔
اس موقع پر سعید انور نے کہا کہ مولانا آزاد صرف کسی ایک طبقے کے رہنما نہیں تھے، بلکہ پورے ہندوستان کی مشترکہ وراثت اور قومی یکجہتی کی علامت تھے۔ انہوں نے اپنی تحریر، صحافت اور سیاسی جدوجہد کے ذریعے انگریزی حکومت کی مخالفت کی اور ’الہلال‘ کے ذریعے ملک میں قومی بیداری پیدا کی۔ انہوں نے کہا کہ مولانا آزاد کے افکار کو آج کے سماجی اور سیاسی ماحول میں اپنانے کی ضرورت ہے۔ تعلیم، باہمی ہم آہنگی اور انسانیت ہی ایک مضبوط قوم کی بنیاد ہیں۔ انہوں نے نئی نسل سے کتابوں سے دوستی کرنے اور تعلیم کو معاشرے کی سب سے بڑی طاقت بنانے کی اپیل کی۔
سماجی کارکن شانے عبدالکریم انصاری نے اپنے خطاب میں مولانا آزاد کی شخصیت، قوم پرستانہ سوچ اور صحافتی خدمات کو یاد کیا۔ انہوں نے کہا کہ مولانا آزاد نے اپنی تحریروں کے ذریعے تحریکِ آزادی کو نئی سمت دی اور ملک کو فرقہ وارانہ ہم آہنگی اور باہمی اتحاد کا پیغام دیا۔ ان کے افکار کو موجودہ نسل تک پہنچانا وقت کی اہم ضرورت ہے۔مقررین نے کہا کہ مولانا آزاد نے آزاد ہندوستان کے تعلیمی نظام کو مضبوط بنیاد فراہم کرنے میں تاریخی کردار ادا کیا۔ اعلیٰ تعلیم، تکنیکی تعلیم، سائنسی تحقیق اور ثقافتی ترقی کے شعبوں میں ان کی خدمات کو ہمیشہ یاد رکھا جائے گا۔ ان کے یومِ پیدائش کو قومی یومِ تعلیم کے طور پر منایا جانا ان کے تئیں ملک کا حقیقی خراجِ عقیدت ہے۔
پروگرام میں سینئر صحافی قمر امان، سعید انور، شانے عبدالکریم انصاری، محمد عمر فاروق، محمد ابو سلام، محمد وکیل حسین، محمد مسیح انصاری، سید بن ملک، محمد جعفر انصاری، محمد الطاف، محمد عالم، محمد منظر، سید تنویر حسین عالم، فخرالدین علی، محمد جاوید، مولانا سرفراز، محمد سراج، جینت کمار سمیت درجنوں افراد موجود تھے۔آخر میں مولانا ابوالکلام آزاد کے تعلیم، قومی یکجہتی، بھائی چارے اور انسانیت کے پیغام کو عوام تک پہنچانے اور نئی نسل کو تعلیم یافتہ اور بیدار بنانے کا عزم کیا گیا۔