نئی دہلی:جنتر منتر پر کاکروچ جنتا پارٹی کا دھرنا جاری ہے۔ ان کے اندولن کے ساتھ معروف سماجی خدمات گار سونم وانگچک بھی شریک ہوچکے ہیں آج ان کے بھوک ہڑتال کا ساتواں دن ہے۔ جس میں ان کا پانچ کلو وزن کم ہوگیا ہے۔ اس دوران سی جے پی نے مرکزی وزیر تعلیم دھرمیندر پردھان کے استعفیٰ کے مطالبہ کو تیز کردیا ہے۔ واضح ہو کہ جنتر منتر پر طلبا نیٹ ، یوجی سمیت مقابلہ جاتی امتحانات میں بدعنوانی کولیکر مظاہرہ کررہے ہیں۔

بمبئی ہائی کورٹ نے ایک اہم فیصلے میں کہا ہے کہ جمہوری نظام میں شہریوں کو حکومت کی پالیسیوں سے اختلاف کرنے، اپنے خیالات کا اظہار کرنے اور پُرامن احتجاج کرنے کا آئینی حق حاصل ہے۔ صرف حکومت مخالف نعرے لگانے یا احتجاجی مظاہروں میں شرکت کرنے کی بنیاد پر کسی شہری کو اس کے اپنے شہر سے بے دخل نہیں کیا جا سکتا۔ عدالت نے اسی بنیاد پر مہاراشٹر پولیس کی جانب سے جاری ایک سالہ ایکسٹرنمنٹ (شہر بدری) کا حکم منسوخ کر دیا۔
یہ فیصلہ جسٹس مادھو جمدار کی بنچ نے سوشلسٹ ڈیموکریٹک پارٹی آف انڈیا (ایس ڈی پی آئی) کے مہاراشٹر کے جنرل سیکریٹری اور سابق لوک سبھا امیدوار سعید احمد عبد الواحد چودھری کی درخواست پر سنایا۔ عدالت نے واضح کیا کہ انتظامی اختیارات کا استعمال شہریوں کے آئینی اور بنیادی حقوق کو نظرانداز کرتے ہوئے نہیں کیا جا سکتا۔
سماعت کے دوران عدالت نے پولیس کی کارروائی اور اس کے جواز پر کئی اہم سوالات اٹھائے۔ جسٹس مادھو جمدار نے ریمارکس دیے کہ ہر شہری کو حکومت کی پالیسیوں پر تنقید کرنے، احتجاج کرنے اور اختلاف رائے ظاہر کرنے کا حق حاصل ہے۔
عدالت نے سوال کیا کہ محض ’’بی جے پی حکومت مردہ باد‘‘ یا ’’امت شاہ مردہ باد‘‘ جیسے نعرے کسی شخص کے خلاف شہر بدری جیسی سخت کارروائی کی بنیاد کیسے بن سکتے ہیں۔ عدالت نے یہ بھی کہا کہ جمہوریت میں اختلاف رائے کو دبانے کے بجائے اسے برداشت کرنا ریاستی اداروں کی ذمہ داری ہے۔
جسٹس جمدار نے گزشتہ برسوں میں مختلف مسابقتی امتحانات کے پرچے لیک ہونے کے واقعات کا حوالہ دیتے ہوئے کہا کہ اگر عوام ایسے معاملات پر احتجاج کریں اور اس کے جواب میں ان پر مقدمات درج کیے جائیں تو یہ جمہوری اقدار کے مطابق نہیں ہوگا۔ عدالت نے واضح کیا کہ پولیس عوام کی خدمت کے لیے ہے اور اس کی جواب دہی شہریوں کے سامنے ہے، نہ کہ کسی سیاسی جماعت یا حکومت کے سامنے۔
