(پی این این)
پٹنہ:سوالیہ پرچہ لیک معاملے میں اندرا گاندھی انسٹی ٹیوٹ آف میڈیکل سائنسز (آئی جی آئی ایم ایس) کے چھ ایم بی بی ایس طلبہ کو چار ہفتوں کے لیے معطل کر دیا گیا ہے۔ معطل کیے گئے طلبہ میں 2022 بیچ کے ابھیجیت کمار، انکیت چندرا اور یش راج سنہا، جبکہ 2023 بیچ کے امت کمار، اویناش پرکاش اور سمیت کمار شامل ہیں۔
طلبہ کی نظم و ضبط کمیٹی کی رپورٹ کی بنیاد پر یہ کارروائی عمل میں آئی ہے۔ ان طلبہ کو ہدایت دی گئی ہے کہ وہ معطلی کی مدت کے دوران ہاسٹل سے باہر رہیں۔ اگر یہ طلبہ ایم بی بی ایس کے امتحانات میں نمایاں پوزیشن یا ٹاپ رینک بھی حاصل کریں گے تو انہیں کسی بھی قسم کے انعام سے محروم رکھا جائے گا۔ تاہم، اسپتال انتظامیہ نے اس معاملے میں اب تک کوئی ایف آئی آر درج نہیں کرائی ہے۔ تفتیشی کمیٹی نے ضمنی امتحان میں دھاندلی سے متعلق اپنی رپورٹ 27 اپریل کو ہی اسپتال انتظامیہ کے حوالے کر دی تھی۔
تفتیشی کمیٹی کی جانب سے ایم بی بی ایس امتحان میں دھاندلی کے الزامات درست پائے جانے کے بعد 27 اپریل کو آئی جی آئی ایم ایس انتظامیہ نے ایم بی بی ایس دوسرے سال کے ضمنی امتحان کو منسوخ کر دیا تھا۔ اس کے ساتھ ہی شعبۂ امتحانات کے تمام ملازمین اور ایم بی بی ایس کے سات طلبہ کو وجہ بتاؤ نوٹس جاری کیے گئے تھے۔ ان طلبہ کی نشاندہی کرکے انہیں انفرادی طور پر نوٹس تھمائے گئے تھے اور اپنا مؤقف پیش کرنے کی ہدایت دی گئی تھی۔ مزید برآں، آئی جی آئی ایم ایس انتظامیہ نے شعبۂ امتحانات میں بھی اہم انتظامی تبدیلیاں عمل میں لائی تھیں۔
ایم بی بی ایس کے ضمنی امتحان میں دھاندلی کے معاملے کی تفصیلی جانچ کے لیے 5 مئی کو تین کمیٹیاں تشکیل دی گئی تھیں۔ ان میں سے ایک کمیٹی طلبہ کو جاری کیے گئے وجہ بتاؤ نوٹسوں پر موصول ہونے والے جوابات کا جائزہ لے کر اپنی رپورٹ تیار کرے گی۔ دوسری کمیٹی بدعنوانی اور بے ضابطگی سے پاک امتحانات کے انعقاد کے لیے رہنما اصول مرتب کرے گی، جبکہ تیسری کمیٹی پورے امتحانی نظام اور اس کے طریقۂ کار کا تفصیلی مطالعہ کرے گی۔

(پی این این)
پٹنہ:بہار کے پنچایتی راج کے وزیر دیپک پرکاش کو گورنر نے بہار قانون ساز کونسل کے رکن (ایم ایل سی) کے طور پر نامزد کر دیا ہے۔ اس حوالے سے محکمہ الیکشن نے نوٹیفکیشن بھی جاری کر دیا ہے۔ موصولہ اطلاعات کے مطابق بہار حکومت کی سفارش پر گورنر نے بدھ (5 اگست) کو یہ فیصلہ کیا ہے۔ واضح رہے کہ دیپک پرکاش راشٹریہ لوک مورچہ (آر ایل ایم) کے صدر اور راجیہ سبھا رکن اپیندر کشواہا کے بیٹے ہیں۔ دیپک پرکاش کو ایم ایل سی بنائے جانے کا قدم ایسے وقت میں اٹھایا گیا ہے جب سپریم کورٹ نے دیپک پرکاش کے وزیر بنے رہنے پر سوال اٹھایا تھا۔
دیپک پرکاش کو بہار قانون ساز کونسل کا رکن بنائے جانے پر اپیندر کشواہا نے کہا کہ ’’ یہ تو این ڈی اے کا ایک پرانا اور طے شدہ فیصلہ تھا، جس پر اب عمل درآمد کیا گیا ہے۔ بی جے پی اور این ڈی اے کے تمام لیڈران کے درمیان باہمی مشاورت سے یہ امور پہلے ہی طے پا چکے تھے۔ چونکہ دیپک پرکاش کسی بھی ایوان کے رکن بنے بغیر وزیر بن رہے تھے، اس لیے اسی وقت یہ طے کر لیا گیا تھا کہ انہیں ایوان میں بھیجنا ہے۔‘‘ ساتھ ہی انہوں نے کہا کہ مجھے کامل یقین ہے کہ دیپ پرکاش مکمل لگن اور عوامی خدمت ک جذبے کے ساتھ بہار کی ترقی اور عوام کے مفادات کو نئی مضبوطی دیں گے۔
