زندگی میں معنویت اور انسانی بہبود پر اے ایم یو کے اے سی ڈبلیو ایس میں ورکشاپ کا اہتمام

علی گڑھ: علی گڑھ مسلم یونیورسٹی کے ایڈوانسڈ سنٹر فار ویمنس اسٹڈیز (اے سی ڈبلیو ایس) نے اپنی 25 سالہ تقریبات کے تحت ”زندگی میں معنویت کی تلاش: انسانی بہبود پر فلسفیانہ غوروفکر“ موضوع پر ایک ورکشاپ منعقد کی۔سنٹر کی ڈائریکٹر پروفیسر عذرا موسوی نے بہبود کا احساس پیدا کرنے میں مقصدِزندگی، خود آگہی، بامعنی تعلقات اور ذاتی اقدار کی اہمیت کو اجاگر کیا۔ ڈاکٹر توصیف فاطمہ نے ایک مذاکرہ کی نظامت کی، جس میں طلبہ کو زندگی کے مقصد، خوشی اور اپنی ذاتی امنگوں پر غور کرنے کی ترغیب دی گئی۔ورکشاپ میں اسٹیو کٹس کی فلم ”ہیپینیس“ کی نمائش بھی کی گئی، جس کے بعد خوشی، صارفیت اور مادی کامیابی کے عصری تصورات پر تبادلہ خیال ہوا۔ طلبہ نے مہربانی، انصاف، ہمدردی، محبت، دانائی اور حوصلے سمیت 6 اقدار پر مبنی ایک گروپ سرگرمی میں بھی حصہ لیا اور روزمرہ کی زندگی میں ان اقدار کی معنویت کے حوالے سے اپنے خیالات پیش کیے۔
شعبہ فلسفہ کے ڈاکٹر زید احمد صدیقی نے زندگی میں معنویت کی تلاش کے فلسفیانہ اور عملی پہلوؤں پر خطاب کیا۔ انہوں نے طلبہ کو اپنے خیالات، انتخاب، تعلقات اور اقدار پر غور کرنے اور یہ سوچنے کی ترغیب دی کہ زندگی کوکون سی چیزیں قابلِ زیست اور بامقصد بناتی ہیں۔ اس کے بعد سوال و جواب کی ایک نشست ہوئی۔آخر میں مسٹر شیراز احمد نے اظہارِ تشکر کیا۔