اپنے تحریری فیصلے میں ہائی کورٹ نے کہا کہ حکومت کے بعض فیصلوں کی مخالفت کرنا کسی شخص کو اس کے رہائشی علاقے سے بے دخل کرنے کی قانونی بنیاد نہیں بن سکتا۔ عدالت کے مطابق ایسی کارروائی اظہارِ رائے کی آزادی اور وقار کے ساتھ زندگی گزارنے کے بنیادی حقوق کی خلاف ورزی ہے۔عدالت نے مشاہدہ کیا کہ درخواست گزار کے خلاف جاری کیے گئے ایکسٹرنمنٹ آرڈر کی اصل وجہ مختلف احتجاجی پروگراموں کا انعقاد اور ان میں شرکت تھی۔ عدالت نے کہا کہ صرف اسی بنیاد پر کسی شہری کے خلاف اتنی سخت انتظامی کارروائی نہیں کی جا سکتی۔
سعید احمد عبد الواحد چودھری شہریت ترمیمی قانون (سی اے اے)، نیشنل رجسٹر آف سٹیزنز (این آر سی)، بابری مسجد تنازع، گیان واپی مسجد معاملہ، وقف بورڈ میں مبینہ بدعنوانی اور ایندھن کی بڑھتی ہوئی قیمتوں سمیت کئی عوامی مسائل پر ہونے والے احتجاجی مظاہروں میں سرگرم رہے ہیں۔

نئی دہلی :سپریم کورٹ نے کہا ہے کہ مصنوعی ذہانت سے بنائے گئے قانونی مثالوں کا استعمال انتہائی خطرناک ہے۔ کورٹ نے کہا کہ یہ خطرہ اتنا ہی بڑا ہے جتنا بھوپال گیس المیہ میں زہریلی گیس کا رسائو تھا۔
جسٹس پی ایس نرسمہا اور جسٹس ارادھے کی بنچ نے نیشنل کمپنی لا ٹریبونل (ایل سی ایل ٹی) کے فیصلے کو منسوخ کردیا اور کہا کہ اے آئی سے بنائے گئے جھوٹے اور غیر موجود فیصلوں کو کورٹ میں اصلی بتا کر پیش کرنا نظام عدل کو نقصان پہنچاتا ہے۔ ایسے معاملوں میں عدالتوں کو بالکل نرمی نہیں دکھانی چاہئے۔
غورطلب ہے کہ ایل سی ایل ٹی میں اپنے فیصلے کو صحیح ثابت کرنے کے لئے جن قانونی معاملوں کو حوالہ دیا تھا ان میں کئی معاملے اصل نہیں تھے۔ فیصلوں میں کچھ معاملوں کا نام لکھا گیا تھا جو پوری طرح نقلی تھے۔ ان کا قانونی سائٹیشن بنایا گیا تھا۔ ان کا کوئی حقیقی ریکارڈ موجود نہیں تھا۔
جموں وکشمیر بینک لمیٹڈ نے سپریم کورٹ میں حلف نامہ دیا تھا کہ ان کے وکیل نے نقلی حوالہ نہیں دیا تھا یہ ریسرچ کا موضوع ہے۔ عدالت میں کہا کہ وہ اے آئی کے خلاف نہیں بلکہ اس کی غلط جانکاری کے خلاف ہے، اس لئے اے آئی کا استعمال انتہائی ہوشیاری ، جانچ پڑتال اور انسانی نگرانی میں کی جانی چاہئے۔
اگر کوئی وکیل بنا کسی جانچ کے اے آئی کی جانکاری کو کورٹ میں پیش کرتا ہے تو اس کی پیشہ ورانہ غلطی ہے۔ اسی طرح اگر کوئی جج بھی ایسی غلط جانکاری پر بھروسہ کرتا ہے تو یہ سنگین غلطی مانی جائے گی۔ عدالت کا کہنا ہے کہ نظام عدل میں ایمانداری اور بھروسہ بنائے رکھنا ضروری ہے۔ اے آئی کا استعمال کیا جاسکتا ہے لیکن جانچ اور فیصلہ انسانی ذہن کے مطابق ہونا چاہئے۔