بہار گزٹ میں شائع محکمہ الیکشن کے نوٹیفکیشن کے مطابق آئین کی دفعہ 171 کی شق (3) کی ذیلی شق (ای) اور شق (5) کے تحت حاصل اختیارات کا استعمال کرتے ہوئے گورنر نے دیپک پرکاش کو بہار قانون ساز کونسل کا رکن نامزد کیا جائے گا۔ واضح رہے کہ دیپک پرکاش کی نامزدگی بی جے پی کے ایم ایل سی دیویش کمار کے استعفیٰ کے بعد خالی ہوئی سیٹ کے لیے کی گئی ہے۔ رپورٹس کے مطابق دیپک پرکاش کی مدت کار 16 مارچ 2027 تک رہے گی۔قابل ذکر ہے کہ حال ہی میں سپریم کورٹ نے بہار حکومت سے یہ واضح کرنے کو کہا تھا کہ ’’دیپک پرکاش کسی ایوان کے رکن نہ ہونے کے باوجود وزیر کے عہدے پر کیسے فائز ہیں۔‘‘ دراصل آئین کے مطابق اگر کوئی شخص وزیر بنتا ہے تو 6 مہینے کے اندر اس کا اسمبلی یا قانون ساز کونسل کا رکن بننا لازمی ہے۔ ایسا نہ ہونے پر متعلقہ شخص کو وزارتی عہدہ چھوڑنا پڑ سکتا ہے۔

(پی این این)
پٹنہ:بہار کے پانچ اضلاع کو ڈینگو کے ریڈ زون میں شامل کیا گیا ہے۔ ان میں مظفرپور کے علاوہ پٹنہ، مدھے پورہ، ویشالی اور بھاگلپور شامل ہیں۔ ان اضلاع میں ڈینگو کی روک تھام کے لیے خصوصی چوکسی اور سخت نگرانی برتی جائے گی۔
ضلع ویکٹر سے پیدا ہونے والی بیماریوں کے کنٹرول کے افسر ڈاکٹر راجیش کمار کے مطابق ڈینگی پر قابو پانے کے لیے تمام تیاریاں مکمل کر لی گئی ہیں۔ اب تک کسی بھی مریض کی حالت تشویشناک ہونے کی اطلاع نہیں ملی ہے، جبکہ اسپتالوں میں تشخیصی کٹس بھی فراہم کر دی گئی ہیں۔
محکمہ صحت کے ذرائع کے مطابق مظفرپور کا مُشہری علاقہ ڈینگی کے ہاٹ اسپاٹ کے طور پر نشان زد کیا گیا ہے۔ اس کے علاوہ موتی جھیل، اہیاپور اور شہبازپور علاقوں میں بھی ڈینگو کے نسبتاً زیادہ مریض سامنے آئے ہیں۔رواں سال اب تک پورے بہار میں ڈینگو کے 191 مریض سامنے آ چکے ہیں۔ ان میں سے صرف ریڈ زون قرار دیے گئے پانچ اضلاع میں 84 مریضوں کی تصدیق ہوئی ہے۔
مظفرپور ضلع میں اب تک ڈینگی کے 17 کیس رپورٹ ہوئے ہیں۔اعداد و شمار کے مطابق پٹنہ میں سب سے زیادہ 54 مریض سامنے آئے ہیں، جبکہ ویشالی میں 6، مدھے پورہ میں ایک، بھاگلپور میں 6 اور مظفرپور میں 17 مریضوں کی تصدیق ہوئی ہے۔ان اضلاع میں گزشتہ سال بھی ڈینگو کے مریضوں کی تعداد نسبتاً زیادہ رہی تھی، جس کے پیش نظر انہیں ریڈ زون میں شامل کیا گیا ہے۔ سال 2025 میں پٹنہ میں 1817، ویشالی میں 166، مدھے پورہ میں 127، مظفرپور میں 125 اور بھاگلپور میں 93 ڈینگو کے مریض ریکارڈ کیے گئے تھے۔
روزانہ سامنے آ رہے ہیں ڈینگو کے نئے مریض: سرکاری لیبارٹریوں کی جانچ کے مطابق اب تک ڈینگی کے صرف 17 مریضوں کی تصدیق ہوئی ہے، جبکہ نجی لیبارٹریوں کی رپورٹوں میں روزانہ نئے مریض سامنے آ رہے ہیں۔
محکمۂ صحت کا کہنا ہے کہ جب تک ایلائزا (ELISA) ٹیسٹ کے ذریعے ڈینگی کی تصدیق نہ ہو جائے، مریض کو سرکاری اعداد و شمار میں شامل نہیں کیا جاتا۔ ایلائزا ٹیسٹ ایس کے ایم سی ایچ اور صدر اسپتال میں کیا جاتا ہے۔
حیرت کی بات یہ ہے کہ ڈینگی کے 17 مریض سامنے آنے کے باوجود اب تک اسپتالوں میں ڈینگی کے لیے خصوصی وارڈ قائم نہیں کیے گئے ہیں۔
دوسری جانب ایک تشویشناک صورتِ حال یہ بھی ہے کہ محکمۂ صحت کی رپورٹ کے مطابق مظفرپور میں ڈینگی پر قابو پانے کے لیے فعال فوگنگ مشینوں کی تعداد 15 بتائی گئی ہے، مگر ان میں سے صرف 6 ہی قابلِ استعمال ہیں۔
اسی طرح ریاست بھر میں فعال فوگنگ مشینوں کی تعداد 318 ظاہر کی گئی ہے، لیکن درجنوں مشینیں خراب ہونے کے باعث کام نہیں کر رہی ہیں۔مظفرپور ضلع میں ڈینگو کے 17 کیس سامنے آنے کے باوجود کئی علاقوں میں فوگنگ نہیں کرائی گئی۔ محکمۂ صحت کا کہنا ہے کہ دیہی علاقوں میں فوگنگ کرانے کی ذمہ داری اس کی ہے، جبکہ شہری علاقوں میں یہ ذمہ داری میونسپل کارپوریشن کے سپرد ہے۔